កម្ពុជាកំណត់គោលការណ៍ក្លិបចំនួន៤ មានកៅអីក្នុងការប្រកួតពានបាល់ទាត់ទ្វីបអាស៊ី ឆ្នាំ២០២៦/២៧

សហព័ន្ធកីឡាបាល់ទាត់កម្ពុជា បានជូនដំណឹងស្ដីពីគោលការណ៍កំណត់យកក្លិបបាល់ទាត់តំណាងជាតិ ចូល​រួមការប្រកួតបាល់ទាត់ទ្វីបអាស៊ី ឆ្នាំ២០២៦/២៧ ដោយមានបេក្ខភាព ៤ក្លិប ដែលនឹង​ទទួល​បាន​កៅ​អី​ចូល​រួម​ព្រឹត្តិការណ៍ប្រចាំទ្វីបនេះ។

យោងតាមសេចក្ដីជូនដំណឹងរបស់ក្រុមហ៊ុនខេមបូឌានព្រីមៀរលីគ កាលពីថ្ងៃពុធកន្លងទៅ សហព័ន្ធ​កីឡា​បាល់​ទាត់​កម្ពុជា បានសម្រេចក្នុងការកំណត់គោលការណ៍ ចំពោះក្លិបបាល់ទាត់តំណាងជាតិ ចូលរួម​ការ​ប្រកួត​ដែល​រៀបចំដោយសហព័ន្ធកីឡាបាល់ទាត់ទ្វីបអាស៊ី(AFC) សម្រាប់ឆ្នាំ២០២៦/២៧ ដោ​យ​ផ្អែក​សំខាន់​លើ​ចំណាត់ថ្នាក់របស់ក្លិបបាល់ទាត់ ចូលរួមការប្រកួតជម្រើសជើងឯក ខេមបូឌានព្រីមៀរលីគ និង​ពាន​រង្វាន់​សម្តេចអគ្គមហាសេនាបតីតេជោ ហ៊ុន សែន ឆ្នាំ២០២៥/២៦ ដែលបាន​បំពេញ​អាជ្ញា​បណ្ណ​ក្លិប​អន្តរជាតិ AFC Club Licensing ពេញលេញ តាមលំដាប់លំដោយ រួមមាន៖

១-ក្លិប​ដែលទទួលបានជើងឯកការប្រកួត ខេមបូឌានព្រីមៀរលីគ ឆ្នាំ២០២៥/២៦។

២-ក្លិបដែលទទួលបានចំណាត់ថ្នាក់លេខ២ នៃការប្រកួត ខេមបូឌានព្រីមៀរលីគ ឆ្នាំ២០២៥/២៦។

៣-ក្លិបដែលទទួលបានជើងឯក ពានរង្វាន់សម្តេចអគ្គមហាសេនាបតីតេជោ ហ៊ុន សែន ឆ្នាំ២០២៥/២៦។

៤-ក្លិបដែលទទួលបានចំណាត់លេខ៣ នៃការប្រកួត ខេមបូឌានព្រីមៀរលីគ ឆ្នាំ២០២៥/២៦។

ទន្ទឹម​ជាមួយគ្នាដែរ ប្រសិនបើក្លិបបាល់ទាត់ចូលរួមប្រកួតតំណាងជាតិទទួលបានជើងឯក AFC Challenge League នោះក្លិបបាល់ទាត់កម្ពុជា នឹងទទួលកូតាក្លិបបន្ថែមចំនួន ១ក្លិបទៀត ។ ដូច្នេះ​គោល​ការណ៍​កំណត់ក្លិបបាល់ទាត់ ដែលត្រូវចូលរួមប្រកួត នឹងអនុវត្តទៅតាមចំណាត់ថ្នាក់ដូចបានបញ្ជាក់ និ​ង​ស្រប​ទៅតា​មបទបញ្ជាចូលរួមប្រកួត AFC Club Competition Entry Regulations។

គួរដឹងថា សម្រាប់រដូវកាលឆ្នាំ២០២៦/២៧ ខាងមុខ ក្នុងចំណោមពានធំៗរៀបចំដោយ AFC កម្ពុជា បាន​ទទួល ១កៅអីកន្លះ ឬស្មើនឹង ២ក្រុម សម្រាប់ចូលរួមប្រកួតពានរង្វាន់ក្លិបបាល់ទាត់កម្រិតទី២ ឆ្នាំ​២០២៦​/២៧ (AFC Champions League Two ឆ្នាំ២០២៦/២៧ ពោលគឺក្រុមជើងឯកលីគ ត្រូវលេង​វគ្គ​ចែកពូល និងជើងឯករងលីគ ត្រូវលេងវគ្គជម្រុះ បន្ទាប់ពីចំណាត់ថ្នាក់លីគកំពូលកម្ពុជា បាន​ឡើង​ទៅ​ឈ​រ​លេខ​រៀងទី២៣ ក្នុងតារាងចំណាត់ថ្នាក់ AFC Club Competitions Ranking 2024//25 ក្រោយ​ពី​ក្លិប​ព្រះខ័នរាជស្វាយរៀង បានឡើងវគ្គផ្ដាច់ព្រ័ត្រពានរង្វាន់ AFC Challenge League 2024/25។

ក្រឡេក​មក​ចាប់អារម្មណ៍ការប្រកួត AFC Challenge League រដូវកាលឆ្នាំ២០២៥/២៦ នេះវិញ កម្ពុជា​មាន​បេក្ខភាព ២ក្រុមចូលរួមការប្រកួតក្របខណ្ឌពានរង្វាន់ទី៣ ទ្វីបអាស៊ីនេះផងដែរ រួមមានព្រះខ័ន​រាជ​ស្វាយ​រៀង ​និងភ្នំពេញក្រោន ដែលគ្រោងនឹងត្រូវជួបគ្នា ក្នុងវគ្គ ៨ក្រុមចុងក្រោយ នាខែមីនាខាងមុខ៕ អត្ថបទ លី ឈុនឡា