អតីតយុទ្ធជនអរគុណរាជរដ្ឋាភិបាលខិតខំថែរក្សាសមទ្ធិផលនានាកើតចេញពីថ្ងៃកំណើតរណសិរ្យ២ធ្នូ

នៅថៃ្ងទី២ ខែធ្នូ ឆ្នាំ២០២៤ គឺជាថ្ងៃគម្រប់ខួប៤៦ឆ្នាំគត់ នៃថ្ងៃកំណើតរណសិរ្ស​សាមគ្គី​សង្គ្រោះ​ជាតិ​កម្ពុជា ឆ្នាំ១៩៧៨ ឆ្នាំ២០២៤ ដែលបច្ចុប្បន្នត្រូវបានប្តូរឈ្មោះថា ក្រុមប្រឹក្សាជាតិ​រណសិរ្ស​សាមគ្គី​អភិវឌ្ឍន៍​មាតុភូមិកម្ពុជា។ តាមរយៈថ្ងៃនេះដែរ បណ្តាអតីតយុទ្ធជនតាមមូលដ្ឋាន បាន​អរគុណ​ប្រមុខថ្នាក់ដឹកនាំរាជរដ្ឋាភិបាលកម្ពុជា បច្ចុប្បន្ន​ដែល​បាន​ខិតខំ​ថែ​រក្សា​ការពារ​សមទ្ធិផល​សន្តិភាព ដែលផ្តើមចេញពីថ្ងៃកំណើតរណសិរ្យ២ ធ្នូនេះ។

បណ្តាអតីតយុទ្ធជនតាមមូលដ្ឋាន ដែលធ្លាប់បាន​ឡើង​សមរភូមិ​ប្រយុទ្ធ​ក្នុង​បុព្វហេតុ​ស្វែង​រក​សុខ​សន្តិភាព​ជូន​ប្រទេសជាតិ បានថ្លែងប្រាប់BTV នៅថ្ងៃទី២ ខែធ្ននេះថា ជារួមមានថ្ងៃកំណើត​រណសិរ្ស​សាមគ្គី​សង្គ្រោះជាតិកម្ពុជា ២ ធ្នូ ឆ្នាំ១៩៧៨ ទើបមានថ្ងៃ៧ មករា ១៩៧៩ និងមាន​សុខ​សន្តិភាព ការអភិវឌ្ឍ រីកចម្រើនដូចសព្វថ្ងៃនេះ។

បណ្តាអតីតទាហានចូលនិវត្តន៍ ក៏បានរំលឹកថា កំណើតរណសិរ្សសាមគ្គីសង្គ្រោះជាតិកម្ពុជា ២ ធ្នូ គឺជា​ថ្ងៃដែលខ្មែរបានសាមគ្គី ប្រមូលផ្តុំរួមគ្នាក្រោមការដឹកនាំរបស់សម្តេច ជា ស៊ីម សម្តេច ហេង សំរិន និងសម្តេច ហ៊ុន សែន ក្រោកឡើងធ្វើការផ្តួលរំលំរបបបនប្រល័យពូជសាសន៍ ប៉ុល ពត ដែល​ក្នុងអំឡុងពេលនោះ គឺមានយុទ្ធមិត្តជាច្រើនបានស្លាប់ ពលី និងខ្លះមាន​ពិការ​ភាព​រហូត​មក​ដល់​សព្វ​ថ្ងៃ​នេះ ហើយអតីតយុទ្ធជនក៏បានថ្លែងអំណរគុណ ប្រមុខថ្នាក់ដឹកនាំ​រាជ​រដ្ឋាភិបាល​បច្ចុប្បន្ន ដែលបន្តខិតខំថែរក្សាសន្តិភាព មិនឲ្យសង្គ្រាមកើតឡើងវិញ ការពារសន្តិសុខ សណ្តាប់​ធ្នាប់ និងអភិវឌ្ឍបាននូវសមិទ្ធិផលថ្មីៗយ៉ាងសំបូរបែបជាច្រើន។

សូមបញ្ជាក់ថា ថ្ងៃកំណើតរណសិរ្សសាមគ្គីសង្គ្រោះជាតិកម្ពុជា គឺជា​ថ្ងៃដែល​ខ្មែរ​អ្នក​ស្នេហា​ជាតិ​មួយ​ក្រុម​ បានប្រមូលផ្តុំគ្នានៅស្រុកស្នួល ខេត្តក្រចេះ ដើម្បីដាក់ចេញនូវផែនការរំដោះជាតិ សិទ្ធិ​សេរីភា​ព និងរំដោះអាយុជីវិតប្រជាពលរដ្ឋកម្ពុជារួចផុតពីការកាប់សម្លាប់ ចេញពី​របប​កម្ពុជា​ប្រជាធិប​តេយ្យ ប៉ុល ពត ក្រោមការដឹកនាំរបស់សម្តេច ជា ស៊ីម សម្តេច ហេង សំរិន និងសម្តេច ហ៊ុន សែន ព្រមទាំងឥស្សរជនស្នេហាជាតិជាច្រើនរូបទៀត ហើយការតស៊ូសង្រ្គោះជាតិមាតុភូមិ និង​ប្រជាជនកម្ពុជាឲ្យចាកផុតពីគ្រោះមហន្តរាយ នៃរបបប្រល័យពូជសាសន៍នេះ គឺបាន​ជ័យ​ជន្នះ​ទាំង​ស្រុង​នាថ្ងៃទី ០៧ ខែមករា ឆ្នាំ១៩៧៩៕ អត្ថបទ៖ ស៊ុម សុខជា