ស្រូវកសិករខេត្តកំពង់ស្ពឺជាង ៤ម៉ឺនហិកតាត្រូវបានសង្គ្រោះ ខណៈជាងមួយម៉ឺនហិកតា​ផ្សេងទៀត​កំពុងស្ថិតក្នុងការអន្តរាគមន៍

កំពង់ស្ពឺ៖ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ស្ពឺ លោក យឹម ណន បាន​ឲ្យ​ដឹង​ថា គិតត្រឹមថ្ងៃទី៣ ខែកញ្ញា ឆ្នាំ២០២៦នេះ ស្រូវកសិករប្រមាណជាង ៤ម៉ឺន​ហិកតា​ដែល​ខ្វះ​ទឹក​ បង្កឡើងពីឥទ្ធិពលបាតុភូត El Niño ត្រូវបានជួយសង្គ្រោះ ខណៈនៅចំនួនជាង ១ម៉ឺន​ហិក​តា​ទៀត​ កំពុងជួយអន្តរាគមន៍នាំទៅសង្គ្រោះបន្ថែម ។

លោក យឹម ណន ឱ្យដឹងថា កូនរដូវប្រាំង និងបាតុភូតEl Niño  បានបង្កជា​ផលប៉ះ​ពាល់​ដល់​ដំណាំ​ស្រូវ​ពលរដ្ឋចំនួន ៨ក្រុងស្រុក ក្នុងខេត្តកំពង់ស្ពឺ ដោយស្មើនឹងទំហំផ្ទៃដីស្រែចំនួនជិត ៦​ម៉ឺន​ហិកតា។ ប៉ុន្តែក្រោមការណែនាំរបស់អភិបាលខេត្តកំពង់ស្ពឺឯកឧត្តមបណ្ឌិត ជាម ចន្ទ័សោភ័ណ មន្ទីរកសិកម្ម និងមន្ទីរធនធានទឹក និងឧតុនិយមខេត្ត បានសហការ​នាំ​ទឹក​ពី​ទំនប់​អាង​ទឹក​រលាំង​ជ្រៃ​ខាង​ជើង និងខាងត្បូង ស្ទឹងព្រែកត្នោត ស្ទឹងតូច បញ្ជូនទឹកទៅតា​ម​ប្រឡាយ​មេ​ និង​ប្រឡាយ​ជើង​ក្អែបនៃស្រែគោលដៅ ។

លោកបានបន្ថែមថា រួមជាមួយភ្លៀងធ្លាក់ជាប់គ្នាប៉ុន្មានថ្ងៃចុងក្រោយនេះ បានធ្វើឱ្យ​ស្រូវ​របស់​ប្រជា​ពលរដ្ឋក្នុងស្រុក-ក្រុងចំនួន៥ ក្នុងនោះស្រុកបសេដ្ឋចំនួនជាង ៤៥០០ហិកតា, ក្រុង​ច្បារ​មន​ចំនួន​ជិត ​១ពាន់ហិកតា, ស្រុកគងពិសីចំនួនជាង៧ ៣០០ហិកតា, ស្រុកឱរ៉ាល់ចំនួនជិត ៨​ពាន់​ហិកតា និងស្រុកសំរោងទងចំនួនជាង ២៤ ០០០ហិកតា ត្រូវបានជួយសង្គ្រោះទាន់ពេលវេលា ។

លោក យឹម ណន បានបន្តថា ដោយឡែកស្រុក ក្រុងចំនួន៣ទៀត មានស្រុក​ថ្ពង​ដែ​ល​ប៉ះ​ពាល់​ចំនួន​ជាង ៤ ៤០០ហិកតា, ក្រុងឧដុង្គម៉ែជ័យចំនួន ៥ ២០០ហិកតា និងស្រុកសាមគ្គី​មុនី​ជ័យ​ចំនួន​ ៩ ០០០ហិកតា មន្ទីរជំនាញទាំងពីរបានបញ្ជូនទឹក ដោយរួម​ផ្សំ​ជា​មួយ​ទឹក​ភ្លៀង​បាន​សង្គ្រោះ​ស្រូវ​ ដែលរងផលប៉ះពាល់បានចំនួនជាង ៥ពាន់ហិកតារួចហើយដែរ គឺនៅមួយ​ចំនួន​ទៀត ​គឺមន្ទីរជំនាញនិងអាជ្ញាធរក្រុង-ស្រុក កំពុងទាញទឹកចេញពីស្ទឹងក្រាំងពន្លៃ និង​ពី​ប្រភព​ទឹក​ផ្សេង​ទៀត​ដើម្បីនាំទៅសង្គ្រោះ។

ជាមួយនោះ លោកប្រធានមន្ទីរ បានគូសបញ្ជាក់ថា ស្ថានភាពស្រូវប្រមាណជាង ១ម៉ឺនហិកតា នៅ​ក្នុង​ស្រុកក្រុងទាំង៣នេះ គឺអាចត្រូលជាមួយអាកាសធាតុរាំងស្ងួតបានពី ១០​ទៅ​២០​ថ្ងៃ​ខាង​មុខ​ទៀត​ ហើយប្រសិនជាមានភ្លៀងធ្លាក់ ឬទឹកអាចបញ្ជូនទៅដល់ក្នុងរយៈពេលប៉ុន្មាននេះ ស្រូវ​ដែល​រង​ផលប៉ះពាល់ទាំងនោះ នឹងអាចសង្គ្រោះបានទាំងស្រុងមកវិញ៕ អត្ថបទ បាន សុខរិទ្ធិ