ផ្លូវមុខប្រៃសណីយ៍កម្ពុជា ដល់មុខព្រះបរមរាជវាំង នឹងដាក់ជាផ្លូវថ្មើជើង ចាប់ពីថ្ងៃទី០១ កុម្ភៈ ខាងមុខនេះ

ភ្នំពេញ ៖ ផ្លូវថ្មើជើងជំហានទីមួយពីមុខប្រៃសណីយ៍កម្ពុជា ទៅដល់ខាងមុខព្រះបរមរាជវាំង នឹងដាក់ឱ្យដំណើរការចាប់ពីថ្ងៃទី០១ ខែកុម្ភៈ ឆ្នាំ២០២៥ខាងមុខនេះ។

​ផ្លូវថ្មើជើង (Walk street) តាមបណ្តោយមាត់ទន្លេចាប់ពីមុខប្រៃសណីយ៍កម្ពុជារហូតដល់មុខព្រះបរមរាជវាំង ផ្លូវលេខ២៤០ រដ្ឋបាលរាជធានីភ្នំពេញនឹងដាក់ឱ្យដំណើរការជាជំហានដំបូង នៅថ្ងៃទី០១ ខែកុម្ភៈ ឆ្នាំ២០២៥ខាងមុខនេះ ដោយចាប់ផ្តើមនៅម៉ោង៦ល្ងាច ដល់ម៉ោង១១យប់រាល់ថ្ងៃសៅរ៍ និងថ្ងៃអាទិត្យ។

នេះបើតាមការបង្ហាញឱ្យដឹងក្នុងកិច្ចប្រជុំជាថ្មីទៀត ដើម្បីពិនិត្យវឌ្ឍនភាពនៃការរៀបចំផ្លូវថ្មើជើងនេះ នារសៀលថ្ងៃទី២៩ ខែមករា ឆ្នាំ២០២៥ ក្រោមអធិបតីភាព ឯកឧត្ដម ឃួង ស្រេង អភិបាលនៃគណៈអភិបាលរាជធានីភ្នំពេញ ដោយមានការចូលរួមពីតំណាងក្រសួងទេសចរណ៍ និងអាជ្ញាធរពាក់ព័ន្ធ នៅសាលារាជធានីភ្នំពេញ។

ឯកឧត្ដម ឃួង ស្រេង មានប្រសាសន៍ថា ផ្លូវថ្មើជើងនេះ រដ្ឋបាលរាជធានីភ្នំពេញមានគម្រោងយូរមកហើយ ពោលគឺតាំងពីឆ្នាំ២០១៩មកម្លេះ ប៉ុន្តែដោយសារស្ថានភាពនៃវិបត្តិជំងឺកូវីដ-១៩ បានធ្វើឱ្យគម្រោងនេះផ្អាកដំណើរការសិន។ បន្ទាប់ពីមានការណែនាំរបស់រាជរដ្ឋាភិបាល រដ្ឋបាលរាជធានីភ្នំពេញបានជំរុញការងារឱ្យផ្លូវថ្មើរជើងនេះ ដំណើរការឡើងវិញ ដើម្បីធ្វើយ៉ាងណាទាក់ទាញភ្ញៀវទេសចរជាតិ និងអន្តរជាតិ មកលេងកម្សាន្តឱ្យបានកាន់តែច្រើន។

ឯកឧត្ដម ឃួង ស្រេង បានបញ្ជាក់ថា គម្រោងនេះត្រូវតែចេញដំណើរការនៅថ្ងៃទី០១ ខែកុម្ភៈ ឆ្នាំ២០២៥ខាងមុខនេះ ដោយជាជំហានដំបូងនឹងបើកផ្លូវថ្មើរជើងនេះ នៅរាល់ល្ងាចថ្ងៃសៅរ៍ និងថ្ងៃអាទិត្យ ចាប់ពីម៉ោង៦ល្ងាច ដល់ម៉ោង១១យប់ និងត្រូវបិទចរាចរណ៍យានជំនិះគ្រប់ប្រភេទ ព្រមទាំងមានការរៀបចំបន្ទប់អនាម័យ និងការងាររៀបចំសណ្តាប់ធ្នាប់ការលក់ដូរនៅលើតម្រាយផ្លូវនេះឱ្យបានល្អ ដើម្បីទាក់ទាញភ្ញៀវជាតិ និងអន្តរជាតិ ហើយនៅមុនឈានទៅដល់ថ្ងៃបើកនាថ្ងៃទី០១កុម្ភៈ រដ្ឋបាលរាជធានីភ្នំពេញនឹងជូនដំណឹង ដើម្បីណែនាំប្រជាពលរដ្ឋរស់នៅតំបន់នេះឱ្យបានយល់ពីគម្រោងនេះ។ អាជ្ញាធរត្រូវរៀបចំសណ្តាប់ធ្នាប់ឱ្យបានល្អ ជាមួយនឹងការផ្សព្វផ្សាយឱ្យបានទូលំទូលាយ ដោយដាក់មីក្រូបំពងសំឡេង កុំឱ្យយានយន្តចូល ពេលបើកដំណើរការ នៅថ្ងៃសៅរ៍ និងថ្ងៃអាទិត្យ។

ឯកឧត្ដម ឃួង ស្រេង គូសបញ្ជាក់ផងដែរថា ជាមួយគ្នានេះត្រូវគិតគូរពីអនាម័យបរិស្ថាន អ្នកលក់ដូរ ដោយសារប្រជាពលរដ្ឋកំពុងទន្ទឹងរង់ចាំគម្រោងនេះ។ ក្រោយបើកឱ្យដំណើរការ អាជ្ញាធរនឹងអង្កេត ជាមួយនិងការដកបទពិសោធន៍ ដើម្បីកែលម្អរផ្លូវថ្មើជើងនេះឱ្យកាន់តែល្អប្រសើរថែមទៀត៕

អត្ថបទ ៖ ប្រាក់ វ៉ាន់ដា