អគ្គិភ័យមួយផ្សេងទៀត បានឆាបឆេះនៅសាលារៀន ប្រទេសកេនយ៉ា

នគរបាលបាននិយាយថា អគ្គិភ័យបានបំផ្លាញអន្តេវាសិកដ្ឋាននៅសាលារៀនក្នុងប្រទេសកេនយ៉ា កាលពីថ្ងៃអាទិត្យ ទី៨ ខែកញ្ញា ដែលឧបទ្ទវហេតុបែបនេះបានកើតឡើងជាលើកទី៣ ក្នុងរយៈពេលទើបតែប៉ុន្មានថ្ងៃប៉ុណ្ណោះ។

សេចក្តីថ្លែងការណ៍របស់នគរបាល បាននិយាយថា អគារស្នាក់នៅមួយកន្លែង នៅវិទ្យាល័យ ជែរប៊យ(Njia Boys) ក្នុងតំបន់ Meru ភាគកណ្តាល បានឆាបឆេះ ខណៈសិស្សកំពុងទទួលទានអាហារពេលយប់ ប៉ុន្តែពុំមានការរាយការណ៍ពីអ្នកស្លាប់ ឬរងរបួស នោះទេ។

អគារនេះ ផ្តល់កន្លែងស្នាក់នៅដល់សិស្សប្រមាណ ១៥០ នាក់ បានឆេះបំផ្លាញទាំងស្រុង ហើយទ្រព្យសម្បត្តិដែលតម្លៃពុំត្រូវបានដឹងនៅឡើយ ត្រូវបានបំផ្លាញ។

កាលពីថ្ងៃព្រហស្បតិ៍កន្លងទៅ ក្មេងប្រុស២១នាក់ បានស្លាប់នៅពេលអណ្តាតភ្លើងបានឆាបឆេះអន្តេវាសិកដ្ឋានក្នុងសាលារៀនមួយ ក្នុងតំបន់ Nyeri ខណៈពួកគេកំពុងដេកលង់លក់។ ហើយកាលពីថ្ងៃសៅរ៍ អគ្គិភ័យមួយផ្សេងទៀតបានឆាបឆេះនៅវិទ្យាល័យរបស់ក្មេងស្រីមួយកន្លែងទៀត ក្នុងតំបន់ Isiolo ស្ថិតនៅភាគកណ្តាលប្រទេស។

មន្ត្រីតំបន់ម្នាក់ និយាយថា មានអ្នករងរបួសជាច្រើននាក់ ប៉ុន្តែនគរបាល និយាយថា គ្មាននរណាម្នាក់រងរបួសនោះទេ។

ការកើតមានអគ្គិភ័យច្រើនកន្លែងកាលពីសប្តាហ៍មុន បានធ្វើឱ្យមានការចាប់អារម្មណ៍លើសុវត្ថិភាពនៅតាមសាលារៀន ក្នុងប្រទេសកេនយ៉ា ដោយប្រធានាធិបតី លោក William Ruto បានប្តេជ្ញាថា នឹងនាំអ្នកទទួលខុសត្រូវ ទៅកាន់តុលាការ។