ក្រុមហ៊ុនក្នុងស្រុកមួយចំណាយទុនជាង ១០ លានដុល្លារ វិនិយោគលើការកែច្នៃអំបិលនៅខេត្តកំពង់ស្ពឺ

ក្រុមហ៊ុនក្នុងស្រុកមួយ នឹងបង្កើតរោងចក្រកែច្នៃអំបិលនៅក្នុងខេត្តកំពង់ស្ពឺ មានទុនវិនិយោគប្រមាណជាង ១០ លានដុល្លារអាមេរិក ដោយគម្រោងត្រូវបានយកចិត្តទុកដាក់ ក្រោមការគិតគូរដ៏ខ្ពង់ខ្ពស់របស់សម្តេចធិបតី នាយករដ្ឋមន្រ្តី ដែលបានចាត់ទុកជាយុទ្ធសាស្រ្តរួម ជំរុញដល់សន្តិសុខស្បៀងរបស់កម្ពុជា។

ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា លើកឡើងនៅក្នុងកិច្ចប្រជុំ ក្នុងផ្នែកកម្មន្តសាល សហគ្រាសធុនតូច និងមធ្យម និងសេវាក្រុម “គ” វេទិការាជរដ្ឋាភិបាល-ផ្នែកឯកជន នៅថ្ងៃទី៦ ខែសីហា ឆ្នាំ ២០២៦ នេះថា អំបិលគឺជាទំនិញយុទ្ធសាស្រ្តមួយ និងជាផលិតផលជាតិរបស់កម្ពុជា ដែលត្រូវតែគិតគូរវិស័យនេះឱ្យបានម៉ត់ចត់ ខណៈដែលប្រទេសយើងមានស្រែអំបិលច្រើន តែការផលិតមិនទាន់មានសម្ទុះល្អខ្លាំងក្លា ឆ្លើយតបទៅនិងតម្រូវការទីផ្សារ។

ឯកឧត្តម បន្ថែមឱ្យដឹងថា ជុំវិញការអភិវឌ្ឍន៍, ថ្មីៗនេះមានក្រុមហ៊ុនក្នុងស្រុកមួយ បានបោះទុនវិនិយោគលើការបង្កើតរោង ចក្រកែច្នៃអំបិល នៅក្នុងខេត្តកំពង់ស្ពឺ ដោយបានបោះទុនវិនិយោគប្រមាណជាង ១០ លានដុល្លារអាមេរិក ដោយក្នុងនោះសម្តេចធិបតី នាយករដ្ឋមន្រ្តី បានឯកភាពដ៏ខ្ពង់ខ្ពស់លើចំណារនៃរបាយការណ៍កិច្ចប្រជុំច្រលចេញចូលតែមួយ របស់ក្រុមប្រឹក្សាអភិវឌ្ឍន៍កម្ពុជា។ បញ្ហានេះ សម្តេចធិបតីក៏បានណែនាំឱ្យមានកិច្ចប្រជុំដាច់ដោយឡែកផងដែរ ពិនិត្យ ពិភាក្សា ជាពិសេសការលើកទឹកចិត្តនៅលើវិស័យ ពាក់ព័ន្ធ ដើម្បីជំរុញឱ្យដំណើរការទៅដោយរលូន។

លោក ប៊ុន ណារិន ប្រធានសមាគមអ្នកផលិតអំបិលកំពត-កែប លើកឡើងថា ជុំវិញការផលិតអំបិល កម្ពុជាបានអនុវត្តតាម ស្តង់ដារល្អប្រសើរ ក្នុងនោះអំបិលរបស់កម្ពុជាក៏បាននាំចេញទៅក្រៅប្រទេសផងដែរ។ ដោយឡែកជុំវិញការបង្កើតរោងចក្រកែច្នៃអំបិល ក្នុងស្រុក លោកក៏បានសម្តែងនូវការស្វាគមន៍ និងបានវាយតម្លៃខ្ពស់ ចំពោះគំនិតផ្តួចផ្តើមនេះ ព្រោះថា នៅពេលយើងមានរោងចក្រ កែច្នៃក្នុងស្រុក វានឹងស្រូបយកអំបិលទៅកែច្នៃ លើកកម្ពស់ដល់កសិករអ្នកផលិត និងការចូលរួមបង្កើតការងារជាដើម។

លោក ប៊ុន ណារិន បន្តថា ជុំវិញកាផលិតអំបិលរបស់កម្ពុជា នាប៉ុន្មានឆ្នាំមុន កសិកររបស់សមាគមធ្លាប់ផលិតអំបិលឡើង ដល់ប្រមាណក្នុងរង្វង់ ២០ម៉ឺនតោន ប៉ុន្តែនៅក្នុងឆ្នាំ២០២៦នេះ កសិករប្រមូលអំបិលបានប្រមាណ ៦ ទៅ ៧ ម៉ឺនតោនប៉ុណ្ណោះ នឹងរំពឹងថា នៅក្នុងឆ្នាំ២០២៧ កម្ពុជានឹងអាចប្រមូលអំបិលបានច្រើនជាងនេះ។

ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ និងជាសហប្រធាន លើកឡើងផង ដែរថា ការបង្កើតឱ្យមានខ្សែច្រវាក់ផលិតកម្មក្នុងវិស័យអំបិល គឺមានភាពចាំបាច់ ក្នុងការស្តារឡើងវិញដូចជាង បង្កើតឃ្លាំងស្តុក ក៏ដូច ជាម៉ាស៊ីនកែច្នៃជាដើម ដើម្បីជំរុញការប្រកួតប្រជែងរបស់កម្ពុជា ដែលជាទំនិញយុទ្ធសាស្រ្តជំរុញដល់សន្តិសុខស្បៀងផងដែរ៕

អត្ថបទ៖ សុន រ៉ាឌី