រដ្ឋមន្ត្រីក្រសួងសេដ្ឋកិច្ច ស្នើ UNDP បន្តគាំទ្រលើវិស័យអាទិភាព និងការអភិវឌ្ឍសេដ្ឋកិច្ចបៃតងនៅកម្ពុជា

ភ្នំពេញ ៖រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ស្នើដល់ អង្គការសហប្រជាជាតិ UNDP បន្តចូលរួមចំណែកគាំទ្រកម្ពុជាលើការអនុវត្តកម្មវិធីកែទម្រង់ ហិរញ្ញវត្ថុសាធារណៈ និងការកៀរគរហិរញ្ញប្បទានបន្ថែម ឆ្លើយតបនឹងតម្រូវការអាទិភាពរបស់រាជរដ្ឋាភិបាល ជាពិសេសការ អភិវឌ្ឍសេដ្ឋកិច្ចបៃតង។

​ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នៅក្នុង ជំនួបសម្តែងការគួរសម និងពិភាក្សាការងារជាមួយលោក អេនរីកូ ហ្គាវលីយ៉ា (Enrico Gaveglia) តំណាងកម្មវិធីអភិវឌ្ឍន៍ អង្គការសហប្រជាជាតិ (UNDP) ប្រចាំព្រះរាជាណាចក្រកម្ពុជា នៅថ្ងៃទី១៧ ខែកញ្ញា ឆ្នាំ២០២៥នេះ, ឯកឧត្តមអគ្គបណ្ឌិត សភាចារ្យបានស្វាគមន៍យ៉ាងកក់ក្ដៅ និងបានសម្តែងនូវការអបអរសាទរ ចំពោះលោកអេនរីកូ ហ្គាលីយ៉ា (Enrico Gaveglia) ដែលបានចូលកាន់តំណែងជាតំណាង UNDP ប្រចាំកម្ពុជា កាលពីពេលថ្មីៗនេះ និងបានត្រឡប់មកបំពេញ ការងារជាថ្មីម្តង ទៀតនៅកម្ពុជា។

ឯកឧត្តមអគ្គបណ្ឌិតសភាចារ្យ លើកឡើងថា UNDP គឺជាដៃគូយុទ្ធសាស្ត្រសំខាន់មួយរបស់កម្ពុជា ដែលបានរួម ចំណែកក្នុងការអភិវឌ្ឍវិស័យអាទិភាពរបស់រាជរដ្ឋាភិបាល ជាពិសេសតាមរយៈការផ្តល់ជំនួយបច្ចេកទេស និងការកសាង សមត្ថភាពស្ថាប័ន លើការរៀបចំក្របខ័ណ្ឌគោលនយោបាយ, ការសម្របសម្រួលការអនុវត្តគោលនយោបាយ, ការរៀបចំយន្ត ការតាមដាននិងត្រួតពិនិត្យ, និងការងារកំណែទម្រង់ថ្មីៗដូចជា ការធ្វើពិពិធកម្មប្រភពហិរញ្ញប្បទាន, ការអភិវឌ្ឍមូលបត្ររដ្ឋ, ការកៀរគរហិរញ្ញវត្ថុបៃតង, ការរៀបចំក្របខ័ណ្ឌគោលនយោបាយហិរញ្ញប្បទានជាតិ, និងការគាំពារសង្គមជាដើម និងបានស្នើ ឲ្យ UNDP បន្តចូលរួមចំណែកគាំទ្រកម្ពុជាលើការអនុវត្តកម្មវិធីកែទម្រង់ហិរញ្ញវត្ថុសាធារណៈ និងការកៀរគរហិរញ្ញប្បទាន បន្ថែមឆ្លើយតបនឹងតម្រូវការអាទិភាពរបស់រាជរដ្ឋាភិបាល ជាពិសេសការអភិវឌ្ឍសេដ្ឋកិច្ចបៃតង ក៏ដូចជា គាំទ្រកម្ពុជាក្នុងការ រៀបចំយុទ្ធសាស្ត្រសម្រាប់ការចាកចេញពីចំណាត់ក្រុមប្រទេសអភិវឌ្ឍតិចតួចផងដែរ ។

លោក អេនរីកូ ហ្គាវលីយ៉ា (Enrico Gaveglia) បានថ្លែងកោតសរសើរ និងវាយតម្លៃខ្ពស់ ចំពោះកិច្ចសហប្រតិបត្តិ- ការដ៏រឹងមាំរវាងរាជរដ្ឋាភិបាលកម្ពុជា និង UNDP កន្លងមក និងបានគូសរំលេចថា ក្រោមអាណត្តិបេសកកម្មថ្មីនេះ, UNDP នឹងផ្តល់អាទិភាពលើកិច្ចការសំខាន់មួយចំនួនដូចជា៖ ការរៀបចំក្របខ័ណ្ឌហិរញ្ញប្បទានជាតិ ដើម្បីឆ្លើយតបនឹងគោលដៅ អភិវឌ្ឍប្រកបដោយចីរភាព និងការសម្រេចនូវផែនការជាតិរួមចំណែកឆ្លើយតបការប្រែប្រួលអាកាសធាតុរបស់កម្ពុជា ដំណាក់ កាលទី៣, ការជំរុញការកៀរគរហិរញ្ញប្បទាន ជាពិសេសហិរញ្ញប្បទានបៃតង និងហិរញ្ញប្បទានអាកាសធាតុ, ការគាំទ្រដល់ កម្មវិធីកែទម្រង់ហិរញ្ញវត្ថុសាធារណៈ, កិច្ចគាំពារសង្គមដើម្បីចាកចេញពីភាពក្រីក្រ, ការវាយតម្លៃវិស័យសេដ្ឋកិច្ចឌីជីថល, និង Strategic Foresight Roadmap របស់ UNDP សម្រាប់កម្ពុជា៕

អត្ថបទ៖ សុន រ៉ាឌី