ក្រសួងទេសចរណ៍បង្ហាញផែនការយុទ្ធសាស្ត្រ៥ ទាក់ទាញទេសចរមូស្លីមអន្តរជាតិមក​ទស្សនាកម្ពុជា

នៅថ្ងៃទី១៨ ខែធ្នូនេះ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានបើកវេទិកា​ទេសចរណ៍​មូស្លីមកម្ពុជា ឆ្នាំ២០២៤ រយៈពេល១ថ្ងៃនៅសណ្ឋាគារភ្នំពេញ។ ក្នុងវេទិកានេះ រដ្ឋមន្ត្រី​ទេសចរណ៍ បានប្រកាសសហការជាមួយ ភាគីប្រទេសដៃគូ និងវិស័យឯកជន អនុវត្ត​ផែនការ​យុទ្ធសាស្ត្រចំនួន៥ ដើម្បីរួមគ្នាជំរុញទាក់ទាញទេសចរមូស្លីមជាតិ និងអន្តរជាតិ​ទស្សនា​កម្ពុជា​នៅគ្រប់រដូវកាលទាំងអស់។

ឯកឧត្តម រដ្ឋមន្ត្រី ហួត ហាក់ ថ្លែងថា នៅក្នុងផែនការយុទ្ធសាស្ត្រទាំង៥ ដែលត្រូវអនុវត្ត​ជំរុញ​ការ​ទាក់ទាញ ទេសចរមូស្លីមជាតិអន្តរជាតិ ដើរកម្សាន្តទស្សនាកម្ពុជានោះ រួមមាន៖ ទី១. ពង្រឹង​ពង្រីក​គុណភាពផលិតផល និងសេវា កម្មទេសចរណ៍មូស្លីម ២. អភិវឌ្ឍហេត្ថារចនាសម្ព័ន្ធ​សម្រួល​ការ​ធ្វើដំណើរ និងការតភ្ជាប់ទេសចរណ៍មូស្លីម ៣. បង្កើន ការផ្សព្វផ្សាយទេសចរណ៍​កម្ពុជា​ទៅកាន់ទីផ្សារទេសចរណ៍មូស្លីមអន្តរជាតិ ៤. ពង្រឹងពង្រីកកិច្ចសហប្រតិបត្តិការជា មួយ​គ្រប់​ភាគី​ពាក់ព័ន្ធទាំងអស់ និងទី៥. អភិវឌ្ឍធនធានមនុស្ស និងបញ្ជ្រាបការយល់ដឹង​ទេសចរណ៍​មូស្លីម​​ដល់​​វិស័យ​ឯកជន និងភាគីពាក់ព័ន្ធនានា។

ដើម្បីសម្រេចគោលដៅការអនុវត្តផែនការអភិវឌ្ឍន៍ទេសចរណ៍មូស្លីម ឯកឧត្តម រដ្ឋមន្ត្រី ហួត ហាក់ ក៏បាន​ស្នើគ្រប់​វិស័យ​ឯកជន និងគ្រប់ភាគីពាក់ព័ន្ធនានា រៀបចំកម្មវិធី​ជំនួបផ្លាស់​ប្តូរ​អាជីវកម្ម​ទេសចរណ៍​រវាងប្រទេស​កម្ពុជា និង​បណ្តា​ប្រទេស​ឥស្លាម និងត្រូវរៀបចំហាង​ម្ហូប​អាហារ​ហាឡាល់ កន្លែងថ្វាយបង្គំ និងរៀបចំសេវាកម្មនានាទៀត ដែល​បម្រើ​ឲ្យ​សេចក្តី​តម្រូវការ​ទេសចរ​មូស្លីម​ឲ្យ​បានច្រើន។

របាយការណ៍ក្រសួងទេសចរណ៍បានឲ្យដឹងថា កម្ពុជា នៅក្នុងឆ្នាំ២០២៣ ទទួល​បាន​ទេសចរ​អន្តរជាតិ​​ប្រមាណ ៥លាន ៤៥ម៉ឺននាក់ ក្នុងនោះទេសចរមូស្លីមអន្តរជាតិ មានប្រមាណ៣៦​ម៉ឺននាក់​។ ដោយឡែក​ក្នុង​រយៈពេល​ ១១ខែ ឆ្នាំ២០២៤នេះវិញ កម្ពុជាទទួលបាន​ទេសចរ​អន្តរជាតិ​ប្រមាណ ៦លាននាក់ ក្នុងនោះមានទេសចរមូស្លីម​អន្តរជាតិ មានប្រមាណជាង​៤០​ម៉ឺន​នាក់ កើន២៣% បើប្រៀបធៀបរយៈពេលដូចឆ្នាំ២០២៣។

ឯកឧត្តម រដ្ឋមន្ត្រី ហួត ហាក់ បង្ហាញក្តីរំពឹងថា នៅក្នុងដំណាច់ឆ្នាំ២០២៤ កម្ពុជា នឹង​ទទួល​បាន​ទេសចរ​​អន្តរជាតិ​មកទស្សនាកើនរហូតដល់៦លាន៧សែននាក់ ក្នុងនោះទេសចរមូស្លីមអន្តរជាតិ មាន​ប្រមាណ៤៣ម៉ឺននាក់ កើន​លើសការរំពឹងទុក៕ អត្ថបទ៖ ស៊ុម សុខជា