ឯកឧត្តម គីម រិទ្ធី អភិបាលខេត្តព្រះវិហារ នាំយកចង្ហាន់ និងទេយ្យទានប្រគេនព្រះសង្ឃ ៤វត្ត ក្នុងស្រុកជាំក្សាន្ដ នាឱកាសបុណ្យកាន់បិណ្ឌទី១៣

នៅព្រឹកថ្ងៃទី០៩ ខែតុលា ឆ្នាំ២០២៦ ត្រូវនឹងថ្ងៃកាន់បិណ្ឌទី១៣ នៃពិធីបុណ្យភ្ជុំបិណ្ឌ ដែលជាប្រពៃណីជាតិដ៏ថ្លៃថ្លារបស់ខ្មែរ ឯកឧត្តម គីម រិទ្ធី អភិបាល នៃគណៈអភិបាលខេត្តព្រះវិហារ និងលោកជំទាវ សុខា គងពិសី អមដំណើដោយថ្នាក់ដឹកនាំខេត្ត មន្ត្រីរាជការ កងកម្លាំងប្រដាប់អាវុធ ព្រមទាំងពុទ្ធបរិស័ទជិតឆ្ងាយ បានអញ្ជើញរៀបចំ និងនាំយកនូវចង្ហាន់ បច្ច័យ និងទេយ្យទានជាច្រើនមុខ ទៅប្រគេនដល់ព្រះសង្ឃដែលកំពុងគង់ចាំព្រះវស្សាអស់ត្រីមាសនៅក្នុងវត្តចំនួន ៤ ស្ថិតក្នុងស្រុកជាំក្សាន្ដ រួមមាន វត្តកែវសិក្ខាគិរីស្វារៈ (វត្តប្រាសាទព្រះវិហារ) វត្តតេជោបុស្សស្បូវ, វត្តឈើទាលគង , និងវត្តអានសេះ។

ការអញ្ជើញប្រគេនចង្ហាន់ និងទេយ្យទាននាពេលនេះ ធ្វើឡើងក្នុងគោលបំណងចូលរួមទ្រទ្រង់ដល់វិស័យព្រះពុទ្ធសាសនា ដែលជាសាសនារបស់រដ្ឋ ឱ្យកាន់តែមានភាពរីកចម្រើន និងគង់វង្សស្ថិតស្ថេរ ព្រមទាំងដើម្បីថែរក្សា និងលើកស្ទួយទំនៀមទម្លាប់ប្រពៃណីជាតិខ្មែរដែលមានតាំងពីបុរាណកាលមក។

បន្ថែមពីនេះ ពិធីបុណ្យកាន់បិណ្ឌក៏ជាឱកាសដ៏ល្អសម្រាប់ពុទ្ធបរិស័ទក្នុងការឧទ្ទិសនូវកុសលផលបុណ្យទាំងឡាយ ជូនចំពោះបុព្វការីជន មានមាតាបិតា ជីដូនជីតា គ្រូឧបជ្ឈាយាចារ្យ និងជាពិសេសគឺឧទ្ទិសដល់ដួងវិញ្ញាណក្ខន្ធរបស់វីរយុទ្ធជន យុទ្ធនារី និងបព្វជិតទាំងអស់ ដែលបានលះបង់សាច់ស្រស់ ឈាមស្រស់ និងពលីជីវិតយ៉ាងក្លាហាន ក្នុងបុព្វហេតុការពារបូរណភាពទឹកដី និងអធិបតេយ្យភាពជាតិមាតុភូមិ។

ក្នុងឱកាសដ៏ប្រពៃនេះដែរ ឯកឧត្តម អភិបាលខេត្ត ព្រមទាំងសហការី និងពុទ្ធបរិស័ទទាំងអស់ ក៏បានរួមគ្នាតាំងចិត្តបួងសួងដល់វត្ថុស័ក្តិសិទ្ធិក្នុងលោក និងបារមីថែរក្សាទឹកដីនៃប្រាសាទព្រះវិហារ សូមជួយតាមបីបាច់ថែរក្សា និងប្រសិទ្ធពរជ័យ សិរីសួស្តី ជ័យមង្គល វិបុលសុខ និងភាពត្រជាក់ត្រជុំ ឱ្យកើតមានដល់ប្រជាពលរដ្ឋទាំងអស់នៅក្នុងខេត្តព្រះវិហារ ក៏ដូចជាប្រជាជនកម្ពុជាទូទាំងប្រទេស សូមឱ្យជួបតែសេចក្តីសុខ ចម្រើន មានសុខសន្តិភាព និងស្ថេរភាពយូរអង្វែងតរៀងទៅ៕