អគ្គនាយកដ្ឋានភស្តុភារ និងហិរញ្ញវត្ថុ ក្រសួងមហាផ្ទៃធ្វើសន្និបាតបូកសរុប​លទ្ធផលការងារ​ឆ្នាំ​២០២៤

នាយឧត្តមសេនីយ៍ សេង យូអ៊ាន់ អគ្គនាយក នៃអគ្គនាយកដ្ឋានភស្តុភារ និងហិរញ្ញវត្ថុ ក្រសួង​មហាផ្ទៃ​នៅ​ព្រឹក​ថ្ងៃទី២៥ ខែធ្នូ ឆ្នាំ២០២៤នេះ បាន​អញ្ជើញ​ជា​​បើក​សន្និបាត​បូក​សរុប​លទ្ធផល​ការងារ​ឆ្នាំ២០២៤ និងលើកទិសដៅការងារឆ្នាំ២០២៥ របស់អគ្គនាយកដ្ឋានភស្តុភារ និង​ហិរញ្ញវត្ថុ ក្រសួងមហាផ្ទៃ។

មានប្រសាសន៍អញ្ជើញបើកសន្និបាត ឯកឧត្តម នាយឧត្តមសេនីយ៍ សេង យូអ៊ាន់ បាន​សម្តែង​នូវ​ការ​កោតសរសើរ និងវាយតម្លៃខ្ពស់ចំពោះថ្នាក់ដឹកនាំ មន្ត្រីគ្រប់លំដាប់ថ្នាក់ បានចូល​រួម​ចំណែក​ក្នុង​ការ​បំពេញភារកិច្ចយ៉ាងសកម្ម លើការអនុវត្តការងារភស្តុភារ-ហិរញ្ញវត្ថុ សំដៅឱ្យការគ្រប់គ្រង ផ្គត់ផ្គង់ ថវិកា ប្រេងឥន្ធនៈ សម្ភារ ឯកសណ្ឋាន ឧបករណ៍ មធ្យោបាយ និងសេវាគាំទ្រនានា ដើម្បី​បម្រើ​ដល់​គ្រប់កិច្ចប្រតិបត្តិការដែលស្ថិតក្នុងដែនសមត្ថកិច្ចរបស់្រសួងមហាផ្ទៃ។

នាយ​ឧត្តមសេនីយ៍ ឆ្នាំ២០២៤នេះ គឺជាឆ្នាំទី២ ដែលរាជរដ្ឋាភិបាល អាណត្តិទី៧ បានដាក់​ចេញ​នូវ​គោលនយោបាយ យុទ្ធសាស្ត្របញ្ចកោណដំណាក់កាលទី១ ដើម្បីកំណើន ការងារ សមធម៌ ប្រសិទ្ធភាព និងចីរភាព ដោយកំណត់យកអាទិភាពគន្លឹះចំនួន៥ គឺ «មនុស្ស ផ្លូវ ទឹក ភ្លើង និង​បច្ចេកវិទ្យា» និងជាឆ្នាំទី២ នៃ កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈដំណាក់កាលទី៤ គឺ​គណនេយ្យភាពសមិទ្ធកម្មដែល បានប្រកាសឱ្យអនុវត្តដំបូងនៅឆ្នាំ២០២៣។

ឯកឧត្តម នាយឧត្តមសេនីយ៍ បញ្ជាក់ជូនថា កម្មវិធីកែទម្រង់ការគ្រប់គ្រង ហិរញ្ញវត្ថុ​សាធារណៈ​របស់​រាជ​រដ្ឋាភិបាល បានដំណើរការអនុវត្តរយៈពេលជាង២០ឆ្នាំមកហើយ គិតចាប់​តាំង​ពី​ដំណាក់​កាល​ទី១ គឺក្នុងឆ្នាំ២០០៤ ។

តាមរយៈក្រុមការងារកែទម្រង់ការគ្រប់គ្រងហិរញ្ញវត្ថុ សាធារណៈរបស់ក្រសួងមហាផ្ទៃ បានយកចិត្តទុកដាក់ខ្ពស់ និងសហការល្អជាមួយមន្ត្រីជំនាញ ក្រសួង​សេដ្ឋកិច្ច និងហិរញ្ញវត្ថុក្នុងការរៀបចំផ្សព្វផ្សាយ និងបើក​វគ្គ​បណ្តុះ​បណ្តាល​ដល់​មន្ត្រី​ជំនាញ​ហិរញ្ញវត្ថុគ្រប់អង្គភាពចំណុះក្រសួងមហាផ្ទៃ សំដៅបង្កើនចំណេះដឹងថ្មីៗ ដោយ​មាន​កិច្ច​សហការ ព្រមទាំងការប្តេជ្ញាចិត្តចូលរួមអនុវត្តឈរលើស្មារតីទទួលខុសត្រូវខ្ពស់ ពីគ្រប់តួ​អង្គ​ពាក់​ព័ន្ធ​ទាំង​អស់ ធ្វើឱ្យសម្រេចបាននូវមនុញ្ញផលក្នុងដំណាក់កាលនីមួយៗ ប្រកបដោយប្រសិទ្ធភាព ហើយ​ជាបណ្តើរៗ ឈានទៅអនុវត្តបានលទ្ធផលល្អ ក្នុងដំណាក់កាលទី៤ ដែលជា​ដំណាក់​កាល​ចុង​ក្រោយ​នៃកម្មវិធី កែទម្រង់ការគ្រប់គ្រងហិរញ្ញវត្ថុសាធារណៈ។

គួរបញ្ជាក់ថា ការរៀបចំសន្និបាតនាពេលនេះ គឺមានគោលបំណងពង្រឹងការគោរពវិន័យថវិកា ប្រសិទ្ធ​ភាព នៃការវិភាជន៍ថវិកា ប្រតិបត្តិការ ស័ក្តិសិទ្ធ​ភាព​នៃ​ការ​ផ្តល់​សេវា​គាំទ្រ​ដល់​ក្រសួង​មហា​ផ្ទៃ និងបន្តជំរុញការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី៤ ដែល​ជា​ដំណាក់កាល ដមានសារាន់បំផុតរបស់ប្រ័ន្ធហិរញ្ញវត្ថុសាធារណៈ សំដៅឱ្យការ​គ្រប់​គ្រង​ហិរញ្ញ​វត្ថុប្រកបដោយ តម្លាភាព គណនេយ្យភាព និងប្រសិទ្ធភាព​ខ្ពស់​ជាមួយ​នឹង​កិច្ច​ព្រម​ព្រៀង​សមិទ្ធកម្មក្នុងស្ថានភាពនៃ ការទទួលខុសត្រូវខ្ពស់ ផ្តួបផ្សំការ​ពង្រឹង​ប្រព័ន្ធ​បច្ចេក​វិទ្យា​ជាដើម​៕ អត្ថបទ៖ បាន ចក់