សុវត្ថិភាពប្រជាពលរដ្ឋជាអាទិភាពខ្ពស់បំផុត! ក្រុមការងារអង្គភាពស៊ីម៉ាក់ និងក្រុមការងារចម្រុះក្រុងសំរោង ចុះពិនិត្យ និងបោសសម្អាតយុទ្ធភ័ណ្ឌមិនទាន់ផ្ទុះក្នុងតំបន់រងការបាញ់ប្លោងដោយថៃឈ្លានពាន

ក្រុមការងារអង្គភាពស៊ីម៉ាក់ (CMAC) និងក្រុមការងារចម្រុះក្រុងសំរោង ខេត្តឧត្តរមានជ័យ នៅថ្ងៃទី១៣ ខែមករា ឆ្នាំ២០២៦នេះ លោក ប៊ុត វ៉ាន់ដេត អភិបាលរងក្រុង និងជាប្រធានលេខាធិការគណៈបញ្ជាការឯកភាពរដ្ឋបាលក្រុង ចុះពិនិត្យ និងបោសសម្អាតយុទ្ធភ័ណ្ឌមិនទាន់ផ្ទុះក្នុងតំបន់រងការបាញ់ប្លោង។

គោលបំណងនៃការចុះបេសកកម្ម ក្រុមការងារបានចុះពិនិត្យផ្ទាល់លើទីតាំងដែលមានការបាញ់ប្លោងពីសំណាក់យោធាឈ្លានពាន ដែលបន្សល់ទុកនូវរណ្ដៅគ្រាប់ និងយុទ្ធភ័ណ្ឌមិនទាន់ផ្ទុះ (UXO)។ កិច្ចការងារនេះគឺដើម្បី ស្វែងរក និងកំណត់សញ្ញាសម្គាល់៖ រកឱ្យឃើញនូវរណ្ដៅគ្រាប់ផ្ទុះ និងគ្រាប់មិនទាន់ផ្ទុះដែលបង្កប់ក្នុងដី។ បោសសម្អាតឱ្យអស់៖ ធានាថាទីតាំងលំនៅដ្ឋាន ជាអាទិ៍ភាពរបស់បងប្អូនគ្មានគ្រោះថ្នាក់។ ធានាសុវត្ថិភាពមុនត្រឡប់មកវិញ៖ ធានាឱ្យបាន ១០០% នូវសុវត្ថិភាព មុននឹងអនុញ្ញាតឱ្យប្រជាពលរដ្ឋត្រឡប់មករស់នៅជាប្រក្រតីវិញ។

សារអប់រំ និងវិធានការការពារខ្លួនសម្រាប់បងប្អូនប្រជាពលរដ្ឋ៖ ដើម្បីជៀសវាងគ្រោះថ្នាក់ជាយថាហេតុ រដ្ឋបាលក្រុងសំរោង អំពាវនាវដល់បងប្អូនប្រជាពលរដ្ឋទាំងអស់មេត្តាចូលរួមអនុវត្តវិធានការដូចខាងក្រោម៖

កុំប៉ះពាល់៖ ប្រសិនបើបងប្អូនឃើញវត្ថុចម្លែក រូបរាងដូចគ្រាប់កាំភ្លើង ឬយុទ្ធភ័ណ្ឌផ្សេងៗ សូមកុំប៉ះពាល់ កុំដំ កុំដុត ឬកុំរំកិលវាឱ្យសោះ។

ដាក់សញ្ញាសម្គាល់៖ សូមដាក់សញ្ញាសម្គាល់នៅក្បែរនោះ (ដូចជាចងក្រណាត់ក្រហម ឬដាក់មែកឈើ) ដើម្បីឱ្យអ្នកដទៃបានដឹង និងជៀសឆ្ងាយ។

រាយការណ៍បន្ទាន់៖ សូមផ្តល់ព័ត៌មានជាបន្ទាន់ដល់អាជ្ញាធរភូមិ ឃុំ ប៉ុស្តិ៍នគរបាល ឬក្រុមការងារស៊ីម៉ាក់ដែលនៅជិតបំផុត ឬតាមរយៈលេខទូរស័ព្ទ 088 8 65 9068/ 086 65 90 68 / 011 65 90 68

កុំចូលតំបន់ហាមឃាត់៖ មេត្តាកុំចូលទៅក្នុងតំបន់ដែលក្រុមជំនាញមិនទាន់បានត្រួតពិនិត្យរួចរាល់ ឬតំបន់ដែលមានសញ្ញាព្រមានគ្រោះថ្នាក់។

រដ្ឋបាលក្រុងសំរោង និងក្រុមការងារស៊ីម៉ាក់ ប្តេជ្ញានឹងខិតខំបំពេញភារកិច្ចនេះឱ្យបានឆាប់រហ័សបំផុត ដើម្បីផ្តល់នូវភាពកក់ក្តៅ និងសុវត្ថិភាពជូនបងប្អូនប្រជាពលរដ្ឋយើង៕