ឥណ្ឌូនេស៊ី មិនទទួលស្គាល់ការអះអាងសិទ្ធិរបស់ចិននៅសមុទ្រចិនខាងត្បូងទេ ទោះមានកិច្ចព្រមព្រៀងក៏ដោយ

ប្រទេសឥណ្ឌូនេស៊ីបាននិយាយកាលពីថ្ងៃចន្ទថា ខ្លួនមិនទទួលស្គាល់ការអះអាងសិទ្ធិរបស់ចិនជុំវិញសមុទ្រចិនខាងត្បូងទេ ទោះបីបានចុះហត្ថលេខាលើកិច្ចព្រមព្រៀងអភិវឌ្ឍន៍ដែនសមុទ្រជាមួយទីក្រុងប៉េកាំងក៏ដោយ ខណៈក្រុមអ្នកវិភាគមួយចំនួនបានព្រមានថា សន្ធិសញ្ញានេះប្រឈមនឹងការរំលោភលើសិទ្ធិអធិបតេយ្យភាពរបស់ខ្លួន។

ទីក្រុងប៉េកាំងបានប៉ះទង្គិចគ្នាជាយូរមកហើយជាមួយបណ្ដាប្រទេសជិតខាងអាស៊ីអាគ្នេយ៍ជុំវិញសមុទ្រចិនខាងត្បូង ដែលខ្លួនអះអាងសិទ្ធិស្ទើរតែទាំងស្រុងដោយផ្អែកលើបន្ទាត់ចំនួន៩ចំណុច នៅលើផែនទីរបស់ខ្លួនដែលកាត់ចូលទៅក្នុងតំបន់សេដ្ឋកិច្ចផ្តាច់មុខ (EEZ) នៃប្រទេសមួយចំនួន។

កិច្ចព្រមព្រៀងរួមជាមួយប្រទេសចិនក្នុងផ្លូវទឹកជាយុទ្ធសាស្ត្រមានភាពរសើបខ្លាំងអស់ជាច្រើនឆ្នាំ ដោយប្រទេសមួយចំនួនមានការប្រុងប្រយ័ត្នចំពោះកិច្ចព្រមព្រៀងដែលពួកគេបារម្ភថាអាចត្រូវបានបកស្រាយថាជាការធ្វើឱ្យស្របច្បាប់នូវការអះអាងសិទ្ធិដ៏ធំរបស់ទីក្រុងប៉េកាំង។

កាលពីឆ្នាំ ២០១៦ តុលាការមជ្ឈត្តកម្មមួយបាននិយាយថាការអះអាងសិទ្ធិរបស់ចិនដោយផ្អែកលើផែនទីចាស់របស់ខ្លួន មិនមានមូលដ្ឋាននៅក្នុងច្បាប់អន្តរជាតិ ជាសេចក្ដីសម្រេចដែលចិនបដិសេធមិនទទួលស្គាល់។

សេចក្តីថ្លែងការណ៍រួមដែលបានចេញផ្សាយកាលពីចុងសប្តាហ៍ក្នុងអំឡុងពេលដំណើរទស្សនកិច្ចរបស់ប្រធានាធិបតីឥណ្ឌូនេស៊ីលោក Prabowo Subianto ទៅកាន់ទីក្រុងប៉េកាំង បានលើកឡើងថាប្រទេសទាំងពីរបានឈានដល់ការយោគយល់គ្នាដ៏សំខាន់ស្តីពីការអភិវឌ្ឍន៍រួមគ្នានៅក្នុងតំបន់នៃការអះអាងសិទ្ធិត្រួតស៊ីគ្នា។

ប្រទេសចិន បានបង្ហាញឆន្ទៈធ្វើការជាមួយឥណ្ឌូនេស៊ី ជុំវិញជម្លោះនៅសមុទ្រចិនខាងត្បូង ស្របពេលមានភាពតានតឹងជាមួយហ្វីលីពីន៕