ប្រជាពលរដ្ឋក្នុងឃុំពោធិសប្បាយចិត្តខ្លាំង ក្រោយពីសម្តេចធិបតី បានឲ្យមន្ត្រីនៃមន្ទីរដែនដី ចុះធ្វើប្លង់កម្មសិទ្ធិដីធ្លីជូនពួកគាត់

ប្រជាពលរដ្ឋដែលរស់នៅក្នុងឃុំពោធិ ស្រុកកំពង់លែង ខេត្តកំពង់ឆ្នាំង នៅថ្ងៃទី០៤ ខែធ្នូ ឆ្នាំ២០២៤នេះ បានសម្ដែងនូវទឹកចិត្តសប្បាយរីករាយ ក្រោយពីឃើញមន្ត្រីនៃមន្ទីរ​ដែនដី​ខេត្ត​កំពង់ឆ្នាំង បានចុះមកធ្វើប្លង់ជាលក្ខណៈប្រព័ន្ធ(ប្លង់រឹង)ជូនពួកគាត់នាពេលនេះ។ ប្រជា​ពលរដ្ឋ​បាន​សំដែងការដឹងគុណចំពោះសម្តេចធិបតី ហ៊ុន ម៉ាណែត នាយករដ្ឋមន្ត្រី ដែលបាន​យក​ចិត្ត​ទុក​ដាក់គិតគូរដល់សុខទុក្ខប្រជាពលរដ្ឋតាមមូលដ្ឋានបែបនេះ។

ប្រជាពលរដ្ឋបានឲ្យដឹងថា កន្លងមកសម្តេចតេជោ ហ៊ុន សែន អតីតនាយករដ្ឋមន្ត្រី បានយក​ចិត្ត​ទុក​​ដាក់​​លើសុខទុក្ខប្រជាពលរដ្ឋនៅគ្រប់ទីកន្លែង ដោយបានជួយដ​ល់​សុខ​ទុក្ខ​ប្រជា​ពលរដ្ឋ​មិន​រើស​អើង​និន្នាការអ្វីឡើយ។ មកដល់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក៏រឹត​តែ​យក​ចិត្ត​ទុកដាក់ដល់សុខទុក្ខប្រជាពលរដ្ឋទ្វេរឡើង។ នៅក្នុងអាណត្តិរបស់សម្តេចធិបតី សម្តេច​បាន​អោយ​ក្រុមការងារមន្ត្រីសូរិយោដីនៃក្រសួង និងមន្ទីរដែនដី នគរូបនីយកម្ម និងសំណង់ ចុះ​វាស់​វែង​ក្បាលដី ជូនប្រជាពលរដ្ឋនៅក្នុងស្រុកកំពង់លែង ខេត្តកំពង់ឆ្នាំង អោយបានលឿន ដើម្បី​បញ្ជៀស និងបញ្ចប់នូវរាល់ទំនាស់នានា និងឲ្យប្រជាពលរដ្ឋទទួលបាននូវសិទ្ធិកាន់កាប់ ប្រើប្រាស់ និ​ង​បែងចែកដីធ្លី ដោយស្របច្បាប់ ។ ដោយឡែកនៅក្នុងឃុំពោធិបានឈានដល់ដំណាក់កាលបិទផ្សាយហើយ ដែលនាំ​អោយ​ពួក​គាត់​រឹត​​តែ​សប្បាយចិត្តឡើងថែមទៀត។

លោក សុខ សម្បត្តិ ប្រធានក្រុមទី១ចុះបញ្ជីដីធ្លីមានលក្ខណៈជាប្រព័ន្ធ នៃមន្ទីររៀបចំដែនដី នគ​រូប​នីយកម្មសំណង់ និងសូរិយោដីខេត្តកំពង់ឆ្នាំង បានថ្លែងថា៖ ដើម្បីបញ្ជៀស និងបញ្ចប់​នូវ​រាល់​ទំនាស់​នានា និងឲ្យប្រជាពលរដ្ឋទទួលបាននូវសិទ្ធិកាន់កាប់ ប្រើប្រាស់ និងបែងចែក​ដីធ្លី​ដោយ​ស្រប​ច្បាប់ កម្លាំងមន្ត្រីនៃមន្ទីរដែនដីខេត្តកំពង់ឆ្នាំង បានចុះមកវាស់វែង និងចេញ​ប័ណ្ណ​ជូន​ប្រជា​ពលរដ្ឋ​នៅ​ក្នុងស្រុកកំពង់លែង មានទាំងអស់៤ក្រុម គឺធ្វើយ៉ាងណា​ពន្លឿន​ការងារ​នេះ​អោយ​ទាន់​តាម​គោលកា​រណ៍សម្តេចធិបតីនាយករដ្ឋមន្ត្រី។ នៅក្នុងឃុំពោធិ ស្រុកកំពង់លែងនេះ បាន​ដំណើរ​ការ​ពី​ទី១ ទី២ និងដល់ការបិទផ្សាយដែលជាដំណាក់កាលទី៣ហើយ ក្រោយការ​បិទ​ផ្សាយ​រួច​ក្រុម​ការងារ​នឹងស្នើសុំចេញប័ណ្ណកម្មសិទ្ធិជាលក្ខណៈប្រព័ន្ធជូនប្រជាពលរដ្ឋតែម្តង ។ នេះ​គឺ​ជា​សមិទ្ធ​ផលថ្មីមួយទៀត បន្ទាប់ពីសមិទ្ធផលនានាជាច្រើនរបស់រាជរដ្ឋាភិបាលកម្ពុជា ដែល​បាន​ខិត​ខំ​ប្រឹង​ប្រែង ក្នុងការកសាងប្លង់សុរិយោដី និងសៀវភៅគោលបញ្ជីដីធ្លីដោយស្របច្បាប់។

ប្រជា​ពលរដ្ឋត្រូវចេះថែរក្សាការពារប័ណ្ណកម្មសិទ្ធិដីនេះកុំឲ្យបាត់បង់ និងត្រូវចេះដាំដុះ បង្ក​បង្កើន​ផល​នៅ​លើដី នោះឲ្យអស់លទ្ធភាព ដើម្បីបង្កើនជីវភាពរស់នៅកាន់តែប្រសើរ ក្នុងការកាត់បន្ថយ​ភាព​ក្រីក្រ ជាមួយរាជរដ្ឋាភិបាលកម្ពុជា ។ រាជរដ្ឋាភិបាលបានចំណាយទាំងថវិកា និង​ធនធាន​មនុស្ស ចុះធ្វើការវាស់វែង និងប្រមូលទិន្នន័យដីធ្លី តាំងពីបទបញ្ជាលេខ០១ ស្របតាម​គោល​នយោបាយ​ចាស់ សកម្មភាពថ្មី ក្នុងគោលបំណងឲ្យប្រជាពលរដ្ឋ យើងទទួលបាននូវសិទ្ធិកាន់កាប់ ប្រើប្រាស់ និងបែងចែកដីធ្លី ដោយស្របច្បាប់គ្រប់គ្នាតែម្តង ៕ កាំង ហុងវាស្នា