ឯកឧត្តម សរ សុពុត្រា ជាប់ជាប្រធានគណៈកម្មាធិការសាខាកាកបាទក្រហមកម្ពុជា​ខេត្តស្ទឹងត្រែង អាណត្តិទី៦

នៅព្រឹកថ្ងៃ ទី១០ ខែកុម្ភៈ ឆ្នាំ២០២៥នេះ លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា តំណាង សម្តេចកិត្តព្រឹទ្ធ ប៊ុន រ៉ានី ហ៊ុនសែន ប្រធាន បានអញ្ជើញជាអធិបតី ប្រារព្ធសន្និបាត សាខាកាកបាទក្រហមកម្ពុជា ខេត្តស្ទឹងត្រែង អាណត្តិទី៦ ពិធីនេះធ្វើឡើងក្នុងសាលប្រជុំ មន្ទីរអប់រំ យុវជន និងកីឡា ខេត្តស្ទឹងត្រែង ដោយមានការអញ្ជើញចូលរួមពី គណៈកិត្តិយសសាខា គណៈកម្មាធិការសាខា អាណត្តិទី៥ សមាជិក-សមាជិកា ពេញសិទ្ធិ មន្ត្រីបច្ចេកទេសទីស្នាក់ការកណ្តាល ក្រុមប្រតិបត្តិសាខា យុវជន កាកបាទក្រហមកម្ពុជា យុវជន ស.ស.យ.ក និង យុវជនកាយឫទិ្ធសរុប១៥០នាក់។

បន្ទាប់ពីប្រកាសរំសាយគណៈកម្មាធិការសាខាអាណត្ដិទី៥ អង្គសន្និបាតបានរៀបចំបោះឆ្នោតសម្ងាត់ ដោយមានអង្គបោះឆ្នោតចំនួន៥២ លើ៥២រូប ដែលជាសមាសភាព ជាសមាជិក សមាជិការ គណៈកម្មាធិការ សាខាអាណតិ្តទី៥, សមាជិកសមាជិកា គណៈកម្មាធិការអាណតិ្តទី៦។ ក្រោយដំណើរការ បោះឆ្នោតរួចរាល់ គណកម្មការរៀបចំបានប្រកាសលទ្ធផល គឺអង្គសន្និបាតបានបោះឆ្នោតគាំទ្រ សមាសភាពបេក្ខជន គណៈកម្មាធិការសាខាខេត្តស្ទឹងត្រែងចំនួន១៥រូប ដោយសម្លេងគាំទ្រ៥១លើ៥២ សម្លេង មានសន្លឹកឆ្នោតមិនបានការចំនួន១សម្លេង។

ដោយអនុវត្តតាមនីតិវិធី គណៈកម្មាធិការសាខា ដែលទើបជាប់ឆ្នោតថ្មីភ្លាម បានបើកកិច្ចប្រជុំលើកទី១ ដើម្បីជ្រើសរើសបេក្ខភាព ប្រធាន, អនុប្រធានអចិន្ត្រៃយ៍, ប្រធានហេរញ្ញិក និងលេខាធិការ ដើម្បីបន្តសុំការអនុម័តពីអង្គសន្និបាត ជាលទ្ធផលអង្គសន្និបាត បានអនុម័តទទួលយកបេក្ខភាព ឯកឧត្តម សរ សុពុត្រា ជាប្រធានគណៈកម្មាធិការសាខាកាកបាទក្រហមកម្ពុជាខេត្តស្ទឹងត្រែង សំរាប់អាណតិ្តទី៦, លោកស្រី សន សុខា អនុប្រធានអចិន្ត្រៃយ៍, លោក ហ៊ាង ប៉ូលី អនុប្រធាន, លោក ខេង ទិត្យសីហា ហេរញ្ញិក, លោក ម៉ែន គុង លេខាធិការ, និង សមាជិក- សមាជិកា សាខា ចំនួន១០រូបទៀត។

បន្ទាប់ពីប្រគល់ត្រាជូនប្រធានគណៈកម្មាធិការថ្មីរួចលោកជំទាវ ពុំ ចន្ទីនី បានអានសេចក្តីថ្លែងការរបស់សម្តេចកិត្តិព្រឹទ្ធបណ្ឌិត ប៊ុន រ៉ានីហ៊ុនសែន ប្រធាន ដែលបានចូលរួមអបអរសាទរ និងប្រកាសគាំទ្រ ទទួលស្គាល់សមាសភាព គណៈកម្មាធិការសាខាទាំង១៥រូប ដែលទទួលបាននូវទំនុកចិត្ត ពីអង្គសន្និបាត សាខាកាកបាទក្រហមកម្ពុជា ខេត្តស្ទឹងត្រែងអាណតិ្តទី៦នេះ។ សំឡេងឆ្នោតគាំទ្រនេះជាសក្ខីកម្ម នៃការប្រគល់ជូន ឯកឧត្តម លោកជំទាវអស់លោក,លោកស្រី នូវភារកិច្ចដ៏ឧត្តុង្គឧត្តម ជាជំនួយការជូនអាជ្ញាធរសាធារណៈ ក្នុងវិស័យមនុស្សធម៌ នៅក្នុងបូរណៈភាពរដ្ឋបាលដែនដីខេត្តស្ទឹងត្រែង ចាប់ពីថ្ងៃនេះតទៅ។

ក្នុងនាមជាប្រធានគណៈកម្មាធិការថ្មី សំរាប់អាណត្តិទី៦នេះ ឯកឧត្តម សរ សុពុត្រា បានថ្លែងអំណរគុណចំពោះ សន្និបាត ដែលបានបោះឆ្នោតគាំទ្រនាពេលនេះ។ ដើម្បីឆ្លើយតបចំពោះទំនុកចិត្តដ៏ឧត្តុងឧត្តមខាងលើ ឯកឧត្តម សូមប្តេជ្ញាចិត្ត នឹងគោរពនូវគោលការណ៍គ្រឹះទាំង៧ របស់ចលនាកាកបាទក្រហម និងអឌ្ឍច័ន្ទក្រហម ,ខិតខំយកចិត្តទុកដាក់ ជួយសង្គ្រោះប្រជាពលរដ្ឋ ដែលងាយរងគ្រោះ និងរងគ្រោះដោយគ្រោះមហន្តរាយផ្សេងៗឱ្យបានទាន់ពេលវេលា,ពង្រឹងអ្នកស្ម័គ្រចិត្តនិងយុវជនកាកបាទក្រហមកម្ពុជាទាំងអស់ដែលបានបណ្តុះបណ្តាល, បំផុសផ្សព្វផ្សាយគោលការណ៍ និងសកម្មភាពនានា របស់កាកបាទក្រហមកម្ពុជា ក៏ដូចជាសកម្មភាពនានា របស់សាខា ដើម្បីចលនាឱ្យមានការចូលរួម ពីសំណាក់ប្រជាពលរដ្ឋ,ខិតខំដឹកនាំ និងមានទំនាក់ទំនងល្អជាមួយគណៈកិត្តិយសសាខា គណៈកម្មាធិការ សាខា ក្រុមប្រត្តិបត្តិ សាខា និងអនុសាខា ទូទាំងខេត្ត បំផុសចលនាគៀងគររកមូលនិធិពីគ្រប់មជ្ឈដ្ឋាន ដើម្បីនិរន្តភាពសកម្មភាពមនុស្សធម៌ឱ្យបានល្អប្រសើរចាប់ពីពេលនេះតទៅ៕ អត្ថបទ: សំ ងីម