អ្នកលេងគុនខ្មែរ នី សុភី ត្រូវការបួនទឹកឈ្នះកីឡាករ ឆៃ សារ៉ា ការប្រកួតប្រគុនខ្មែរមិត្តភាព Kubota

(ភ្នំពេញ)៖ អ្នកប្រដាល់គុនខ្មែរ នី សុភី ឈ្នះកីឡាករឆៃ សារ៉ា ក្នុងការប្រកួតប្រកួតប្រដាល់គុនខ្មែរ លក្ខណៈមិត្តភាពរបស់ក្រុមហ៊ុន Kubota ក្នុងប្រភេទទំងន់ ៦៧គីឡូក្រាម នៅស្ទូឌីយោបាយ័នស្ទឹងមានជ័យ ថ្ងៃទី២៩ ខែឧសភា ឆ្នាំ២០២០ កន្លងទៅនេះ។

អ្នកលេងគុនខ្មែរ មកពីក្លិបកុលបុត្រគុនខ្មែរខណ្ឌទួលគោកនេះ សម្រុកវាយគូប្រកួតក្នុងទឹកទី៤រហូតដល់អាជ្ញាកណ្តាលបញ្ឈប់ការប្រកួត ។

ចំនែកការប្រកួតផ្សេងទៀត កីឡាករ រិទ្ធ ដេវីត មកពីក្លិបអាណាចក្រគុនខ្មែរ ឈ្នះពិន្ទុកីឡាករ ណុំ សំអនរបស់ក្លិបរាជសីហ៍ខេត្តរតនៈគីរី។ តក់ សោភណ្ឌ កូនសិស្សលោកអេ ភូថង ឈ្នះកីឡាករ ធីម ទាន់ មកពីក្លិប រាជសីហ៍ខេត្តរតនៈគីរី  ឡុញ វ៉ាន់ឌី មកពីក្លិបវិបុសដារិទ្ធិខណ្ឌពោធិ៍សែនជ័យ ចាញ់កីឡាករក្លិប អាណាចក្រគុនខ្មែរ ធី វ៉ារិទ្ធ។

ដោយឡែក កីឡាករមកពីក្លិបអេភូថងកីឡា មួយរូបទៀត ឌុន វ៉ុន ឈ្នះកីឡាករ ផល ដេវីត ក្លិបកុមារទេពមានរិទ្ធ ដោយពិន្ទុ៕

អត្ថបទ៖ គង់ ហួន
Photo៖ លឹម រ៉ាឌី