ពលរដ្ឋខេត្តស្វាយរៀងរីករាយប្រើប្រាស់សេវាសុខាភិបាលមណ្ឌលសុខភាព

មណ្ឌលសុខភាព នៅក្នុងខេត្តស្វាយរៀង បាននិងកំពុងផ្ដល់សេវាសុខាភិបាលប្រកបដោយក្រមសីលធម៌វិជ្ជាជីវៈ ដែលបានទាក់ទាញចិត្តប្រជាពលរដ្ឋឱ្យទៅរកសេវារដ្ឋនេះដោយភាពកក់ក្ដៅ។

ប្រជាពលរដ្ឋ ដែលបានទៅរកសេវាសុខាភិបាល នៅមណ្ឌលសុខភាពសង្ឃ័រ ក្នុងសង្កាត់សង្ឃ័រ ក្រុងស្វាយរៀង បានកោតសរសើរចំពោះក្រុមគ្រូពេទ្យនៃមណ្ឌលសុខភាពនេះ ដែលមានការទទួលខុសត្រូវខ្ពស់ចំពោះអ្នកជំងឺ ដែលបានចូលមករកសេវាពិគ្រោះ និងព្យាបាលជំងឺ។

លោកស្រី នាង សារ៉ាន់ ប្រធានមណ្ឌលសុខភាពសង្ឃ័រ បានប្រាប់BTVថា ជារៀងរាល់ថ្ងៃ មណ្ឌលសុខភាពនេះ ទទួលប្រជាពលរដ្ឋមកពីគ្រប់តំបន់ដែលបានចូលមកពិគ្រោះ និងទទួលយកសេវាព្យាបាលជំងឺ ដោយពួកគេកាន់តែមានការយល់ដឹងច្បាស់ និងមានជំនឿមកលើក្រុមគ្រូពេទ្យរដ្ឋ ពិសេសនោះពលរដ្ឋបានយល់ពីឥរិយាបទក្រុមគ្រូពេទ្យ បានបំពេញការងារជំនាញដោយយកចិត្តទុកដាក់ រហ័ស និងផ្តល់សេវាដល់អ្នកជំងឺបានទាន់ពេលវេលា ។

លោកស្រីបានបន្តថា កត្តាដែលមណ្ឌលសុខភាពសង្ឃ័រ ទទួលបានការគាំទ្រពីពលរដ្ឋនៅគ្រប់មជ្ឈដ្ឋានច្រើន ដោយកន្លងមក មណ្ឌលសុខភាព តែងតែបានធ្វើការផ្សព្វផ្សាយពីចំនួនសេវាព្យាបាលជំងឺ ដោយគ្មានការលាក់បាំងអ្វីឡើយ ៕

អត្ថបទ៖ ភា សារិត