ឯកឧត្តម កែវ រ៉េមី អញ្ជើញជាអធិបតីក្នុងពិធី ពិនិត្យសុខភាព ជូនប្រជាពលរដ្ឋ​ក្នុង​ស្រុកគាស់​ក្រឡ ប្រមាណ ១៧០០នាក់

បាត់ដំបង៖ ឯកឧត្តម កែវ រ៉េមី ទេសរដ្ឋមន្រ្តីទទួលបន្ទុកបេសកកម្មពិសេស ប្រធាន​គណៈ​កម្មាធិការ​សិទ្ធិ​មនុស្សកម្ពុជា និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកគាស់ក្រឡ បាន​អញ្ជើញជាអធិបតីក្នុងពិធីពិនិត្យសុខភាពទូទៅជូនប្រជាពលរដ្ឋ នៅបរិវេណ​អនុវិទ្យាល័យ​ឆ្នាល់​មាន់ ស្រុកគាស់ក្រឡ ខេត្តបាត់ដំបង នាថ្ងៃអាទិត្យ ៤រោច ខែមាឃ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១៦ ខែកុម្ភៈ ឆ្នាំ២០២៥ ។

ពិធីនេះ​មានការអញ្ជើញចូលរួមពីសំណាក់ឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ និងជា​អនុ​ប្រធានទី១ ក្រុមការងាររាជរដ្ឋាភិបាលចុះមូលដ្ឋានស្រុកគាស់ក្រឡ, ក្រុមការងារ​រាជ​រដ្ឋាភិបាល​ចុះ​មូលដ្ឋានស្រុកគាស់ក្រឡ, ក្រុមប្រឹក្សា និងគណៈអភិបាលស្រុក, មេឃុំ, មន្ត្រីរាជការ​នៃ​រដ្ឋបាល​ស្រុក ព្រមទាំងលោកគ្រូ អ្នកគ្រូ យុវជន ស.ស.យ.ក និងសិស្សានុសិស្ស នៃអនុ​វិទ្យាល័យ​ឆ្នាល់មាន់។

កម្មវិធីនេះបានទទួលការឧបត្ថម្ភគាំទ្រពីលោកស្រី បាន រតនា ប្រធានសមាគម​ក្រុមគ្រូ​ពេទ្យ​ជំនាញ​វះកាត់ដើម្បីកម្ពុជា តាមរយៈសមាគមឱសថការីកម្ពុជា ដោយបានធ្វើការពិនិត្យព្យាបាលផ្ដោតលើរោគស្ត្រីជូនដល់ប្រជាពលរដ្ឋនៅឃុំឆ្នាល់មាន់ និងឃុំព្រះផុស ចាប់ពីអាយុ១៨ឆ្នាំឡើងទៅ សរុបប្រមាណ ១៧០០នាក់។

នៅក្នុងឱកាសនោះផងដែរ ឯកឧត្តមទេសរដ្ឋមន្រ្តីក៏បានផ្តល់ជូនអំពូលភ្លើងសឡាមួយចំនួន ជូនដល់សាលាស្រុកដើម្បីទុកប្រើប្រាស់បំភ្លឺផ្លូវជូនប្រជាពលរដ្ឋ និងបានប្រគល់សៀវភៅអានមួយចំនួន និងសម្ភារៈសិក្សាជូនដល់លោកគ្រូអ្នកគ្រូសម្រាប់ដាក់នៅបណ្ណាល័យចំនួន០៨ នៃសាលាបឋមសិក្សានៅក្នុងឃុំព្រះផុសផងដែរ៕