ក្រុមហ៊ុនផ្គត់ផ្គង់ទឹកស្អាតអូរស្មាច់ ដាក់ទុយោតភ្ជាប់បណ្តាញទឹកស្អាតបន្ថែមជូនពលរដ្ឋ ប្រើប្រាស់ឲ្យបានគ្រប់គ្រាន់ ក្នុងសង្កាត់អូរស្មាច់

នៅព្រឹកថ្ងៃទី២១ ខែតុលា ឆ្នាំ២០២៤នេះ ក្រុមការងារក្រុមហ៊ុនផ្គត់ផ្គង់ទឹកស្អាតអូរស្មាច់ ស្ថិតនៅក្នុងសង្កាត់អូរស្មាច់ ក្រុងសំរោង ខេត្តឧត្តរមានជ័យ បានពង្រីកដាក់ទុយោតភ្ជាប់​សេវាបណ្តាញទឹកស្អាតបន្ថែមទៀត ជូនដល់ប្រជាពលរដ្ឋក្នុងសង្កាត់អូរស្មាច់ បានប្រើប្រាស់គ្រប់គ្រាន់ក្នុងមូលដ្ឋាន កុំឲ្យមានការខ្វះខាត ចាប់ពីសង្កាត់អូរស្មាច់ ដល់ចំណុចភូមិអូរពក។

តាមការបញ្ជាក់ឲ្យដឹងពីលោក អ៊ុក ប៊ុនហេង ចៅសង្កាត់អូរស្មាច់ បានឲ្យដឹងថា ការតភ្ជាប់សេវាបណ្តាញទុយោទឹកស្អាតនេះ គឺដោយសារកន្លងមក ទាំងរដូវប្រាំង និងវស្សា​ប្រជាពលរដ្ឋ រស់នៅសង្កាត់អូរស្មាច់ តែងតែប្រឈម និងការខ្វះខាតប្រភពទឹកស្អាត​ប្រើប្រាស់ មិនបានគ្រប់គ្រាន់ ទៅតាមតម្រូវការនោះទេ ដោយសារតំបន់នេះជាតំបន់ភ្នំ។

លោក បានបន្តថា មើលឃើញពី​បញ្ហាប្រឈម ដូច្នេះហើយទើបក្រុមហ៊ុន​ផ្គត់ផ្គង់​ទឹកស្អាត​សហការ​ជាមួយស្ថាប័នជំនាញក្នុងខេត្ត ក្នុងការរកប្រភពទឹកបន្ថែម ដើម្បីបានឲ្យប្រជាពលរដ្ឋក្នុងតំបន់នេះ មានទឹកស្អាតបានប្រើប្រាស់គ្រប់គ្រាន់ ទាំងរដូវប្រាំង និងរដូវវស្សា កុំឲ្យមានការខ្វះខាតប្រភពទឹកនៅថ្ងៃខាងមុខបន្តទៀត ៕