ជប៉ុន និងអាមេរិក នឹងបង្កើតផែនការមីស៊ីលក្នុងករណីមានអាសន្ននៅកោះតៃវ៉ាន់

ទីភ្នាក់ងារសារព័ត៌មាន ខ្យូដូ (Kyodo) របស់ជប៉ុន បានរាយការណ៍កាលពីថ្ងៃអាទិត្យ (២៤ វិច្ឆិកា) ថា ប្រទេសជប៉ុន និងសហរដ្ឋអាមេរិក មានគោលបំណងចងក្រងផែនការយោធារួមគ្នាមួយសម្រាប់ភាពអាសន្នដែលអាចកើតមាននៅកោះតៃវ៉ាន់ ដែលរួមមានការដាក់ពង្រាយមីស៊ីល។

សេចក្ដីរាយការណ៍នេះបាននិយាយដោយសម្អាងដល់ប្រភពមិនបញ្ចេញឈ្មោះរបស់អាមេរិក និងជប៉ុនថា នៅក្រោមផែនការដែលរំពឹងថានឹងត្រូវបានអនុវត្តនៅខែក្រោយនេះ ទីក្រុងវ៉ាស៊ីនតោន នឹងដាក់ពង្រាយអង្គភាពមីស៊ីលទៅកាន់ប្រជុំកោះ ណានសៃ (Nansei) នៃខេត្ត កាហ្គោស៊ីម៉ា (Kagoshima) និងខេត្ត អូគីណាវ៉ា (Okinawa) ភាគនិរតីរបស់ប្រទេសជប៉ុន និងទៅកាន់ប្រទេសហ្វីលីពីន។

សារព័ត៌មាន Kyodo បន្តថា កងវរសេនាធំទាហានម៉ារីននៃកងម៉ារីនអាមេរិក ដែលមានប្រព័ន្ធរ៉ូកែតកាំភ្លើងធំចល័តដ៏ទំនើប (HIMARS) និងសព្វាវុធផ្សេងទៀត នឹងត្រូវដាក់ពង្រាយទៅកាន់ប្រជុំកោះ Nansei។

របាយការណ៍បន្ថែមថា អង្គភាពរបស់សហរដ្ឋអាមេរិក ដែលទទួលបន្ទុកលើលំហអាកាស អ៊ីនធើណិត និងរលកអេឡិចត្រូម៉ាញេទិក នឹងត្រូវដាក់នៅក្នុងប្រទេសហ្វីលីពីន។ ក្រសួងការពារជាតិជប៉ុន និងស្ថានទូតនានានៅទីក្រុងតូក្យូរបស់សហរដ្ឋអាមេរិក និងហ្វីលីពីន មិនបានឆ្លើយតបលើសំណើសុំការអត្ថាធិប្បាយជុំវិញរឿងនេះទេ៕