សមាគមកម្ពុជាចំនួនបីផ្សេងគ្នា ចុះហត្ថលេខាដើម្បី​លើកកម្ពស់​ការ​ប្រើប្រាស់​ផលិតផល​ស្វាយចន្ទី​នៅ​កម្ពុជា

សមាគមចំនួន៣នៅកម្ពុជា រួមមាន សមាគមសណ្ឋាគារកម្ពុជា សមាគមសហព័ន្ធស្វាយចន្ទីកម្ពុជា និង​សមាគមស្វាយចន្ទីកម្ពុជា បានចុះហត្ថលេខាលើអនុស្សរណៈនៃការយោគយល់គ្នាស្តីពី “កិច្ចស​ហប្រតិបត្តិការជំរុញការប្រើប្រាស់ផលិតផលស្វាយចន្ទីកម្ពុជា” ក្នុងគោល​បំណង​ជំរុញ​ការ​ប្រើ​ប្រាស់​ផលិតផលស្វាយចន្ទីក្នុងវិស័យសណ្ឋាគារ ដើម្បីលើកកម្ពស់ការកែច្នៃ ការប្រើប្រាស់ និង​ការ​ចែក​ចាយផលិតផលស្វាយចន្ទីនៅកម្ពុជា។

ផេកផ្លូវការរបស់ក្រសួងពាណិជ្ជកម្ម បានឲ្យដឹងថា កម្មវិ​ធី​ចុះ​ហត្ថ​លេខា​លើ​អនុស្សរណៈ នៃ​ការ​យោគ​យល់​គ្នានេះ បានប្រព្រឹត្ត​ទៅក្រោមវត្តមានជាសាក្សីរបស់ លោកជំទាវរដ្ឋមន្រ្តី ចម និម្មល និង​មានការអញ្ជើញចូលរួមពីថ្នាក់ដឹកនាំ និងមន្ត្រីពាក់ព័ន្ធរបស់ក្រសួងពាណិជ្ជកម្ម ថ្នាក់​ដឹកនាំ​សមាគម​សណ្ឋាគារកម្ពុជា សមាគមសហព័ន្ធស្វាយចន្ទីកម្ពុជា សមាគមស្វាយចន្ទីកម្ពុជា ផ្សារ​ទំនើប ម៉ាត និងសហគ្រាសស្វាយចន្ទីជាច្រើនរូប។

ប្រភពដដែល បានឲ្យដឹងទៀតថា ក្នុងពិធីនេះ មានអនុស្សរណៈនៃការយោគយល់គ្នាចំនួន២ ត្រូវ​បាន​ចុះហត្ថលេខា គឺ ១-រវាងសមាគមសណ្ឋាគារកម្ពុជា និងសាគមសហព័ន្ធស្វាយចន្ទីកម្ពុជា និង​-រវាងសមាគមសណ្ឋាគារកម្ពុជា និងសមាគមសយចន្ទីកម្ពុជា។

ជា​លទ្ធផល យោងតាមស្មារតីនៃការចុះអនុស្សរណៈខាងលើនេះ សមាគមសណ្ឋាគារ នឹង​ធ្វើ​ការ​បញ្ជា​ទិញ​ស្វាយចន្ទី ក្នុងរយៈពេល៣ឆ្នាំ ដោយក្នុង១ឆ្នាំៗ មានតម្រូវការ ២៥០តោន ក្នុងនោះ ២១០​តោន សម្រាប់កែច្នៃធ្វើម្ហូបអាហារ នំ និងភេសជ្ជៈ និង ៤០តោន ស្មើ៤០០,០០០កញ្ចប់ ដែល​ជា​ផលិតផលស្វាយចន្ទីវេចខ្ចប់សម្រាប់ដាក់លក់ក្នុងមីនីបារ និងក្នុងបន្ទប់សណ្ឋាគារ៕