កងកម្លាំងប៉ាគីស្ថាន បើកការវាយឆ្មក់ទាំងកណ្តាលអធ្រាត្រលើអ្នកគាំទ្រលោក Imran Khan

ប្រព័ន្ធផ្សព្វផ្សាយក្នុងស្រុកបាននិយាយថា កងកម្លាំងសន្តិសុខរបស់ប៉ាគីស្ថាន បានបើកការវាយឆ្មក់នៅពាក់កណ្តាលអធ្រាត្រឈានចូលថ្ងៃពុធ (២៧ វិច្ឆិកា) នេះ លើអ្នកគាំទ្រអតីតនាយករដ្ឋមន្ត្រីកំពុងជាប់ពន្ធនាគារ លោក Imran Khan ដែលបានសម្រុកចូលរដ្ឋធានីទាមទារឱ្យមានការដោះលែងលោកកាលពីថ្ងៃអង្គារ ដោយមានការចាប់ខ្លួនរាប់រយនាក់នាក់ នៅក្នុងទិដ្ឋភាពដ៏វឹកវរ។

ក្រុមបាតុកររាប់ពាន់នាក់បានប្រមូលផ្តុំគ្នានៅកណ្តាលទីក្រុងអ៊ីស្លាម៉ាបាដ កាលពីព្រឹកថ្ងៃអង្គារ បន្ទាប់ពីក្បួនរថយន្តដឹកនាំដោយភរិយារបស់លោក Khan បានទម្លុះរបាំងសន្តិសុខជាច្រើនជាន់រហូតដល់ជិតតំបន់ក្រហម ដែលមានការការពារយ៉ាងខ្លាំងក្លារបស់ទីក្រុង។

តំបន់ក្រហម ដែលយាមកាមដោយកងកម្លាំងទាហានយ៉ាងច្រើននោះ មានការិយាល័យ និងអគារសំខាន់ៗរបស់រដ្ឋ រួមទាសភា និងក្រុមបេសកម្មបរទេសផងដែរ។ យ៉ាងហោចណាស់មនុស្ស ៦នាក់ រួមទាំងទាហានប៉ារ៉ាចំនួន ៤នាក់ត្រូវបានសម្លាប់ មុនពេលការវាយឆ្មក់នៅយប់ថ្ងៃអង្គារ បានចាប់ផ្តើម។

ទូរទស្សន៍ក្នុងស្រុក Geo News និង ARY បានរាយការណ៍ថា ការវាយឆ្មក់ដ៏ធំមួយត្រូវបានបើកដោយកងកម្លាំងសន្តិសុខ លើកណ្តាលទីក្រុងអ៊ីស្លាម៉ាបាដ ជាទីដែលភ្លើងបំភ្លឺផ្លូវត្រូវបានបិទ ហើយឧស្ម័នបង្ហូរទឹកភ្នែកត្រូវបានបាញ់លើហ្វូងបាតុករ ខណៈការប្រមូលផ្តុំតវ៉ាត្រូវបានរំសាយស្ទើរតែទាំងស្រុងហើយ៕