មន្រ្ដីរាជការ និងអង្គការសង្គមស៊ីវិលខេត្តពោធិ៍សាត់ប្រារព្ធទិវាជនមានពិការភាព

អង្គការសេវាកម្មអភិវឌ្ឍន៍ជនពិការ សហការជាមួយរដ្ឋបាលខេត្តពោធិ៍សាត់ និងមន្ទីរសង្គមកិច្ច អតីត​យុទ្ធជន និងយុវតិសម្បទាខេត្ត និងអង្គការដៃគូ បានរៀបចំទិវាជនមានពិការភាពកម្ពុជា លើក​ទី​២៦ និងទិវាជនពិការអន្តរជាតិលើកទី៤២ ក្រោមប្រធានបទ «បរិយាបន្ន​ពិការ​ភាព​លើ​គ្រប់​វិស័យក្នុងយុគសម័យបរិវត្តកម្មឌីជីថល»។

ពិធីនេះប្រារព្ធឡើងនៅបរិវេណមន្ទីរសង្គមកិច្ចខេត្ត ក្រោមវត្តមានលោក ស្រី ប៉ុក ណាឌី អភិបាល​រង​ខេត្ត តំណាងឯកឧត្តម ខូយ រីដា អភិបាលខេត្តពោធិ៍សាត់ និងមាន​ការ​ចូលរួម​ពី​ស្ថាប័ន​មន្ទីរ​អង្គភាព រដ្ឋបាលក្រុងនិងសង្កាត់ ជនមានពិការភាព​មក​ពី​បណ្តា​មូលដ្ឋាន​រួម​ជាមួយ​មាតាបិតា និង​អាណា​ព្យាបាលប្រមាណ១០០នាក់ ។

លោក ផែង សំណាង នាយកអង្គការសេវាកម្មអភិវឌ្ឍន៍ជនពិការខេត្ត និងលោក អៀង ហុង ប្រធាន​មន្ទីរសង្គមកិច្ច អតីតយុទ្ធជននិងយុវនីតិសម្បទាខេត្ត បានជម្រាប​ជូន​ថា​កន្លង​មក​ជន​មាន​ពិការភាព​ត្រូវ​បានគាំពារនិងបង្កើតការងារតាមរយៈគម្រោង កែឆ្នៃផ្លាស្ទីកដោយចង​ក្រង​ក្រុម​ជួយ​ខ្លួន​ឯង​ានន៣២ក្រុមមានសមាជិក៨៩៣នាក់បណ្តុះបណ្តាលជំនាញកាត់ដេរ និងជួសជុល​ម៉ូតូ ៣២នាក់ជំនាញកុំព្យូទ័រ ភាសាអង់គ្លេស ចំនួន២៨៤នាក់ដើម្បីកែលម្អជីវភាពប្រចាំថ្ងៃ។

ក្រៅ​ពីនោះអង្គការក៏ដូចមន្ទីរសង្គមកិច្ច បានបន្តការខិតខំគៀងគររកប្រភពជំនួយ ដើម្បី​លើក​កម្ពស់​សិទ្ធិជនពិការនិងគ្រួសារ ស្តាលទ្ធភាពពលកម្មនៅក្នុងសហគមន៍ ជនបទក្នុង​ខេត្ត​ពោធិ៍សាត់​ឲ្យ​កាន់តែប្រសើរទាំងសេវាសុខភាព ការបណ្តុះបណ្តាល សេវាសង្គម និងគាំទ្រផ្តល់​សិទ្ធិ​អំណាច។

បន្ទាប់ពីបានអានសារលិខិតសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជារួចមក លោកស្រី ប៉ក់ ណាឌី បានលើកឡើងថា បញ្ហាពិការភាពជាបញ្ហាអាទិភាព គឺជាកិច្ចការងារ​ពហុ​វិស័យ ទាមទាឱ្យយើង ត្រូវតែយកចិត្ត ទុក​ដាក់​ដើម្បី​ការពារ និង​លើក​កម្ពស់​សិទ្ធិ​ជន​មាន​ពិការភាព​គឺជាធនធានមនុស្សយ៉ាងសំខាន់ក្នុងការចូលរួមអភិវឌ្ឍន៍សង្គមជាតិ។

លោកស្រី​បន្តថា រដ្ឋបាលខេត្ត តែងតែយកចិត្តទុកដាក់ ផ្តល់នូវសេវាសុខភាព ការស្តា​លទ្ធភាព​ពលកម្ម​កាយ​សម្បទានិងសតិបញ្ញា ឈានទៅរកការលុបបំបាត់ការរើសអើង ការរំលោភបំពាន ការប្រមាថ និងការកេងប្រវ័ញ្ច​លើជនពិការ​ព្រម​ទាំង​បាន​លើក​ទឹកចិត្ត​ឱ្យ​ជន​ពិការ​ចូល​រួម​សកម្មភាព​កីឡា សិល្បៈ និងបង្កលក្ខណះងាយស្រួល ជាច្រើនទៀតដើម្បីធានា​បាន​សម​ភាព​យេនឌ័រ និង​ការលើកកម្ពស់សមត្ថភាពស្រ្តីនិងកុមារ។

លោកស្រី បានអំពាវនាវដល់ប​ង​ប្អូន​ជន​ពិការ​ទាំង​អស់​មេត្តា​ខិតខំ​ប្រឹង​ប្រែង​ជួយ​ខ្លួន​ឯង​តាមរយៈ​ចិញ្ចឹម​សត្វ បង្កបង្កើនផល មានការយោគយល់សាមគ្គី គ្មានអំពើហឹង្សា គ្មានការរើសអើង ធ្វើយ៉ាង​ណា​ឱ្យ​ជីវភាបរស់នៅប្រចាំថ្ងៃកាន់តែប្រសើរនិងមេត្តាកុំយកបងប្អូន ជនពិការធ្វើ​ឈ្នាន់​សម្រាប់​ដើរ​សុំទាន និង​កែង​ចំណេញ​កម្លាំង​កម្ម​ើម្បី​បម្រើ​ផល​ប្រយោជន៍​ខ្លួន​ឯង​ដែល​ជា​អំពើ​អយុត្តិធម៌​បំផុត៕