អឺរ៉ុបសម្លឹងមើលជម្រើសដើម្បីផ្គាប់ចិត្តលោក Trump ជុំវិញក្ដីបារម្ភនៃការគំរាមដាក់ពន្ធពីអាមេរិក

សហភាពអឺរ៉ុប កំពុងពិចារណាជម្រើសជាច្រើនដើម្បីបំពេញចិត្តលោក Donald Trump ក្នុងតំណែងសេតវិមាន ខណៈប្លុកនេះត្រៀមទប់ទល់សម្រាប់ការបន្តដំឡើងពន្ធរបស់សហរដ្ឋអាមេរិក និងការគំរាមកំហែងពាណិជ្ជកម្មផ្សេងទៀត បូករួមនឹងជំហានដ៏តឹងតែងទៅលើថា តើត្រូវធ្វើបែបណាចំពោះប្រទេសចិន។

លោក Trump បានព្រមានភ្លាមៗមុនទទួលជ័យជម្នះជាប្រធានាធិបតីអាមេរិកថា ប្លុកអឺរ៉ុប ២៧ប្រទេសនេះ នឹងត្រូវ “បង់តម្លៃដ៏ធំ” សម្រាប់ការមិនទិញចូលឱ្យបានគ្រប់គ្រាន់លើការនាំចេញរបស់អាមេរិក។ មន្ត្រីសហភាពអឺរ៉ុបនិយាយថា ទីក្រុងព្រុចសែល ទទួលស្គាល់ថាការគំរាមកំហែងពន្ធ ១០% លើការនាំចូលរបស់អាមេរិកទាំងអស់ និង ៦០% លើទំនិញពីចិន គឺគួរឱ្យជឿជាក់ មិនមែនគ្រាន់តែជាវោហាសាស្ត្រនៃយុទ្ធនាការប៉ុណ្ណោះទេ។

ជម្រើសដើម្បីសម្រុះសម្រួលជាមួយលោក Trump រួមមាន សហភាពអឺរ៉ុប នឹងព្យាយាមទាក់ទងរដ្ឋបាលថ្មីរបស់លោក Trump មុនការឡើងកាន់តំណែងជាផ្លូវការរបស់លោក ហើយកំពុងពិចារណាលើផ្នែកផ្សេងៗនៃកិច្ចសហប្រតិបត្តិការនាពេលអនាគត ដែលអាចនឹងបន្ធូរបន្ថយ ឬក៏ដកចេញការគំរាមកំហែងពន្ធនោះ។

វិស័យមួយដែលអាចធ្វើទៅបានគឺឧស្ម័នធម្មជាតិរាវ (LNG) ដែលអឺរ៉ុបអាចនាំចូលកាន់តែច្រើនពីអាមេរិក ដើម្បីបន្ធូរបន្ថយឱនភាពពាណិជ្ជកម្មដែលរួមរឹតលើលោក Trump។ អ្នកការទូតសហភាពអឺរ៉ុបមួយចំនួនបង្ហើបថា ផ្នែកផ្សេងទៀតនៃកិច្ចសហប្រតិបត្តិការនោះគឺការទប់ទល់នឹងចិន ដែលទំនងជាចំណុចរឹតបន្តឹងរបស់គោលនយោបាយអាមេរិក ទោះបីជាអឺរ៉ុប ចង់ប្រកាន់ខ្ជាប់នូវច្បាប់ពាណិជ្ជកម្មសកល និង “កាត់បន្ថយហានិភ័យ” ប៉ុន្តែ “មិនផ្តាច់ខ្លួន” ពីចិនក៏ដោយ។

តំណែងប្រធានាធិបតីរបស់លោក Trump មានផលប៉ះពាល់សំខាន់ៗផ្សេងទៀតសម្រាប់អឺរ៉ុប ដែលប្រឈមមុខនឹងបញ្ហារយៈពេលវែងនៃមធ្យោបាយផ្តល់ហិរញ្ញប្បទានដល់ការចំណាយសុខុមាលភាពសម្រាប់ប្រជាជនវ័យចំណាស់ក្នុងអំឡុងពេលកំណើនសេដ្ឋកិច្ចតិចតួច៕