ឯកឧត្តម ហ៊ុន ម៉ានី និងឯកឧត្តម ឆាយ ថន អញ្ជើញជាសហប្រធាន​ដឹកនាំកិច្ចប្រជុំ​បូកសរុប​លទ្ធផល​ការងារ​គណបក្សខេត្តកំពង់ស្ពឺ ឆ្នាំ២០២៤ និងលើកទិសដៅបន្ត

ឯកឧត្តម ហ៊ុន ម៉ានី សមាជិកគណៈអចិន្ត្រៃយ៍គណៈកម្មាធិការកណ្តាល និង​ជាប្រ​ធាន​ក្រុម​ការងារ​គណ​បក្ស​ចុះជួយខេត្តកំពង់ស្ពឺ និងឯកឧត្តមកិត្តិសេដ្ឋាបណ្ឌិត ឆាយ ថន សមាជិកអចិន្រ្តយ៍​គណៈកម្មាធិការកណ្តាល ប្រធានកិត្តិយស​ក្រុមការងារ​គណបក្ស​ចុះ​មូលដ្ឋាន​ខេត្ត​កំពង់ស្ពឺ បានអញ្ជើញជាសហប្រធាន​ដឹកនាំកិច្ចប្រជុំបូកសរុបលទ្ធផលការងារគណបក្ស ឆ្នាំ​២០២៤ និងលើកទិសដៅភារកិច្ច ឆ្នាំ២០២៥ នៅមន្ទីរគណបក្សខេត្ត, នាព្រឹកថ្ងៃទី៧ ខែធ្នូ ឆ្នាំ ២០២៤។

កិច្ចប្រជុំនេះក៏មានការអញ្ជើញចូលរួមពី ឯកឧត្តម អនុប្រធានក្រុមការងារចុះជួយមូលដ្ឋានខេត្ត ក្រុម​ការងារចុះជួយមូលដ្ឋានខេត្ត-ក្រុង ស្រុក-ឃុំ-សង្កាត់ ឯកឧត្តម លោកជំទាវ សមាជិក​គណៈ​អចិន្ត្រៃ​យ៍​គណៈកម្មាធិការគណបក្សក្រុង-ស្រុក ឯកឧត្តម លោកជំទាវ លោក លោកស្រី​គណៈ​កម្មា​ធិការ​គណបក្សឃុំ-សង្កាត់ សរុប ៤៥០នាក់។

បន្ទាប់ពីបានស្តាប់នូវរបាយការណ៍លទ្ធផល ក៏ដូចជាវឌឍន​​ការងារ​មួយ​ចំនួ​ន​របស់​គណបក្ស​រួច​​មក ឯកឧត្តម ហ៊ុន ម៉ានី បានធ្វើការកោតសសើរ និងវាយតម្លៃខ្ពស់ ចំពោះកិច្ច​ខិតខំ​ប្រឹង​ប្រែង​ក្នុង​ការ​អនុវត្តការងារ របស់គណៈកម្មាធិការគណបក្សខេត្ត ក្រុមការងារចុះជួយខេត្ត ស្រុក ឃុំ និង​សមាជិក សមាជិកាបក្សទាំងអស់ ដែលបានបំពេញតួនាទី ភារកិច្ចរបស់ខ្លួន ប្រកប​ដោយ​ការ​យក​ចិត្ត​ទុក​ដាក់ និងការទទួលខុសត្រូវខ្ពស់ រហូតសម្រេច​បាន​នូវ​សមិទ្ធ​ផល​ធំ​ៗ​ជា​ច្រើន​គួរ​ឱ្យ​កត់​សម្គាល់​។ ទន្ទឹមនេះ ឯកឧត្តម ហ៊ុន ម៉ានី បានគូសបញ្ជាក់ថា ការងារចម្បងរបស់​គណបក្ស​គឺ​ត្រូវ​បន្ត​ពង្រឹង​រចនាសម្ព័ន្ធ គោលជំហរ ទស្សនៈសាមគ្គីភាព ឯកភាពផ្ទៃក្នុងជាប្រចាំ ជាពិសេស​ជំរុ​ញ​ទៅ​ដល់​ក្របខណ្ឌសាខា និងអនុសាខាបន្ថែមទៀត ដើម្បីសម្រេចបាន​ផែន​ការ​រួម​ឆ្ពោះ​ទៅកាន់​ការ​បោះឆ្នោត​នា​ពេល​ខាងមុខ។

សូមបញ្ជាក់ផងដែរថា កិច្ចប្រជុំនេះត្រូវបានរៀបចំឡើងជាប្រចាំ ក្នុងគោលដៅ តាមដាន​វឌ្ឍន​ភាព​ការងារ ក៏ដូចជាក្ដាប់ឱ្យបាននូវស្ថានភាពជាក់ស្ដែងរបស់សមាជិកបក្ស ជាពិសេស​ស្ដាប់​នូវ​បញ្ហា​ប្រឈម និងសំណូមពរផ្សេងៗ របស់ថ្នាក់ដឹកនាំ គណៈកម្មាធិការគណបក្សខេត្ត ក្រុមការងារចុះ​ជួយមូ​ល​ដ្ឋានខេត្ត និងសមាជិក សមាជិកាបក្សខេត្ត ដើម្បីរៀបចំទិសដៅ​ការងារ​សម្រាប់​ខែ​បន្ទាប់​៕​ អត្ថបទ៖ រដ្ឋា