អាជ្ញាធរដាក់បម្រាមគោចរពេញមួយយប់នៅកោះម៉ាយ៉ត់របស់បារាំង ក្រោយរងគ្រោះព្យុះស៊ីក្លូន ខណៈប្រញាប់ប្រញាល់ផ្តល់ជំនួយ

ក្រុមអាជ្ញាធរបារាំងកាលពីថ្ងៃអង្គារសប្ដាហ៍នេះ បានប្រកាសបម្រាមគោចរពេញមួយយប់នៅកោះម៉ាយ៉ត់ (Mayotte) ខណៈពួកគេស្វែងរកស្ថេរភាពនៃទឹកដីកោះនេះ បន្ទាប់ពីព្យុះស៊ីក្លូន ជីដូ (Chido) ជាព្យុះដ៏មានឥទ្ធិពលបំផុតដែលបានវាយប្រហារប្រជុំកោះមហាសមុទ្រឥណ្ឌាក្នុងរយៈពេល៩០ ឆ្នាំ។

យោធាបារាំងបាននិយាយថា ខ្លួនកំពុងបញ្ជូនយន្តហោះពី ៤ ទៅ ៥ គ្រឿងក្នុងមួយថ្ងៃ ផ្ទុកជំនួយរហូតដល់៥០តោន រួមទាំងអាហារ ទឹក និងថ្នាំពេទ្យ។ បុគ្គលិកយោធារាប់រយនាក់បានទៅដល់កោះនេះ ចាប់តាំងពីចុងសប្តាហ៍មុន ជាក្រុមកោះមួយស្ថិតនៅក្បែរទ្វីបអាហ្រ្វិក ដែលជាទឹកដីក្រីក្របំផុតរបស់ប្រទេសបារាំង។ ចំនួនអ្នកស្លាប់ផ្លូវការពីព្យុះស៊ីក្លូនកាលពីថ្ងៃសៅរ៍សប្ដាហ៍មុន បានកើនឡើងដល់២២នាក់ នេះបើយោងតាមរបាយការណ៍ចុងក្រោយពីមន្ទីរពេទ្យក្រុងម៉ាយ៉ត់ (Mayotte)។

នាយករដ្ឋមន្ត្រីដែលទើបតែងតាំងថ្មី លោក ហ្វ្រង់ស្វ័រ បាយរូ (François Bayrou) បានផ្តល់ព័ត៌មានវិវត្តន៍ថ្មីកាលពីថ្ងៃអង្គារសប្ដាហ៍នេះ ដោយនិយាយថា មនុស្សជាង ១.៥០០នាក់បានរងរបួស រួមទាំងជាង ២00 នាក់ស្ថិតក្នុងស្ថានភាពធ្ងន់ធ្ងរ ទោះជាយ៉ាងណា ក្រុមអាជ្ញាធរបារម្ភថា មនុស្សរាប់រយនាក់ និងប្រហែលជារាប់ពាន់នាក់បានស្លាប់។

ការិយាល័យរបស់លោកប្រធានាធិបតីបារាំង Emmanuel Macron បាននិយាយថាលោកប្រធានាធិបតី នឹងធ្វើដំណើរទៅកាន់កោះម៉ាយ៉ត់នៅថ្ងៃព្រហស្បតិ៍សប្ដាហ៍នេះ ។ លោក Macron បាននិយាយនៅក្នុងសេចក្តីថ្លែងការណ៍មួយថាជនរួមជាតិរបស់យើងកំពុងរស់នៅក្នុងស្ថានភាពធ្ងន់ធ្ងរបំផុតចម្ងាយត្រឹមតែពីរបីពាន់គីឡូម៉ែត្រពីគ្នា ហើយខ្ញុំនឹងនៅក្បែរពួកគេក្នុងរយៈពេលពីរបីម៉ោងនៅទីនោះ៕