សម្តេចតេជោ ហ៊ុន សែន វាយតម្លៃខ្ពស់ចំពោះសមិទ្ធផល១០០ឆ្នាំ ដែលថ្នាក់ដឹកនាំកំពូលចិនរៀបចំនៅក្នុងសាលពិព័រណ៍ប្រវត្តិសាស្រ្ត១០០ឆ្នាំ នៃគណបក្សកុម្មុយនីស្តចិន

ភ្នំពេញ៖ ព្រឹកថ្ងៃទី៤ ខែធ្នូ ឆ្នាំ២០២៤នេះដែរ សម្តេចអគ្គមហាសេនាបតីតេជោ ហ៊ុន សែន ប្រធាន​ព្រឹទ្ធសភា នៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា និងគណៈប្រតិភូ​ជាន់ខ្ពស់​របស់ព្រះរាជាណាចក្រកម្ពុជា អញ្ជើញទស្សនកិច្ចសាលពិព័រណ៍ប្រវត្តិសាស្រ្ត ១០០ឆ្នាំ នៃគណបក្សកុម្មុយនីស្តចិន ក្នុងរដ្ឋធានីប៉េកាំង សាធារណរដ្ឋប្រជាមានិតចិន។ សាលពិព័រណ៍ប្រវត្តិសាស្រ្ត១០០ឆ្នាំ នៃបក្សកុម្មុយនិស្តចិន មានទីតាំងនៅចំនុចប្រសព្វនៃផ្លូវ Beichen East និង Datun North Road ក្នុងសង្កាត់ Chaoyang នៃទីក្រុងប៉េកាំង ប្រទេសចិន ដែលនៅជាប់នឹងស្តាតអូឡាំពិកបៃតង។

សាលពិព័រណ៍នេះត្រូវបានគ្រប់គ្រងដោយនាយកដ្ឋានឃោសនាកណ្តាលនៃបក្សកុម្មុយនិស្តចិន។ គណៈកម្មាធិការមជ្ឈិមនៃបក្សកុម្មុយនិស្តចិន បានសម្រេចចិត្តសាងសង់សាលប្រវត្តិសាស្រ្ត​នេះឡើង ​ដើម្បីបង្ហាញយ៉ាងពេញលេញនូវប្រវត្តិសាស្ត្ររបស់បក្សកុម្មុយនិស្តចិន បន្ទាប់ពី​សមាជជាតិលើកទី១៩ នៃបក្សកុម្មុយនិស្តចិន។ ​គម្រោងសាងសង់បានចាប់ផ្តើមនៅថ្ងៃទី១០ ខែកញ្ញា ឆ្នាំ ២០១៨ ហើយត្រូវបានបញ្ចប់នៅថ្ងៃទី៥ ខែឧសភា ឆ្នាំ ២០២១។

ការសាងសង់សាលពិព័រណ៍ប្រតត្តិសាស្រ្តនេះ ប្រើប្រាស់កម្លាំងកម្មករជិត៥ម៉ឺននាក់។ នៅថ្ងៃទី១៨ ខែមិថុនាឆ្នាំ ២០២១ សារមន្ទីរបានប្រារព្វពិធីបើកជាផ្លូវការ។ នៅថ្ងៃដដែលនោះ មេដឹកនាំបក្ស ឯកឧត្តម Xi Jinping, Li Keqiang, Li Zhanshu, Wang Yang, Wang Huning, Zhao Leji, Han Zheng, Wang Qishan និងមេដឹកនាំគណបក្ស និងរដ្ឋផ្សេងទៀតបានទៅទស្សនាសាលពិព័រណ៍​ប្រវត្តិសាស្រ្តមួយនេះ។

នៅក្នុងឱកាសនៃការអញ្ជើញទស្សនកិច្ចនោះ សម្តេចតេជោ បានវាយតម្លៃខ្ពស់ចំពោះសមិទ្ធផល១០០ឆ្នាំ ដែលថ្នាក់ដឹកនាំកំពូលចិន បានរៀបចំនៅក្នុងសាលពិព័រណ៍នេះ ដែលនេះពិតជាបានរួមចំណែកដ៏ធំធ្វើឲ្យចិនសម្រេចបាន នូវគោលដៅសហសវត្ស ១០០ឆ្នាំទី១របស់ខ្លួន ហើយនឹងបន្តឈានទៅសម្រេចគោលដៅសហសវត្តទី២ ប្រែក្លាយចិនទៅជាប្រទេសសង្គមនិយមទំនើប រុងរឿង ខ្លាំងក្លា ប្រជាធិបតេយ្យ វប្បធម៌ជឿនលឿន និងសុខដុមរមនា នៅឆ្នាំ២០៤៩។

សូមបញ្ជាក់ថា កម្ពុជា និងសាធារណរដ្ឋប្រជាមានិតចិន ត្រូវបានភ្ជាប់ទំនាក់ទំនងការទូតជាមួយគ្នា នៅថ្ងៃទី១៩ ខែកក្កដា ឆ្នាំ១៩៥៨។ នៅថ្ងៃទី៨ ខែមេសា ឆ្នាំ២០០៦ ប្រទេសទាំងពីរកម្ពុជា-ចិន បានតម្លើងទំនាក់ទំនងទ្វេភាគីទៅជាកិច្ចសហប្រតិបត្តិការភាពជាដៃគូគ្រប់ជ្រុងជ្រោយ នៅក្នុងដំណើរបំពេញទស្សនកិច្ចផ្លូវការរបស់ ឯកឧត្តម វ៉េន ជាប៉ាវ នាយករដ្ឋមន្រ្តីចិនមកកាន់កម្ពុជា ពីថ្ងៃទី៧ ទី៨ ខែមេសា ឆ្នាំ២០០៦ នៅកម្ពុជា។ ថ្ងៃទី១៣ ខែធ្នូ ឆ្នាំ២០១០ ប្រទេសទាំងពីរបានដំឡើង​ទៅជាកិច្ចសហប្រតិបត្តិការភាពជាដៃគូយុទ្ធសាស្រ្តគ្រប់ជ្រុងជ្រោយ ​នៅក្នុងដំណើរទស្សនកិច្ច​ផ្លូវការ​របស់សម្តេចអគ្គមហាសេនាបតីតេជោ ហ៊ុន សែន ទៅកាន់រដ្ឋធានីប៉េកាំង ប្រទេសចិន ពីថ្ងៃទី១៣ ដល់ថ្ងៃទី១៧ ខែធ្នូ ឆ្នាំ២០១០។ ថ្ងៃទី២៨ ខែមេសា ឆ្នាំ២០១៩ ប្រទេសទាំងពីរកម្ពុជា-ចិនបាន​ចុះហត្ថលេខាលើផែនការសកម្មភាពដើម្បីបង្កើតសហគមន៍វាសនារួមកម្ពុជាចិន (២០១៩-២០២៣) ក្នុងឱកាសសម្តេចតេជោនាយករដ្ឋមន្រ្តីអញ្ជើញចូលរួមវេទិកាខ្សែក្រវ៉ាត់ និងផ្លូវសម្រាប់​កិច្ច​សហប្រតិបត្តិការ​អន្តរជាតិលើកទី២ ពីថ្ងៃទី២៥ដល់ថ្ងៃទី២៩ ខែមេសា ឆ្នាំ២០១៩ នៅទីក្រុងប៉េកាំង ប្រទេសចិន។ ​ថ្ងៃទី១០ ខែកុម្ភៈឆ្នាំ២០២៣ ក្នុងឱកាសដំណើរទស្សនកិច្ចផ្លូវការ របស់​សម្តេចតេជោ​ នាយករដ្ឋមន្រ្តី នៅប្រទេសចិន ពីថ្ងៃទី៩ ដល់ថ្ងៃទី១១ ខែកុម្ភៈ ឆ្នាំ២០២៣ កម្ពុជានិងចិនបានឯកភាព​បង្កើត ក្របខណ្ឌកិច្ចសហប្រតិបត្តិការត្បូងពេជ្រ ​ដោយមានវិស័យអាទិភាពចំនួន៦រួមមាន ១កិច្ចសហប្រតិបត្តិការនយោបាយ ២គុណភាព ​និងសមត្ថភាពផលិតកម្ម ៣កសិកម្ម ៤ថាមពល ៥សន្តិសុខ និង៦ការផ្លាស់ប្តូរ រវាងប្រជាជន និងប្រជាជន និងច្រករបៀងអភិវឌ្ឍន៍ឧស្សាហកម្ម ដើម្បីសម្រេចចក្ខុវិស័យអភិវឌ្ឍន៍ខេត្តព្រះសីហនុឲ្យទៅជាតំបន់សេដ្ឋកិច្ចពិសេសពហុបំណង និងច្រករបៀងមច្ឆា និងអង្ករដើម្បីឲ្យជាប៉ូលសេដ្ឋកិច្ចទី៤ គ្រប់ដណ្តប់ខេត្តពោធិសាត់ បាត់ដំបង បន្ទាយមានជ័យ និងប៉ៃលិន ដែលសំបូរត្រី ស្រូវ និងទឹក។

ថ្ងៃទី១៥ ខែកញ្ញា ឆ្នាំ២០២៣ កម្ពុជា និងចិន បានចុះហត្ថលេខាលើ ផែនការសកម្មភាព នៃការកសាងសហគមន៍វាសនារួមកម្ពុជា ចិន ក្នុងយុគសម័យថ្មី (២០២៤-២០២៤) ក្នុងឱកាសនៃដំណើរទស្សនកិច្ចជាលើកដំបូងរបស់សម្តេចមហាបវរធិបតីនាយករដ្ឋមន្រ្តី ទៅកាន់ប្រទេសចិន កាលពីថ្ងៃទី១៤ ដល់ថ្ងៃទី១៦ ខែកញ្ញា ឆ្នាំ២០២៣។ ថ្ងៃទី១៩ ខែតុលា ឆ្នាំ២០២៣ ក្នុងឱកាសនៃការអញ្ជើញចូលរួមវេទិកាខ្សែក្រវ៉ាត់ និងផ្លូវលើកទី៣ ​សម្រាប់កិច្ច​សហប្រតិបត្តិការអន្តរជាតិ ​នៅទីក្រុងប៉េកាំង ប្រទេសចិន ពីថ្ងៃទី១៦ ដល់ថ្ងៃទី១៩ ខែតុលា ឆ្នាំ២០២៣ សម្តេចមហាបវរធិបតីនាយករដ្ឋមន្រ្តី បានជួបពិភាក្សាជាមួយថ្នាក់ដឹកនាំចិន ហើយក្នុង​ជំនួបជាមួយឯកឧត្តម ស៊ី ជិនពីង ថ្នាក់ដឹកនាំទាំងពីរបានឯកភាពគ្នា កំណត់យកឆ្នាំ២០២៤ ជាឆ្នាំនៃការផ្លាស់ប្តូរប្រជាជន និងប្រជាជនកម្ពុជា-ចិន។

កម្ពុជា និងចិន បានកំណត់យកឆ្នាំ២០២៣ ជាឆ្នាំមិត្តភាពកម្ពុជា-ចិន ហើយបានរួមគ្នាប្រារព្វពិធីអនអរសាទរជាច្រើន ដើម្បីបង្កើនការយល់គ្នាទៅវិញទៅមក និងមិត្តភាព រវាងប្រទេសទាំងពីរកម្ពុជា ចិន។ ក្នុងឆ្នាំ២០២៣កន្លងទៅនេះ កម្ពុជា ចិន បានសហការគ្នារៀបចំសកម្មភាពដ៏អធឹកអធមជាច្រើន ដើម្បីអបអរសាទរខួបលើកទី៦៥ នៃការបង្កើតទំនាក់ទំនងការទូតរួមទាំងការផ្លាស់ប្តូរលិខិតជូនពររវាងថ្នាក់ដឹកនាំកំពូល និងពិធីជប់លៀងរៀបចំដោយស្ថានទូតនៃប្រទេសទាំងពីររៀងៗខ្លួន៕