រាជរដ្ឋាភិបាលនឹងបន្តលើកលែង និងអនុគ្រោះពន្ធលើការផ្ទេរកម្មសិទ្ធិ ឬ​សិទ្ធិកាន់​កាប់​អចលន​ទ្រព្យ

រាជរដ្ឋាភិបាលលើកលែង និងអនុគ្រោះពន្ធលើការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ ដោយ​ផ្តល់​ការ​អ​នុគ្រោះព្យួរការអនុវត្តពន្ធបន្ថែម, អនុញ្ញាតឱ្យបង់ពន្ធប្រថាប់ត្រា និងពន្ធ​លើ​អចលន​ទ្រ​ព្យ​លើសំណង់ចុងក្រោយ និងលើកលែងពន្ធប្រថាប់ត្រាលើការផ្ទេរកម្ម សិទ្ធិ ឬ​សិទ្ធិ​កាន់​កាប់​អចលនទ្រព្យដែលម្ចាស់កម្មសិទ្ធិជាយោធិន និងនគរបាលជាតិ។

ក្រសួងសេដ្ឋកិច្ច និងហិរញ្ញវត្ថុ ចេញសេចក្តីជូនដំណឹង ស្តីពីគោលការណ៍លើកលែង និង​អនុ​គ្រោះ​ពន្ធ​លើ​ការផ្ទេរកម្មសិទ្ធិ ឬ សិទ្ធិកាន់កាប់អចលនទ្រព្យ, យោងអនុលោមតាម​ចំណារ​ដ៏​ខ្ពង់​ខ្ពស់​របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះ រាជាណាចក្រកម្ពុជា ចុះ​ថ្ងៃ​ទី​២៨ ខែកក្កដា ឆ្នាំ២០២៦ លើលិខិតលេខ ៧៧៦៨ សហវ.លស ចុះថ្ងៃទី២៧ ខែកក្កដា ឆ្នាំ​២០២៦ របស់ក្រសួងសេដ្ឋកិច្ច និងហិរញ្ញវត្ថុ និងប្រសាសន៍ណែនាំដ៏ខ្ពង់ខ្ពស់ របស់សម្តេចធិបតី នាយក​រដ្ឋមន្ត្រី ក្នុងពិធីចែកវិញ្ញាបនបត្រ សម្គាល់ម្ចាស់អចលនវត្ថុ ជូនប្រជា​ពលរដ្ឋ​នៅ​ស្រុក​ខ្សាច់​កណ្តាល ​ខេត្តកណ្តាល កាលពីថ្ងៃទី២៩ ខែកក្កដា ឆ្នាំ២០២៦។

ក្រសួងសេដ្ឋកិច្ច និងហិរញ្ញវត្ថុ ជម្រាបជូនដំណឹងដល់ម្ចាស់អចលនទ្រព្យ និងសាធារណ​ជន​ឱ្យ​បាន​ជ្រាប ​ដែលរាជរដ្ឋាភិបាល បានដាក់ចេញនូវវិធានការគាំទ្រតាមរយៈការលើកលែង និង​អនុ​គ្រោះ​ផ្នែក​ពន្ធដាររួមមាន៖ ផ្តល់ការអនុគ្រោះព្យួរការអនុវត្តពន្ធបន្ថែម ចំពោះការយឺត​យ៉ាវ​ក្នុង​ការ​បង់​ពន្ធ​ប្រថាប់ត្រា ដែលត្រូវទទួលរងពិន័យស្មើនឹង ១០០ ភាគរយ នៃប្រាក់ពន្ធដែលត្រូវបង់ ចំពោះ​ដី​កាអម ឬដីកាបញ្ជូនហួសរយៈពេល ៣ ខែ នៃកាលបរិច្ឆេទដែលចេញពីមន្ទីររៀបចំដែនដី នគ​រូបនីយកម្ម សំណង់ និងសុរិយោដីរាជធានី-ខេត្ត រហូតដល់ដំណាច់ឆ្នាំ២០២៧។

អនុញ្ញាតពន្យារសុពលភាពនៃសេចក្តីជូនដំណឹងលេខ ៣៦៧ សជណ ចុះថ្ងៃទី២ ខែឧសភា ឆ្នាំ​២០១៧ របស់ទីស្តីការគណៈ រដ្ឋមន្ត្រី ដោយអ​នុញ្ញាត​ឱ្យ​បង់​ពន្ធ​ប្រថាប់​ត្រា​តែ​មួយ​ដងលើក​ចុង​ក្រោយ ​ចំពោះករណីអចលនទ្រព្យដែលមានសាវតារ ផ្ទេរសិទ្ធិកាន់ កាប់បន្តដៃគ្នាច្រើនដង ត្រឹម​ដំណាច់​ខែ​កក្កដា ឆ្នាំ២០២៦។

អនុញ្ញាតឱ្យបង់ពន្ធប្រថាប់ត្រា និងពន្ធលើអចលនទ្រព្យលើសំណង់ចុងក្រោយ ដោយ​គ្រាន់​តែ​មាន​លិខិត​អនុញ្ញាតសាងសង់ ឬមានការបញ្ជាក់ពីសំណង់ ដោយអាជ្ញាធរមានសមត្ថកិច្ចពាក់ព័ន្ធ លើ​កាលបរិច្ឆេទសាងសង់។ និងការលើកលែងពន្ធប្រថាប់ត្រា លើការផ្ទេរកម្មសិទ្ធិ ឬសិទ្ធិ​កាន់​កាប់​អចលន​ទ្រព្យ​ដែលម្ចាស់កម្មសិទ្ធិជាយោធិន និងនគរបាលជាតិដែលចូលរួមក្នុងសមរភូមិជួរមុខ ដោយមានការបញ្ជាក់អត្តសញ្ញាណនិងតួនាទីភារកិច្ចពីអង្គភាពសាមី។ ការអនុគ្រោះនេះ ពុំ​មាន​អានុភាព​ប្រតិសកម្ម ចំពោះប្រាក់ពន្ធ រួមទាំងទណ្ឌកម្មរដ្ឋបាល (ពន្ធបន្ថែម និងការប្រាក់) ដែល​បាន​បង់​រួច​ហើយនោះទេ។

បញ្ហានេះដែរ, ក្រសួងសេដ្ឋកិច្ច និងហិរញ្ញវត្ថុ ក៏បានអំពាវនាវឱ្យប្រជាពលរដ្ឋទាំងអស់ ដែល​ជា​ម្ចាស់​អចលនទ្រព្យដែលមាន ឯកសារ កំពុងដំណើរការនៅមន្ទីររៀបចំដែនដី នគរូបនីយកម្ម សំណង់ និងសុរិយោដី រាជធានី-ខេត្ត ឬនៅរដ្ឋបាលសារពើពន្ធ សូមរួសរាន់ទៅ បំពេញបែបបទ និង​នីតិវិធីនៃការចុះបញ្ជីដីធ្លី និងបង់ពន្ធប្រថាប់ត្រាលើការផ្ទេរកម្មសិទ្ធិឬ សិទ្ធិកាន់​កាប់​អចលន​ទ្រព្យ ​ឬពន្ធលើអចលន ទ្រព្យ ដើម្បីអាចទទួលបណ្ណកម្មសិទ្ធិបានឆាប់រហ័ស៕ អត្ថបទ៖ សុន រ៉ាឌី