ខែវិច្ឆិកានេះ មន្រ្តីខិតខំចុះផ្សព្វផ្សាយគោលនយោបាយភូមិ-ឃុំ-សង្កាត់​ មានសុវត្ថិភាព​ដល់ពលរដ្ឋជាង ៦០ម៉ឺននាក់

គិតចាប់ពីថ្ងៃទី១ រហូតដល់ថ្ងៃទី២៦ ខែវិច្ឆិកា ឆ្នាំ២០២៤ នេះ មន្រ្តីរាជការស៊ីវិល និង​កង​កម្លាំង​នគរបាល​ជាតិ តាមមូលដ្ឋានទូទាំងប្រទេស បានបន្តផ្សព្វផ្សាយ គោលនយោបាយភូមិ-ឃុំ-សង្កាត់​មាន​សុវត្ថិភាព ចំនួន១១,៣៥២លើក ដោយមានប្រជាពលរដ្ឋ​ចូលរួម​ស្វែង​យល់​ចំនួន​៦៣៧,៩២៨នាក់។ នេះបើតាមអ្នកនាំពាក្យរងក្រសួងមហាផ្ទៃ លោកបណ្ឌិត ទូច សុឃៈ។

បើតាមអ្នកនាំពាក្យរងដដែល សកម្មភាពនៃការផ្សព្វផ្សាយនោះ បាន​ធ្វើ​ឡើងយ៉ា​ង​សកម្ម​នៅ​តាម​វេទិកា​សាធារណៈ សាលារៀន វត្តអារាម តាមខ្នងផ្ទះ និងទីសាធារណៈនានា ដើម្បីឱ្យប្រជាពលរដ្ឋ​យល់​ដឹង​ជ្រួត​ជ្រាប និងរួមសហការជាមួយអាជ្ញាធរ ក្នុងកិច្ចការពារ​សុខ​សុវត្ថិភាព​នៅ​តាម​មូល​ដ្ឋាន​ ស្របតាមយុទ្ធសាស្រ្តបញ្ចកោណរបស់រាជរដ្ឋាភិបាលក្រោមការដឹកនាំរបស់សម្ដេចធិបតី ហ៊ុន ម៉ាណែត។

លោកបណ្ឌិត ទូច សុឃៈ បានបន្ថែមថា ក្នុងនាម​ជា​សេនាធិការ​ជូន​រាជ​រដ្ឋាភិបាល​លើ​វិស័យ​សន្តិសុខ​ សណ្ដាប់ធ្នាប់សាធារណៈ សុវត្ថិភាពសង្គម និងកិច្ចការរដ្ឋបាលមូលដ្ឋាន ឯកឧត្តម​អភិសន្តិ​បណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ តែងតែបានជំរុញ តម្រង់ទិស តាម​ដាន និងវាយតម្លៃយ៉ាងសកម្ម ដើម្បីធានា​គុណភាព​នៃ​ការងារ​ផ្សព្វ​ផ្សាយ​គោល​នយោបាយ​ភូមិ-ឃុំ​សង្កាត់​មានសុវត្ថិភាព។

សូមបញ្ជាក់ថា គោលនយោបាយ ភូមិ-ឃុំ-សង្កាត់ មានសុវត្ថិភាព មានលក្ខណៈសម្បត្តិ ៧យ៉ាង រួមមាន ១.ផ្តល់សេវាសាធារណៈជាពិសេសសេវារដ្ឋបាលប្រកបដោយគុណភាព តម្លាភាព និង​ទទួល​បានជំនឿចិត្ត ២.គ្មានបទល្មើស លួច ឆក់ ប្លន់ គ្រឿងញៀន ល្បែងស៊ីសងខុសច្បាប់ និង​បទ​ល្មើស​គ្រប់ប្រភេទ ៣.មានសណ្តាប់ធ្នាប់សាធារណៈល្អ ជាពិសេសគ្មានគ្រោះថ្នាក់ចរាចរណ៍ ៤.គ្មាន​អំពើអនាចារ គ្មានការជួញដូរមនុស្សពិសេសស្ត្រី និងកុមារ ប្រកបដោយគុណភាព និង​ប្រសិទ្ធ​ភាព ៥.ដោះស្រាយវិវាទនៅតាមមូលដ្ឋានក្រៅប្រព័ន្ធតុលាការ ប្រកបដោយគុណភាព និង​ប្រសិទ្ធភាព ៦.មានអនាម័យ មានសោភ័ណភាពល្អ និងមានបរិស្ថានល្អ និង​៧.​ឆ្លើយ​តប​បាន​ទាន់​ពេល​វេលា​ចំពោះគ្រោះមហន្តរាយ និងរាល់ជំងឺឆ្លង​រាត​ត្បាត​កាច​សាហាវ​ប្រកប​ដោយ​ប្រសិទ្ធភាព​៕