កម្ពុជាបើកវេទិកាពាណិជ្ជកម្ម និងវិនិយោគកម្ពុជា-កូរ៉េ ដើម្បីពង្រឹងទំនាក់ទំនងផ្នែកពាណិជ្ជកម្ម

លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានចូលរួមជាអធិបតីក្នុងពិធីបើក “វេទិកា​ពាណិជ្ជ​កម្ម និងវិនិយោគ កម្ពុជា-កូរ៉េ” ជាព្រឹត្តិការណ៍អម “ពិព័រណ៍ពាណិជ្ជកម្មកម្ពុជា” ដែលប្រព្រឹត្ត​ទៅ​ចាប់ពីថ្ងៃទី១៣-១៦ ខែធ្នូ ឆ្នាំ២០២៤។

នៅក្នុងពិធីបើកវេទិកា កាលពីសប្តាហ៍កន្លងទៅនេះ លោកជំទាវរដ្ឋមន្រ្តី បានមានប្រសាសន៍ថា វេទិកានេះធ្វើឡើងក្នុងគោលបំណងដើម្បីពង្រឹងសកម្មភាពពាណិជ្ជកម្ម និងការ​វិនិយោគ​ទ្វេភាគី​តាម​រយៈការជំរុញភាពជាដៃគូយុទ្ធសាស្ត្រ លើកកម្ពស់សក្តានុពលវិនិយោគរបស់កម្ពុជា និង​សម្រប​សម្រួលកិច្ចសហការរវាងរដ្ឋាភិបាល និងវិស័យឯកជន។

លោកជំទាវរដ្ឋមន្រ្តី បានលើកឡើងបន្តថា វេទិកានេះក៏នឹង​បង្ហាញ​ពី​ឱកាស​នៅ​ក្នុង​វិស័យ​សំខាន់​ៗ​ដូចជា កសិកម្ម សម្ភារច្ចកវិទ្ា និងពាណិជ្ជកម្មឌីជីថល ដើម្បីលើកកម្ពស់​លទ្ធភាព​ការ​ចូល​​​ទៅ​​កា​ន់ទីផ្សារ គាំទ្រដល់ការអភិវឌ្ឍន៍ប្រកបដោយចីរភាព និងជំរុញការធ្វើពិពិធកម្មសេដ្ឋកិច្ច ដែល​វិស័យគន្លឹះទាំងនេះត្រូវបានការចង្អុលបង្ហាញដ៏ខ្ពង់ខ្ពស់ពីសម្តេចនាយករដ្ឋមន្ត្រីកម្ពុជា ក្នុង​ជំនួបរបស់សម្តេចជាមួយនឹង KIAF និងតំណាងក្រុមហ៊ុន កាលពីថ្ងៃទី១៣ ខែធ្នូ ២០២៤។ មិនត្រឹមតែប៉ុណ្ណោះ វេទិកានេះក៏ផ្តល់ឱកាសដ៏ល្អ ពង្រឹងភាពជាដៃគូកម្ពុជាកូរ៉េ ស្វែង​យល់​ពី​សក្តានុពល​ពាណិជ្ជកម្ម និងការបណ្តាក់ទុន។

នៅក្នុងវេទិកានេះ ក៏បានការធ្វើបទបង្ហាញពីវាគ្មិនកូរ៉េ និងកម្ពុជាស្តីពីប្រធានបទពាក់ព័ន្ធជាច្រើន ដូចជា​តម្លៃនៃសាជីវកម្មនិងកំណែទម្រង់ថ្នាក់ជាតិ ការលើកទឹកចិត្តផ្នែកកាតព្វកិច្ចពន្ធដារ ការ​វិនិយោគ​ផ្ទាល់​ពីបរទេស កិច្ចសហប្រតិបត្តិការ​សម្រាប់​ការ​បណ្តុះ​បណ្តាល​បុគ្គលិក​ក្នុង​វិស័យ​ឧស្សាហ​កម្ម ការបង្កើតការងារនៅកម្ពុជា ការវិនិយោគនៅកម្ពុជា និងការផ្តល់សេវា​ធនាគារ​ឌីជីថល​។

សូមជម្រាបជូនផងដែរថា វេទិកាពាណិជ្ជកម្ម និងវិនិយោគកម្ពុជា-កូរ៉េ មានការ​ចូលរួម​ថ្លែង​សុន្ទរកថា​គន្លឹះ​ពី លោក Marn-Ki Jeong, ប្រធានវេទិកាសម្ព័ន្ធឧស្សាហកម្មនៃប្រទេសកូរ៉េ (KIAF) ឯកឧត្តម Roh Keon-ki អនុរដ្ឋមន្ត្រីនៃក្រសួងពាណិជ្ជកម្ម ឧស្សាហកម្ម និងថា​មពល​នៃ​សាធារណរ​ដ្ឋកូរ៉េ និងឯកឧត្តម Park Jung-Wook ឯកអគ្គរដ្ឋទូតនៃសាធារណរដ្ឋកូរ៉េ ប្រចាំ​កម្ពុជា ថ្នាក់ដឹកនាំក្រសួង ស្ថាប័ន និងភ្ញៀវជាតិ និងអន្តរជាតិជាច្រើនរូបផ្សេងទៀត៕ អត្ថបទ ឈិត បូរ៉ាវី