ព័ត៌មាន

យុទ្ធនាការបរិច្ចាគឈាមក្នុងទិវានៃក្តីស្រឡាញ់ “ផ្តល់ឈាម ផ្តល់ក្តីស្រឡាញ់”

ភ្នំពេញ ៖ អ្នកស្ម័គ្រចិត្តបរិច្ចាគឈាម មកពីគ្រប់ទិសទីនៃទូទាំងខណ្ឌទាំង១៤ នៃរាជធានីភ្នំពេញ រួមមានសិស្ស, និស្សិត, យុវជនកាកបាទក្រហម, សប្បុរសជន, បុគ្គលិកវីតាល់ មីជាតិ មន្ត្រីរាជការ ក្រសួងស្ថាប័ន សរុបជាង១០០០នាក់ បានចូលរួមក្នុងយុទ្ធនាការបរិច្ចាគឈាមនាទិវានៃក្តីស្រឡាញ់ ក្រោមប្រធានបទ «ផ្តល់ឈាម ផ្តល់ក្តីស្រឡាញ់» ដែលបានប្រព្រឹត្តនៅក្នុងបរិវេណនៃមជ្ឈមណ្ឌលជាតិផ្តល់ឈាម នាថ្ងៃទី១៤ ខែកុម្ភៈ ឆ្នាំ២០២៥នេះ ដែលជាការសហការរៀបចំ និងឧបត្ថម្ភពីក្រុមហ៊ុន វ័ន ហ្វ្រេតធើនីធី (វីតាល់ និង មីជាតិ)។

យុទ្ធនាការបរិច្ចាគឈាមនាថ្ងៃនេះ បានរៀបចំឡើងក្នុងគោលបំណងក្នុងការជួបជុំអ្នកស្ម័គ្រចិត្តពីគ្រប់ទិសទី និងគ្រប់ស្រទាប់វណ្ណៈ រួមគ្នាផ្តល់អំណោយឈាម ដោយផ្សាភ្ជាប់អត្ថន័យនៃការចែករំលែកសេចក្តីស្រឡាញ់ និងអំពើល្អ ជូនចំពោះខ្លួនឯង និងមនុស្សជុំវិញខ្លួន តាមរយៈការបរិច្ចាគឈាមដោយស្ម័គ្រចិត្ត ដែលចេញពីបេះដូងពោរពេញដោយមនោសញ្ចេតនា និងសាមគ្គីភាព ។

ឯកឧត្តមវេជ្ជបណ្ឌិត ហុក គឹមចេង អគ្គនាយកបច្ចេកទេស នៃក្រសួងសុខាភិបាល និងលោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា បានកោតសរសើរចំពោះ មជ្ឈមណ្ឌលជាតិផ្ដល់ឈាម ក្នុងការរៀបចំកម្មវិធីបរិច្ចាគឈាមនាថ្ងៃនេះឡើងក្នុងគោលបំណងជួយជំរុញចលនាបរិច្ចាគឈាមស្ម័គ្រចិត្តឱ្យកាន់តែមានចំនួនច្រើនឡើងពីមួយឆ្នាំទៅមួយឆ្នាំ និងបានថ្លែងអំណរគុណដល់សប្បុរសជនបរិច្ចាគឈាមស្ម័គ្រចិត្តគ្រប់រូប ដែលបានចូលរួមចំណែកធ្វើឱ្យប្រសើរឡើងនូវសុខភាព និងសុខមាលភាព របស់ប្រជាជនកម្ពុជា ដែលជាការចែករំលែកជីវិតដល់ជនរងគ្រោះ និងអ្នកជំងឺគ្រប់ប្រភេទ ជាច្រើននាក់នៅកម្ពុជា។ ឆ្លៀតក្នុងឱកាសនេះ ឯកឧត្តមវេជ្ជបណ្ឌិត ក៏បានកោតសរសើរ និងវាយតម្លៃខ្ពស់ទៅដល់ក្រុមហ៊ុន វ័ន ហ្វ្រេតធើនីធី (វីតាល់ និង មីជាតិ) តែងតែចូលរួមគាំទ្រ និងផ្សព្វផ្សាយនូវរាល់សកម្មភាពបរិច្ចាគឈាមនាពេលកន្លងមក។

លោកជំទាវអ្នកឧកញ៉ា ជឹង សុគន្ធាវី អគ្គនាយិកាប្រតិបត្តិក្រុមហ៊ុន វ័ន ហ្វ្រេតធើនីធី (វីតាល់ និងមីជាតិ) កោតសសើរថ្នាក់ដឹកនាំនៃមជ្ឈមណ្ឌលជាតិផ្ដល់ឈាម ដែលផ្តួចផ្តើមឱ្យមានការរៀបចំកម្មវិធីនេះយ៉ាងទៀងទាត់ និងរៀងរាល់ឆ្នាំ ដើម្បីជាលទ្ធភាព និងឱកាសនៃការជួបជុំអ្នកស្ម័គ្រចិត្ត ក្នុងការផ្តល់អំណោយឈាម និងអត្ថន័យនៃការចែករំលែកសេចក្តីស្រឡាញ់ ជូនខ្លួនឯង ជូនមនុស្សជាទីស្រឡាញ់ និងមនុស្សជុំវិញខ្លួន ។ លោកជំទាវ បន្តថា វីតាល់ ក្រៅពីផ្តល់ជូននូវទឹកពិសាដែលមានគុណភាព, សុវត្ថិភាព, និងអនាម័យខ្ពស់ វីតាល់ តាមរយៈមូលនិធិ២៥រៀល បានចូលរួមចំណែកក្នុងទំនួលខុសត្រូវចំពោះការងារអភិវឌ្ឍសង្គម ជាមួយសកម្មភាពសប្បុរសធម៌នានា ដោយឈរលើសសរស្តុម្ភ ៤ ចំបង រួមមាន ៖ វិស័យអប់រំ, បរិស្ថាន, សុខាភិបាល-កីឡា និងសង្គម វប្បធម៌ សម្រាប់ជាគុណប្រយោជន៍ជូនសង្គមជាតិ និងដល់អតិថិជនរបស់យើង។ វីតាល់ ប្តេជ្ញានឹងបន្តចូលរួមឧបត្ថម្ភគាំទ្រដល់សកម្មភាពការងារ របស់មជ្ឈមណ្ឌលជាតិផ្ដល់ឈាម និងដំណើរការប្រមូលឈាម រួមទាំងយុទ្ធនាការ នៃការចុះប្រមូលផ្តល់អំណោយឈាម ដែលឈានទៅដល់ការពង្រីកវិសាលភាពប្រមូលឈាមបន្ថែមនៅតាមបណ្ដាខេត្ត នាថ្ងៃអនាគតផងដែរ។ នេះជាកិច្ចសហការរៀបចំ និងឧបត្ថម្ភគាំទ្រពីសំណាក់ វីតាល់ និងមីជាតិ ដែលសបញ្ជាក់យ៉ាងច្បាស់អំពីការចូលរួមយ៉ាងសកម្ម ក្នុងសកម្មភាពទំនួលខុសត្រូវសង្គមជាមួយនឹងការយកចិត្តទុកដាក់ ការស្រឡាញ់ និងចូលរួម ដើម្បីជាប្រយោជន៍ដល់សហគមន៍ និងសង្គមជាតិ ពីស្លាកសញ្ញា នៃផលិតផលរបស់ក្រុមហ៊ុន វ័ន ហ្វ្រេតធើនីធី «វីតាល់មោទនភាព ផលិតផលជាតិ»។

អ្នកស្ម័គ្រចិត្តចូលរួមបរិច្ចាគឈាមនាថ្ងៃនេះ មកពីក្រសួង ស្ថាប័ន និងសាលារាជធានីភ្នំពេញ ខណ្ឌទាំង១៤ និងអង្គភាពចំណុះ បានលើកឡើងរួមគ្នាថា ថ្ងៃនេះបានមកបរិច្ចាគឈាម សម្រាប់ការផ្តល់នៃកី្តស្រលាញ់ ជាពិសេសការផ្តល់ឈាមនេះ គឺជាយុទ្ធនាការមួយដ៏សំខាន់ ក្នុងការសង្រ្គោះអាយុជីវិតប្រជាពលរដ្ឋនៅទូទាំងព្រះរាជាណាចក្រកម្ពុជា។

លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាម បានឱ្យដឹងថា ក្នុងឆ្នាំ២០២៥នេះជាលើកទី៩ ដែលមជ្ឈមណ្ឌលជាតិផ្ដល់ឈាមនៃក្រសួងសុខាភិបាលបានរៀបចំឡើងយ៉ាងស្រស់ស្អាត ក្រោមប្រធានបទ «ផ្ដល់ឈាម ផ្ដល់ក្ដីស្រឡាញ់» គឺជាប្រធានបទដ៏មានអត្ថន័យសម្រាប់យើងទាំងអស់គ្នា និងមានគោលបំណងសំខាន់ ២គឺ ៖ ដើម្បីបង្កលក្ខណៈឱ្យយុវជន យុវនារី ប្រជាជនទូទៅចែករំលែកក្តីស្រឡាញ់របស់គាត់ដោយចូលរួមបរិច្ចាគឈាមជួយដល់ជនរងគ្រោះដែលត្រូវការឈាម។ ដើម្បីអំពាវនាវឱ្យគ្រប់អង្គភាព ស្ថាប័ន វិស័យឯកជន អង្គការជាតិ និងអន្តរជាតិចូលរួមចំណែកក្នុងភាពជាដៃគូជាមួយមជ្ឈមណ្ឌលជាតិផ្តល់ឈាមដើម្បីជំរុញលើកកម្ពស់ការបរិច្ចាគឈាមដោយស្ម័គ្រចិត្ត ។ លោកវេជ្ជបណ្ឌិត បន្តថា យើងត្រូវការឈាមមួយប្លោក ដើម្បីជួយសង្គ្រោះជីវិតអ្នកជំងឺរៀងរាល់ ៥នាទីម្តង ។ តម្រូវការឈាមប្រចាំថ្ងៃ សរុបមានពី៣០០ ទៅ៣៥០ ប្លោកនៅរាជធានីភ្នំពេញ។ តាមតួលេខបានបង្ហាញថា តម្រូវការឈាមក្នុងឆ្នាំ២០២៤កន្លងមកនេះ មានចំនួនអ្នកបរិច្ចាគឈាមដោយស្ម័គ្រចិត្ដ និងមិនទទួលកម្រៃ ចំនួន ៣៥,៦៧៥ប្លោក ស្មើនឹង ២២.៤០% នៃអំណោយឈាមទាំងអស់ ១៦៦,៥២៤ប្លោក។ តម្រូវការទូទាំងប្រទេសមានប្រមាណជាង ១៧៩,៣៣២ប្លោក ហើយមជ្ឈមណ្ឌលជាតិផ្តល់ឈាមបានគ្របដណ្តប់ជាង ៧៥%នៃការផ្គត់ផ្គង់ឈាមទូទាំងប្រទេស៕

អត្ថបទ រដ្ឋា