ពិព័រណ៍យន្តហោះ និងបច្ចេកវិទ្យា ឆ្នាំ ២០២៤ ស្រូបទាញអ្នកចូលទស្សនាបានជាង ១០ម៉ឺននាក់

ពិព័រណ៍យន្តហោះ និងបច្ចេកវិទ្យាឆ្នាំ ២០២៤ បានក្លាយជាពិព័រណ៍ដ៏ជោគជ័យ សម្រាប់ចុងឆ្នាំ ២០២៤​នេះ ដោយស្រូបទាញសាធារណៈជន ចូលទស្សនាបានជាង ១០ម៉ឺននាក់ក្នុងរយៈពេល ៣ថ្ងៃ​នៃពិព័រណ៍។ ភាពជោគជ័យបំផុតគឺនៅថ្ងៃចុងក្រោយ ដែលមានអ្នកចូលរួមរហូតដល់ ១០៣ ៣៨៧​នាក់។

ពិព័រណ៍យន្តហោះ និងបច្ចេកវិទ្យា ដែលជាការរៀបចំដោយសហភាពសហព័ន្ធយុវជនកម្ពុជា ក្រសួង​អប់រំ យុវជន និងកីឡា និងទ័ពអាកាសកម្ពុជា បានក្លាយជាពិព័រណ៍ដ៏ធំសម្រាប់ចុងឆ្នាំ ២០២៤​នេះ។ ពិព័រណ៍នេះ ទទួលបាលជោគជ័យជាខ្លាំង ដែលអាចស្រូបទាញ សាធារណៈជន​គ្រប់​វ័យ មកពីចម្រុះរាជធានី-ខេត្ត រហូតដល់ជាង១០ម៉ឺននាក់។

លោក អេង ប៊ុនថេង ជាប្រធានគ្រប់គ្រង និងប្រតិបត្តិ នៃពិព័រណ៍ លើកឡើងថា ការចាប់​ផ្ដើម​ថ្ងៃ​ដំបូង គឺទទួលបាកចូលរួមត ១ម៉ឺននាក់។ ថ្ងៃទី២ ចំនួនអ្នកចូលរួមបានកើនឡើងទ្វេរដង រហូត​ដល់​ជិត៣ម៉ឺននាក់។ កាន់តែជោគជ័យគឺនៅថ្ងៃទី៣ ដែលជាថ្ងៃឈប់សម្រាក ដោយប្រជា​ពលរដ្ឋ​មក​ពីបណ្ដារាជធានី-ខេត្ត បានធ្វើដំណើរជាក្រុមគ្រួសារមកចូលរួមក្នុងពិព័រណ៍។ សម្រាប់​ថ្ងៃ​ចុង​ក្រោយនៃ ពិព័រណ៍នេះ គឺមានអ្នកចូលរួមរហូតដល់ ១០៣ ៣៨៧នាក់។ ក្នុងនាមជា​តំណាង​ឱ្យ​ក្រុមការងាររៀបចំពិព័រណ៍យន្តហោះ លោក អេង ប៊ុនថេង សម្ដែងនូវភាពពេញ​ចិត្ត​ជា​ខ្លាំង​ចំពោះជោ​គជ័យ ដែលមានការគាំទ្រច្រើនលើលសការរំពឹងទុក។

រយៈពេលទាំង៣ថ្ងៃ នៃពិព័រណ៍ ការចូលរួមគឺមានចម្រុះ។ ថ្ងៃទី ១និងថ្ងៃទី ២ ភាគ​ច្រើន​អ្នក​ចូល​រួម​ ជាសិស្សនិស្សិត ដែលអញ្ជើញចូលរួមទស្សនាពិព័រណ៍ជាមួយខាងសាលា។ រីឯថ្ងៃទី ៣ ត្រូវ​ជា​ថ្ងៃ​អាទិត្យ ភាគច្រើនអ្នកចូលរួមមកជាលក្ខណៈគ្រួសារ។ ជាអាណាព្យាបាល ពួកគាត់បាន​ជូន​កូន​មក​កម្សាន្ត ដោយភ្ជាប់ជាមួយគោលដៅបណ្ដុះគំនិតកូនឱ្យកាន់តែស្រឡាញ់បច្ចេកវិទ្យា ក៏​ដូច​ជា​ការ​សិក្សា ការធ្វើការងារពាក់ព័ន្ធនឹងយន្តហោះ។

ភាពទាក់ទាញនៃពិព័រណ៍យន្តហោះនេះ គឺមានការដាក់ពិព័រណ៍យន្តហោះជាច្រើនគ្រឿង ដែល​អនុញ្ញាត​ឱ្យ​សាធារណៈជន អាចឡើងទៅថតរូបលេង និងមានអ្នកបើកបរយន្តហោះ រង់ចាំ​ផ្ដល់​ព័ត៌មាន​រាល់​ចម្ងល់ថែមទៀតផង។ លើសពីនេះ គឺមានការតាំងពិព័រណ៍ស្នាដៃបច្ចេកវិទ្យា របស់​សិស្ស​និស្សិត ការធ្វលសិក្ខាសាលា និងការប្រកួតយន្តហោះបញ្ជា ការប្រកួតដ្រូន ការប្រកួត​មនុស្ស​យន្ត និងការប្រកួតមនុស្សចម្បាំងថែមទៀតផង៕ អត្ថបទ៖ គឹម ហុក