UN៖ ជនស៊ីវិលរាប់រយនាក់ស្លាប់ និង៣៧០.០០០នាក់ភៀសខ្លួននៅភាគខាងជើងស៊ីរី

ក្រុមមនុស្សធម៌របស់អង្គការសហប្រជាជាតិ បាននិយាយកាលពីថ្ងៃសុក្រថា ជនស៊ីវិលរាប់រយនាក់ ត្រូវបានសម្លាប់ ឬរងរបួស ហើយយ៉ាងហោចណាស់មនុស្ស៣៧០.០០០នាក់ បានភៀសខ្លួនក្នុងរយៈពេលមួយសប្តាហ៍នៃការប្រយុទ្ធគ្នា នៅភាគខាងជើងប្រទេសស៊ីរី។

ការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិ (OCHA) បានព្រមានថា អរិភាពដែលកំពុងកើនឡើងនៅភាគខាងជើង ដែលរីកកាន់តែធំដល់ផ្នែកផ្សេងទៀតរបស់ប្រទេស បង្ហាញពីការគំរាមកំហែងធ្ងន់ធ្ងរដល់សុវត្ថិភាពរបស់ជនស៊ីវិល ហើយការបំផ្លាញហេដ្ឋារចនាសម្ព័ន្ធ បានគំរាមដល់ការដឹកជញ្ជូនជំនួយ។

អង្គការ OCHA បាននិយាយថា ជនស៊ីវិលរាប់រយនាក់ ត្រូវបានប៉ាន់ប្រមាណថា បានស្លាប់ ឬរងរបួសក្នុងមួយសប្តាហ៍កន្លងទៅនេះ ទោះបីជាស្ថានភាពមានភាពបត់បែនក៏ដោយ ហើយតួលេខជនរងគ្រោះពិតប្រាកដនៅពុំទាន់ត្រូវបានបញ្ជាក់ច្បាស់នៅឡើយ។

យោងតាមការិយាល័យ បានឲ្យដឹងថា ាប់ាំងពីការកើនឡើងនៃអរិភាពនៅក្នុងប្រទេសស៊ីរី មនុស្សយ៉ាងហោចណាស់ ៣៧០.០០០នាក់ បានភៀសខ្លួនចេញពីលំនៅឋាន រួមទាំង១០០.០០០នាក់ បានភៀសខ្លួនចេញច្រើនជាងម្តង ហើយពួកគេភាគច្រើនគឺជាស្ត្រី និងកុមារ។

ការិយាល័យបាននិយាយថា ខ្លួនបានទទួលរបាយការណ៍ថាជនស៊ីវិលជាង៣៧០នាក់ត្រូវបានសម្លាប់នៅក្នុងទីក្រុងHama តែមួយ។

អង្គការ OCHA បាននិយាយថា សេវាសាធារណៈ និងកន្លែងសំខាន់ៗនៅទីក្រុងអាឡេប៉ូ ត្រូវបានរំខាន ឬមិនដំណើរការដោយសារតែកង្វះការផ្គត់ផ្គង់ និងបុគ្គលិក ធ្វើឲ្យប៉ះពាល់ធ្ងន់ធ្ងរដល់ប្រព័ន្ធថែទាំសុខភាពក្នុងតំបន់ ដែលនាំទៅដល់ការផ្អាកប្រតិបត្តិការនៅមណ្ឌលសុខភាពសំខាន់ៗនៅទីក្រុងអាឡេប៉ូ និងទីក្រុងអ៊ីដលីប៕