ឆ្នាំ២០២៥ កម្ពុជាពង្រីកទំហំពាណិជ្ជកម្មជាមួយបណ្តាប្រទេស RCEP កើនដល់ជាង ៤០​ពាន់​លាន​ដុល្លារ

រាជរដ្ឋាភិបាលកម្ពុជា បានឱ្យដឹងថា គិតក្នុងឆ្នាំ២០២៥កន្លងទៅ បណ្តា​ប្រទេស​ជា​សមាជិក​នៃ​កិច្ច​ព្រម​ព្រៀង​ភាព​ជាដៃគូសេដ្ឋកិច្ចគ្រប់ជ្រុងជ្រោយតំបន់ ឬហៅថា អាសិប (RCEP) ដែលជា​ទីផ្សារ​ដ៏​សំខាន់​សម្រាប់ការនាំចេញរបស់កម្ពុជា បានរួមចំណែកជិត ៦២% នៃ​ទំហំ​ពាណិជ្ជ​កម្ម​ទាំង​មូល​របស់​កម្ពុជា ដែលការណ៍នេះបាននាំឱ្យទំហំពាណិជ្ជកម្មរវាងកម្ពុជា និងបណ្តាប្រទេស RCEP កើន​ដល់​ជាង ៤០ពាន់លានដុល្លារ។

យោងតាមរបាយការណ៍របស់ក្រសួងពាណិជ្ជកម្ម កិច្ចព្រមព្រៀង​ភាព​ជា​ដៃ​គូ​សេដ្ឋ​កិច្ច​គ្រប់​ជ្រុង​ជ្រោយ​តំបន់ (RCEP) គឺជាកិច្ចព្រម​ព្រៀង​ពាណិជ្ជកម្មសេរីដែលផ្តួច​ផ្តើម​ឡើង​ដោយ​ប្រទេស​សមាជិក​អាស៊ាន​ទាំង ១០។ បច្ចុប្បន្ន RCEP មានសមាជិកចំនួន ១៥ប្រទេស ក្នុងនោះ ១០​ប្រទេស គឺជាសមាជិកអាស៊ាន និងចំនួន ៥ ផ្សេងទៀត រួមមាន ប្រទេសចិន ជប៉ុន កូរ៉េខាងត្បូង អូស្ត្រាលី និងនូវែលសេឡង់។

នៅក្នុងសន្និបាតបូកសរុបលទ្ធផលការងារកាលពីពេលកន្លងទៅ លោកជំទាវ ចម និម្មល រដ្ឋ​មន្រ្តី​ក្រសួង​ពាណិជ្ជកម្ម បានមានប្រសាសន៍ថា ក្នុងឆ្នាំ២០២៥កន្លងទៅ ពាណិជ្ជកម្ម​របស់​កម្ពុជា​នៅ​តែ​រក្សា​បាន​សន្ទុះរឹងមាំ ទោះបីជា សេដ្ឋកិច្ចពិពភលោកកំពុងប្រឈមនឹងភាពមិនប្រាកដប្រជា ដែល​បង្កឡើងដោយការប្រទាញប្រទង់ផ្នែកភូមិសាស្រ្តនិយោបាយ ការ​បែក​ខ្ញែក​ពាណិជ្ជ​កម្ម​សាកល ដោយមានការងើបឡើងវិញនៃនិន្នការឯកតោភាគីនិយម និងការផ្ទុះ​ឡើង​នូវ​ជម្លោះ​ព្រំដែន​ក៏​ដោយ។

លោកជំទាវរដ្ឋមន្រ្តី បានលើកឡើងបន្តថា ជាក់ស្តែង ក្នុងឆ្នាំ២០២៥ កម្ពុជាបានពង្រីក​ទំហំ​ពាណិជ្ជ​កម្ម​ ជាមួយប្រទេសដែលជាសមាជិកនៃ អាសិប ដែលមានទឹកប្រាក់ ៤០,២០​ពាន់​លាន​ដុល្លារ​។ ក្នុងនោះ ការនាំចេញរបស់កម្ពុជា មានទំហំ ៩,៨០ពាន់លានដុល្លារ កើនឡើង ៧,០១% បើ​ធៀបនឹងឆ្នាំ២០២៤។ លោកជំទាវ បានបន្តថា ក្រសួងពាណិជ្ជកម្ម បានបន្ត​ខិត​ខំ​ និង​ដឹក​នាំ​ចូល​​រួមយ៉ាងសកម្មជាមួយស្ថាប័នពាក់ព័ន្ធ ក្នុងការធ្វើសមាហរណកម្មសេដ្ឋកិច្ចទៅក្នុងតំបន់ និង​សាកលលោក និងធ្វើនូវពិពិធកម្មទីផ្សារនាំចេញ-នាំចូល។ ព្រមទាំងបន្តអនុវត្តនូវអភិក្រម ពង្រឹង​ទីផ្សា​ចាស់ ពង្រីកទីផ្សារថ្មី ដោយប្រកាន់ភ្ជាប់នូវការពង្រឹងពហុភាគី ឈរលើគោលការណ៍ច្បាប់ និង​ទីផ្សារបើកចំហរដែលផ្តល់នូវភាពប្រកដប្រជា អាចពន្យាករណ៍បាន តម្លាភាព បរិយាប័ន និង​ភាព​ប្រកួតប្រជែងស្មើគ្នាដោយពុំមានការរើសអើង។

បើយោងតាមរបាយការណ៍ដដែល ក្នុងឆ្នាំ២០២៥ ទំហំពាណិជ្ជកម្មរបស់កម្ពុជាបានកើនដល់ ៦៥,២៤​ពាន់លានដុល្លារអាម៉េរិក កើនឡើង ១៨% ធៀបនឹងឆ្នាំ២០២៤។ ក្នុងនោះ ការនាំ​ចេញ​សម្រេច​បាន​ទឹកប្រាក់ចំនួន ៣១,២៨ ពាន់លានដុល្លារអាម៉េរិក កើនឡើងប្រមាណ ១៧% ធៀប​នឹង​ឆ្នាំ​២០២៤​៕ អត្ថបទ៖ ឈិត បូរ៉ាវី