សហគ្រិនខ្មែររៀបចំ “ទិវាកសាងបណ្តាញប្រព័ន្ធអេកូឡូស៊ី” ដើម្បីពង្រឹងទំនាក់ទំនង និងការគាំទ្រ​អាជីវកម្មក្នុងស្រុក

ភ្នំពេញ៖ សហគ្រិនខ្មែរ នៅរសៀលថ្ងៃទី៩ កញ្ញា ឆ្នាំ២០២៤ បានរៀបចំ “ទិវា​កសាង​បណ្តាញ​ប្រព័ន្ធ​អេកូឡូស៊ី” លើកទី២ របស់ខ្លួន ក្រោមអធិបតីភាព ឯកឧត្តម ហែម វណ្ណឌី រដ្ឋមន្ត្រី​ក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធានក្រុមប្រឹក្សាបរធនបាល នៃ​សហ​គ្រិន​ខ្មែរ។ ទិវានេះ ផ្តល់ជាវេទិកាដ៏សំខាន់មួយ ដែលប្រមូលផ្តុំភាគីពាក់ព័ន្ធឱ្យមកជួបជុំគ្នា ចែក​រំលែក​ការ​យល់ដឹង និងសហកាគ្នា ដើម្បីលើកកម្ពស់ប្រព័ន្ធអេកូឡូស៊ីធុរកិច្ចរបស់កម្ពុជា។

នៅក្នុងអង្គវេទិកានេះ ឯកឧត្តមរដ្ឋមន្រ្តី ហែម វណ្ណឌី បានមានប្រសាសន៍ថា “សហគ្រិនខ្មែរ ដើរ​តួនាទី​ជា​កាតាលីករដ៏សំខាន់ក្នុងការអភិវឌ្ឍប្រព័ន្ធអេកូឡូស៊ីសហគ្រិនភាពនៅកម្ពុជា តាមរយៈ​ពង្រឹង​ទំនាក់ទំនងធុរកិច្ច និងសម្របសម្រួលកិច្ចខិតខំប្រឹងប្រែងរបស់ភាគីពាក់ព័ន្ធ ឱ្យស្របតាម​យុទ្ធសាស្ត្រ​របស់រាជរដ្ឋាភិបាល។ ឯកឧត្តមបានបន្តថា តួនាទីស្នូលមួយរបស់សហគ្រិនខ្មែរ គឺ​បង្កើន​ប្រសិទ្ធភាពធនធាន និងការផ្សាភ្ជាប់អាជីវកម្មក្នុងស្រុកទៅកាន់ឱកាសផ្សេងៗ ដូចជាការ​ទទួល​បា​​នវិញ្ញាបនបត្រកម្ម ការចាប់យកស្តង់ដារ និងឱកាសចូលទៅកាន់ទីផ្សារ ដើម្បីធានាថា អាជីវកម្មក្នុងស្រុកអាចរីកចម្រើន ទាំងនៅទីផ្សារក្នុងស្រុក និងទីផ្សារអន្តរជាតិ។”

ទិវាកសាង​បណ្តាញ​ប្រព័ន្ធអេកូឡូស៊ីលើកទី២នេះ រួមមានការបង្ហាញលម្អិត​អំពី​សមិទ្ធ​ផល​សំខាន់​ៗ ​រយៈពេល៤ឆ្នាំ របស់សហគ្រិនខ្មែរ ការបង្ហាញគំនិតផ្តួចផ្តើមថ្មីៗ និងកិច្ចខិតខំ​ប្រឹង​ប្រែង​រួម​តាម​រយៈ​ការ​ចេញផ្សាយសៀវភៅប្រចាំឆ្នាំរបស់ខ្លួន។ លើសពីនេះ កម្មវិធីក៏បានរៀបចំ​ឱ្យ​មាន​កិច្ច​សន្ទនា រវាងតំណាងក្រសួង-ស្ថាប័ន ស្ថានទូត ដៃគូអភិវឌ្ឍន៍ សមាគមធុរកិច្ច និងភាគី​ពាក់​ព័ន្ធ​ផ្សេង​ៗ ដោយផ្តោតលើការពង្រឹងភាពជាដៃគូ ដើម្បីគាំទ្រដល់សហគ្រិនក្នុងស្រុកផងដែរ។

គិតមក​ដល់​ពេលនេះ សហគ្រិនខ្មែរ បានផ្តល់ការគាំទ្រដល់អ្នកទទួលផលប្រមាណ ៥៧,០០០​នាក់ និងបានផ្តល់ហិរញ្ញប្បទានដល់សហគ្រិនចំនួន ៧៦០នាក់ នៅទូទាំងប្រទេស។ ក្នុង​នាម​ជា​អង្គភាព​បរធនបាលរបស់រដ្ឋាភិបាល សហគ្រិនខ្មែរ បាននិងកំពុងអនុវត្តកម្មវិធី និងសហកា​រ​ដោយ​ផ្ទាល់ជាមួយដៃគូ និងអ្នកទទួលផល៕ អត្ថបទ៖ ឈិត បូរ៉ាវី