អ្នកជំនាញលើកទឹកចិត្តដល់យុវជនចូលរួមថែរក្សា អភិរក្ស និងផ្សព្វផ្សាយល្បែងទាញព្រ័ត្រខ្មែរ

នៅថ្ងៃទី០២ ខែធ្នូ ឆ្នាំ២០២៤នេះ គឺជាថ្ងៃខួប៩ឆ្នាំ ដែលល្បែងទាញ​ព្រ័ត្រខ្មែរ​បាន​ចុះ​ក្នុង​បញ្ជី​បេតិកភណ្ឌ​វប្បធម៌អរូបី​នៃមនុស្សជាតិរបស់អង្គការយូណេស្កូ។ ក្នុងថ្ងៃនេះដែរ អ្នកជំនាញ​បាន​លើក​​ទឹកចិត្តដល់យុវជនចូលរួមថែរក្សា អភិរក្ស និងផ្សព្វផ្សាយ​ល្បែង​មួយ​នេះ​ឲ្យមាន​ភាព​ល្បី​ល្បាយ​បន្ថែមទៀត។

មានប្រសាសន៍ក្នុងកិច្ចសម្ភាសជាមួយBTV នៅថ្ងៃទី០២ ខែធ្នូនេះ លោក ថន ស៊ុយទ្រី សមាជិក​សហគមន៍កំពង់កុង និងជាអ្នកសិក្សាអំពីល្បែងទាញព្រ័ត្រ បានឱ្យដឹងថា កន្លងទៅ និងបច្ចុប្បន្ន សហគមន៍​កំពង់កុង បានចូលរួម​ថែរក្សា​ដើមផ្តៅ​នៅ​ក្នុង​សហគមន៍​ដែល​ជាវត្ថុ​ធាតុ​ដើម​សម្រាប់​ធ្វើ​ព្រ័ត្រ ​និងបានចូលថែរក្សា និងអភិរក្សល្បែងទាញព្រ័ត្រនេះ ពីអ្នកជំនាន់មុន​រហូត​មកដល់​អ្នក​ជំនាន់​ក្រោយ។ លោកបន្តថា តាមការសង្កេត រាជរដ្ឋាភិបាល តាមរយៈក្រសួងវប្បធម៌ និង​វិចិត្រ​សិល្បៈ តែងតែបានយកចិត្តទុកដាក់ថែរក្សា និងអភិរក្សមរតកវប្បធម៌ខ្មែរ ក្នុង​ក៏​មាន​ល្បែង​ាញ​ព្រ័ត្រ​មួយ​ផងដែរ។ យ៉ាងណាក្តី ដើម្បីធានាឱ្យល្បែងទាញ​ព្រ័ត្រ​ឱ្យ​នៅស្ថិ​ត​ស្ថេរ​គង់​វង្ស​ចាំ​បាច់​ត្រូវ​តែ​មានការចូលរួមពីប្រជាពលរដ្ឋ និងជាពិសេសយុវជនជំនាន់ក្រោយ។

គួររម្លឹកដែរថា ល្បែងទាញព្រ័ត្រ ដែលជាល្បែង​ប្រជាប្រិយខ្មែរ​មួយ​ប្រភេ​ទ​មាន​តាំង​ពីដូន​តា​មក​ហើយ​នោះ ត្រូវបានចុះបញ្ចូលជាសម្បត្តិបេតិកភណ្ឌវប្បធមអរូបីនៃមនុស្សជាតិរបស់អង្គយូណេស្កូ ក្នុង​កិច្ចប្រជុំលើកទី១០ នៃគណៈកម្មាធិការអន្តររដ្ឋាភិបាលថែរក្សាបេតិកភណ្ឌវប្បធម៌ ប្រទេស​ណា​មីប៊ី នាថ្ងៃទី២ ខែធ្នូ ឆ្នាំ២០១៥។ ការចុះបញ្ជីល្បែងទាញព្រ័ត្រនេះ ធ្វើឡើងរួមគ្នា​ក្នុង​ប្រទេស​ចំនួ​ន៤រួមមាន៖ប្រទេសកម្ពុជា ហ្វីលីពីន កូរ៉េខាងត្បូង និងប្រទេសវៀតណាម។

គិត​ត្រឹមឆ្នាំ២០២៤នេះ ប្រទេស​កម្ពុជា​មាន​សម្បត្តិ​បេតិក​ភណ្ឌ​អរូបី​ជា​ច្រើន​ត្រូវ​បាន​ចុះ​ក្នុង​បញ្ជី​អង្គការ​យូណេស្កូ ដែលក្នុងនោះរួមមាន៖ របាំព្រះរាជទ្រព្យ ល្ខោនស្រមាលស្បែកធំ ល្បែង​ទាញ​ព្រ័ត្រ ​និងគុនល្បុក្កតោជាដើម៕ អត្ថបទ៖ទូច សោភ័ណ