រដ្ឋបាលស្រុកសំឡូត៖ ទឹកស្ទឹងក្រញូង និងស្ទឹងបរឡាង ចាប់ផ្តើមហក់ឡើងពីមធ្យមទៅខ្លាំង

រដ្ឋបាលស្រុកសំឡូតបានឲ្យដឹងថា ចាប់ពីម៉ោងប្រមាណ ០១ រំលងអាធ្រាតយប់ ឈានចូលថ្ងៃទី១២ ខែកក្កដា ឆ្នាំ២០២៦ នៅឃុំទាំង៧ក្នុងស្រុកសំឡូតមានភ្លៀងធ្លាក់យ៉ាងខ្លាំង ធ្វើអោយស្ថានភាពទឹកតាមបណ្តាអូរតូចៗមានការកើនឡើងពីកម្រិត មធ្យមទៅខ្លាំង។ ចំណែកទឹកស្ទឹងក្រញូង និងស្ទឹងបរឡាង ចាប់ផ្តើមមានការកើនឡើងពីមធ្យម ទៅខ្លាំង។

រដ្ឋបាលស្រុកសំឡូតបានបញ្ចាក់ថា ឃុំតាតោក ទឹកហូរកាត់ស្ពាន ០១កន្លែង នៅចំណុចអូរថ្ម ស្ថិតក្នុងភូមិអូរតាទៀក ពុំអាចធ្វើដំណើរឆ្លងកាត់បានទេ និងហូរកាត់តាមបណ្តាផ្លូវមួយចំនួននៅភូមិភ្នំរៃ។

ឃុំតាសាញ ទឹកហូរកាត់ផ្លូវ ៥៧-៧ នៅចំនុចភូមិតាសាញត្បូង ប៉ុន្តែអាចធ្វើដំណើបានធម្មតា។គិតមកត្រឹមម៉ោង ១៤:២០នាទីរសៀល ថ្ងៃទី១២ ខែកក្កដា ឆ្នាំ២០២៦ ស្ថានភាពអាកាសធាតុមេឃនៅមានភ្លៀងបន្តមិនទាន់រាំងនៅឡើយ និងមានការលិចលង់ផ្ទះនិងដំណាំប្រជាពលរដ្ឋមួយចំនួនរបស់ប្រជាពលរដ្ឋនៅតាមមាត់អូរ និងមាត់ស្ទឹង។

ជាមួយគ្នានេះ រដ្ឋបាលស្រុកសំឡូតបានកំពុងបន្តតាមដាន និងណែនាំដល់កងកម្លាំងប្រដាប់អាវុធក្នុងស្រុក និងរដ្ឋបាលឃុំទាំង៧ តាមដាន នឹងត្រៀមអន្តរាគម ភ្លាមៗក្នុងករណីកើតឡើងជាយថាហេតុណាមួយ៕