ឯកឧត្តម គន់ គីម ចុះសួរសុខទុក្ខអតីតយុទ្ធជន និងពិនិត្យការអភិវឌ្ឍន៍កសាង​ភូមិប៊ុនរ៉ានីសែនជ័យ ដំណាក់ត្រយឹង

នាថ្ងៃទី៥ ខែធ្នូ ឆ្នាំ២០២៤ ឯកឧត្តមនាយឧត្តមសេនីយ៍ កិតិសង្គបណ្ឌិត គន់ គីម ទេសរដ្ឋមន្រ្តី​អនុ​ប្រធាន និងជាអគ្គលេខាធិការសមាគមអតីតយុទ្ធជនកម្ពុជា បានអញ្ជើញ​ជួប​សំណេះ​សំណាល​សួរ​សុខទុក្ខគ្រួសារអតីតយុទ្ធជន ដែលកំពុងរស់នៅក្នុង​ភូមិប៊ុនរ៉ានីសែនជ័យ ដំណាក់​ត្រយឹង​ រួមនិងពិនិត្យលើការងារ អភិវឌ្ឍន៍ កសាង លើគ្រប់វិស័យ ក្នុងភូមិប៊ុនរ៉ានី​សែន​ជ័យ​ដំណាក់​ត្រយឹង ដូចជាហេដ្ឋារចនាសម្ព័ន្ធ សាលារៀន មន្ទីរពេទ្យ វត្តអារាម អណ្តូងទឹក ជាដើម ជា​ពិសេសស្វែងរក បញ្ហាប្រឈមនានា ក្នុងជីវភាពរស់នៅរបស់អតីតយុទ្ធជន ដើម្បី​ពិភាក្សា​រក​ដំណោះ​ស្រាយ​ជូន។ ពិធីសំណេះសំណាលនេះក៏មានការអញ្ជើញចូលរួមពី នាយឧត្តមសេនីយ៍ ជា តារា រដ្ឋមន្ត្រីប្រតិភូអមនាយករដ្ឋមន្ត្រី ទីប្រឹក្សាផ្ទាល់សម្តេចតេជោ នាយករដ្ឋមន្ត្រី ទទួល​បន្ទុក​ជា​សាកលវិទ្យាធិការ សាកលវិទ្យាល័យការពារជាតិ និងឯកឧត្តម ខូយ រីដា អភិបាល​ន​​អភិបាល​ខេត្ត​ ព្រមទាំងមន្ទីរអង្គភាពជាច្រើនរូបផងដែរ។

ក្នុងឱកាសនោះឯកឧត្តមទេសរដ្ឋមន្រ្តី គន់ គីម បានថ្លែងថា ភូមិប៊ុនរ៉ានីសែនជ័យដំណាក់ត្រយឹង គឺ​ជា​ភូមិពិសេស ព្រោះភូមិនេះបង្កើតឡើងសម្រាប់អតីតយុទ្ធជន ក្រោមគំនិតផ្តួចផ្តើមរបស់ ស​ម្ដេច​តេជោ ហ៊ុន សែន អតីតនាយករដ្ឋមន្ត្រី និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលមានការយកចិត្តទុកដាក់យ៉ាងខ្លាំងចំពោះអតីតយុទ្ធជន ដោយ​បានចែកដីសម្បទានសង្គមកិច្ច និងសាងសង់ផ្ទះ ជូនអតីតយុទ្ធជន ហើយ​រហូត​ដល់​រាជ​រដ្ឋាភិបាល អាណត្តិទី៧នេះ សម្ដេចធិបតី ហ៊ុន ម៉ាណែត នាយករដ្ឋមន្ត្រី នៅតែយកចិត្តទុកដាក់​ចំពោះ​អតីត​យុទ្ធជនជារៀងរហូត និងបន្តអភិវឌ្ឍន៍កសាង​ហេដ្ឋា​រចនា​សម័ន្ធ​បន្ថែម​ទៀត​នៅ​ភូមិ​ប៊ុន​រ៉ា​នីសែនជ័យដំណាក់ត្រយឹង។ ហើយភូមិនេះ មានរដ្ឋបាល​ខេត្តពោធិ៍សាត់​ជា​អ្នក​មើល​ការ​ខុស​ត្រូវ​ដោយផ្ទាល់ផងដែរ ។ ជាមួយគ្នានោះឯកឧត្តមទេសរដ្ឋមន្រ្តី បានកោតសរសើរ​ដល់​គ្រួសារ​អតីត​យុទ្ធជនដែលកំពុងរស់នៅក្នុងភូមិប៊ុនរ៉ានីសែនជ័យដំណាក់ត្រយឹង បានធ្វើការដាំដុះ​ដំណាំ​ផ្សេង​ៗ​ សម្រាប់ហូប និងសម្រាប់លក់ ហើយឯកឧត្តមទេសរដ្ឋមន្រ្តី បានជម្រុញឱ្យគ្រប់ផ្ទះ​គ្រួសារ​អតីត​យុទ្ធជនទាំងអស់ត្រូវតែធ្វើការដាំដុះដំណាំបន្ថែមដើម្បីបង្កើនជីវភាព គឺមានផ្ទះមានដី ត្រូវ​តែ​មាន​ដំណាំ។ ឯកឧត្តមទេសរដ្ឋមន្រ្តីបានបន្តថា បច្ចុប្បន្នភូមិប៊ុនរ៉ានីសែនជ័យដំណាក់ត្រយឹង មានគ្រួសារ​អតីតយុទ្ធជនសរុបប្រមាណ៦២៨គ្រួសារ ហើយនៅពេលខាង​មុខ​គ្រោង​នឹង​ពង្រីក​១០០​០​គ្រួសារបន្ថែមទៀត៕ ភិរុណ ពៅ