មេដឹកនាំកោះតៃវ៉ាន់ កៀងគរការគាំទ្រ និងការរួបរួម ក្នុងដំណើរទៅកោះហ្គាំ របស់សហរដ្ឋអាមេរិក

មេដឹកនាំកោះតៃវ៉ាន់ លោក Lai Ching-te នៅថ្ងៃព្រហស្បតិ៍ (០៥ ធ្នូ) នេះ បានបន្តកិច្ចប្រឹងប្រែងស្វែងរកការគាំទ្ររបស់ខ្លួន ដោយអំពាវនាវឱ្យបណ្ដាប្រទេសប្រជាធិបតេយ្យរួបរួមគ្នាប្រឆាំងនឹងរបបផ្តាច់ការដើម្បីការពារសន្តិភាពនៅក្នុងតំបន់ ក្នុងដំណើរទៅកាន់ទឹកដីសហរដ្ឋអាមេរិកនៃកោះហ្គាំ (Guam) ដែលជាមូលដ្ឋានយោធាដ៏សំខាន់មួយ។

លោក Lai បានទៅដល់កោះ ហ្គាំ កាលពីល្ងាចថ្ងៃពុធ នៅក្នុងអ្វីដែលប្រកាសផ្លូវការថាជាការឈប់សំចតត្រឹមតែមួយយប់ប៉ុណ្ណោះ ជាផ្នែកនៃដំណើរទស្សនកិច្ចទៅប្រទេសកោះប៉ាស៊ីហ្វិកចំនួន៣ ដែលរក្សាទំនាក់ទំនងការទូតផ្លូវការជាមួយកោះតៃវ៉ាន់ ដែលអះអាងសិទ្ធដោយប្រទេសចិន។

ប្រទេសចិន ដែលយោធារបស់ខ្លួនធ្វើប្រតិបត្តិការជុំវិញកោះតៃវ៉ាន់ជាប្រចាំ បានថ្កោលទោសសហរដ្ឋអាមេរិក ចំោះការអនុញ្ញាតឱ្យលោក Lai ឆ្លងកាត់ ដែលរួមបញ្ចូលដំណើររយៈពេលពីរថ្ងៃនៅកោះហាវ៉ៃផងដែរ។ ចិននិយាយថា កោះតៃវ៉ាន់ជាខេត្តមួយរបស់ខ្លួន ហើយគ្មានសិទ្ធិក្នុងការធ្វើទំនាក់ទំនងរដ្ឋនិងរដ្ឋនោះទេ។

សហរដ្ឋអាមេរិក ដូចប្រទេសភាគច្រើនដែរគឺមិនទទួលស្គាល់រដ្ឋាភិបាលកោះតៃវ៉ាន់ជាផ្លូវការទេ ទោះបីជាទីក្រុងវ៉ាស៊ីនតោន ជាអ្នកគាំទ្រអន្តរជាតិដ៏ខ្លាំងក្លាបំផុត និងជាប្រភពអាវុធសំខាន់របស់កោះស្វ័យគ្រប់គ្រងនេះក៏ដោយ៕