សម្តេចធិបតី៖ ការតែងតាំងលោកស្រី កឹម មនោវិទ្យា ព្រោះគាត់មានសមត្ថភាព និងមានទំនាក់ទំនងក្រៅប្រទេស

សម្ដេច​មហាបវរធិបតី ហ៊ុន ម៉ាណែត នាយកដ្ឋមន្រ្ដីនៃកម្ពុជា មានប្រសាសន៍បញ្ជាក់ជាថ្មីថា ការតែងតាំងលោកស្រី កឹម មនោវិទ្យា ជាប្រេសិតពិសេស ព្រោះគាត់មានសមត្ថភាព និងមានទំនាក់ទំនងក្រៅប្រទេសច្រើន ដែលជាពេលវេលាកម្ពុជាត្រូវការចាំបាច់។

សម្ដេច​ធិបតី នាយករដ្ឋមន្រ្ដី​ បាន​ប្រកាស​ស្វាគមន៍បែបនេះ​ក្នុងឱកាស អញ្ជើញជាអធិបតីភាពដ៏ខ្ពង់ខ្ពស់ក្នុងពិធីសំណេះសំណាលជាមួយអាចារ្យ អាចារិនីទូទាំងប្រទេស លើកទី១១ នៅព្រឹកថ្ងៃទី១៩ ខែសីហា ឆ្នាំ២០២៦នេះ។

ការតែងតាំងនេះត្រូវបានប្រកាសជាផ្លូវការកាលពីថ្ងៃទី១៧ ខែសីហា ឆ្នាំ២០២៦នេះ, សម្តេចធិបតីបានថ្លែង​បញ្ជាក់ថា លោកស្រី កឹម មនោវិទ្យា មានសមត្ថភាពខ្ពស់ និងមានបណ្តាញទំនាក់ទំនងក្រៅប្រទេសច្រើន ដែលជាធនធានចាំបាច់បំផុតសម្រាប់កម្ពុជានាពេលបច្ចុប្បន្ន។ សម្ដេច​ថ្លែង​ថា លោកស្រីនឹងដើរតួនាទីយ៉ាងសំខាន់ក្នុងការជួយរាជរដ្ឋាភិបាលលើកិច្ចការទាក់ទាញវិនិយោគិនបរទេសឱ្យមកបណ្តាក់ទុនរកស៊ីនៅកម្ពុជា។ សម្ដេច​ធិបតីបានបញ្ជាក់កាលពីជំនួបជាមួយលោកស្រី មនោវិទ្យាថា ក្នុងនាមជាអ្នកនយោបាយជំនាន់ថ្មីដូចគ្នា គឺមានកិច្ចការមួយចំនួនដែលយើងអាចរួមសហការគ្នាធ្វើ ដើម្បីឧត្តមប្រយោជន៍របស់ប្រទេសជាតិយើង ជាពិសេសនៅលើឆាកអន្តរជាតិ។

សម្តេចធិបតីថ្លែងថា៖«ខ្ញុំទទួលឯកឧត្ដម កឹម សុខា​ និងកូនគាត់ចូលមកគាត់នៅបក្សផ្សេង និន្នាការផ្សេង​ ឥឡូវចូលមកធ្វើប្រេសិតរបស់ខ្ញុំ, ខ្ញុំអត់បានតែងតាំងគាត់ជារដ្ឋមន្ត្រី ក្នុងជួររដ្ឋាភិបាលទេ តែជាប្រេសិតមួយដែលមានទម្ងន់អាចទៅធ្វើការបាននៅក្រៅប្រទេស។ មួយវិញទៀតគាត់ចង់ជួយយើងនៅក្នុងការវិនិយោគ បូកជាមួយរឿងព្រំដែន អាហ្នឹងគឺបញ្ជាក់ឲ្យដឹងតែម្ដង កុំឲ្យមិនដឹងថា ប្រេសិតពិសេសធ្វើអី? ហើយគាត់មានទំនាក់ទំនងច្រើន​ ចឹងយកទំនាក់ទំនងគាត់ដើម្បីធ្វើការជួយប្រទេសជាតិ ល្អជាងមានទំនាក់ទំនងទៅអង្គុយជេរឥតប្រយោជន៍។ នេះហើយជាអ្វីដែលគេហៅថា សន្ទនាវប្បធម៌ និងវប្បធម៌សន្ទនា។ នេះហើយជាការបង្រួបបង្រួមជាតិនោះ»។

សូមជម្រាបថា ការតែងតាំងលោកស្រី កឹម មនោវិទ្យានេះ បានធ្វើឡើងបន្ទាប់ពី លោក កឹម សុខា (មេដឹកនាំអតីតគណបក្សសង្គ្រោះជាតិ) បាននាំកូនស្រីច្បងរបស់លោកគឺលោកស្រី កឹម មនោវិទ្យា ចូលជួបសម្តែងការគួរសម និងពិភាក្សាជាមួយ សម្ដេច​តេជោ ហ៊ុន សែន ប្រធានព្រឹទ្ធសភាកម្ពុជា និងសម្ដេច​ធិបតី ហ៊ុន ម៉ាណែត កាលពីថ្ងៃទី១៦ ខែសីហា ឆ្នាំ២០២៦៕