សម្តេចធិបតីបញ្ជាក់អំពីកិច្ចខិតខំប្រឹងប្រែងតភ្ជាប់ ហេដ្ឋារចនាសម្ព័ន្ធជំរុញការអភិវឌ្ឍទៅគ្រប់តំបន់

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានថ្លែងរំលឹក និង​បញ្ជាក់ជាថ្មី​អំពីការ ខិតខំប្រឹងប្រែងរបស់រាជរដ្ឋាភិបាលតភ្ជាប់ហេដ្ឋារចនាសម្ព័ន្ធនានា ដើម្បីជំរុញការអភិវឌ្ឍ​ទៅគ្រប់តំបន់ ដើម្បីភាពរីកចម្រើននៃសេដ្ឋកិច្ចជាតិ ។

សម្តេចធិបតី ហ៊ុន ម៉ាណែត ខណៈអញ្ជើញជាអធិបតីភាពក្នុងពិធីបើកការដ្ឋានសាងសង់​ទី​ក្រុងមេគង្គ ឃី របស់ក្រុមហ៊ុន ធីភី ម៉ូរ៉ាល់ គ្រុប ស្ថិតនៅក្រុងអរិយក្សត្រ នាព្រឹកថ្ងៃទី១៧ ខែធ្នូ នេះ បានថ្លែងថា ជាការពិត មានកត្តាជាច្រើនដែលរួមចំណែកដល់ការផ្លាស់ប្តូរមុខមាត់​ដ៏អស្ចារ្យរបស់​កម្ពុជា ក៏ដូចជារាជធានីភ្នំពេញនោះ គឺការរីកចម្រើននៃហេដ្ឋារចនាសម្ព័ន្ធ ទាំងក្នុងភូមិសាស្ត្រ និងការតភ្ជាប់ភូមិសាស្ត្រ ជាកត្តាសំខាន់ ។

ទោះជាយ៉ាងណាក៏ដោយសម្តេចធិបតី បានបញ្ជាក់ថា មានការអភិវឌ្ឍរីកចម្រើនជាជំហានៗ ជាពិ សេសការតភ្ជាប់ស្ពានជាបន្តបន្ទាប់នៅតាមដងទន្លេសាប ស្ពានព្រែកក្តាម ទន្លេមេគង្គ ស្ពានព្រែកតាមាក់ បាន ចាប់ផ្តើមជំរុញសេដ្ឋកិច្ច តាមរយៈការអភិវឌ្ឍ មានដូចជាផ្លូវជាតិលេខ៨ និងសមិទ្ធផលនានាជាច្រើន ដែលជា ផលផ្លែផ្កានៃការតភ្ជាប់ហេដ្ឋារចនាសម្ព័ន្ធជាបន្តបន្ទាប់ ៕អត្ថបទ៖ មុត សុទ្ធ