ផ្ទុះការតវ៉ានៅកូរ៉េខាងត្បូងជុំវិញបទបញ្ជាច្បាប់អាជ្ញាសឹករយៈពេលខ្លី ទោះត្រូវបានដកចេញរួចក៏ដោយ

លោកប្រធានាធិបតីកូរ៉េខាងត្បូង Yoon Suk Yeol កំពុងប្រឈមនឹងការខឹងសម្បារ និងការប្រឆាំង បន្ទាប់ពីការសម្រេចចិត្តរបស់លោកក្នុងការដាក់ចេញច្បាប់អាជ្ញាសឹក ជាបទបញ្ជាដែលប៉ុន្មានម៉ោងក្រោយមករូបលោកបានប្រកាសពីការដកចេញវិញ។

ប្រជាបាតុករនៅតាមដងផ្លូវនានានៅព្រឹកថ្ងៃពុធ ទី៤ ខែធ្នូសប្ដាហ៍នេះ អំពាវនាវឲ្យលោកលាលែងពីតំណែង ខណៈសមាជិកសំខាន់ៗក្នុងក្រុមរបស់ប្រធានាធិបតីរូបនេះបានស្នើឲ្យបញ្ចប់ការប្រមូលផ្ដុំទ្រង់ទ្រាយធំ។

អ្នកតវ៉ាមកពីក្រុមសហជីពកម្មករដ៏ធំបំផុតរបស់ប្រទេសកូរ៉េខាងត្បូង បានប្រមូលផ្តុំគ្នានៅទីក្រុងសេអ៊ូលនៅថ្ងៃពុធទី៤ធ្នូនេះ បន្ទាប់ពីលោកប្រធានាធិបតី Yoon Suk Yeol បានប្រកាសដកចេញច្បាប់អាជ្ញាសឹកដែលរូបបានដាក់កាលពីប៉ុន្មានម៉ោងមុន។

ក្រុមបាតុករមកពីសហព័ន្ធសហជីពកូរ៉េ បានប្រកាសធ្វើូដកម្មមិនកំណត់រហូតដល់លោក Yoon លាលែងពីតំណែង។

ការសម្រេចចិត្តដ៏គួរឱ្យភ្ញាក់ផ្អើលរបស់លោកកាលពីយប់ថ្ងៃអង្គារក្នុងការអនុវត្តន៍ច្បាប់អាជ្ញាសឹក ជាលើកដំបូងសម្រាប់កូរ៉េខាងត្បូងក្នុងរយៈពេលជាង ៤ ទសវត្សរ៍ បានធ្វើឱ្យមនុស្សគ្រប់គ្នាភ្ញាក់ផ្អើល រួមទាំងអ្នកនយោបាយ និងសម្ព័ន្ធមិត្តជិតស្និទ្ធបំផុតរបស់ប្រទេសនេះនៅជុំវិញពិភពលោក។

មុននេះលោក Yoon បាននិយាយថា គណបក្សប្រឆាំងបានចាប់សភាធ្វើជាចំណាប់ខ្មាំង ដោយបន្ថែមថាមានភាពចាំបាច់ក្នុងការការពារកូរ៉េខាងត្បូងសេរីនិយមពីការគំរាមកំហែងបង្កឡើងដោយកងកម្លាំងកុម្មុយនិស្តកូរ៉េខាងជើង៕