ក្រសួងការពារជាតិកម្ពុជា ធ្វើបទបង្ហាញ​ជូនអ​នុព័ន្ធ​យោធា​បរទេស​ពី​ស្ថានភាព​តាម​បណ្តោយ​ព្រំដែន​កម្ពុជា-ថៃ

ក្រសួងការពារជាតិកម្ពុជា នៅព្រឹកថ្ងៃទី០៣ ខែកញ្ញា នេះ បានធ្វើបទ​បង្ហាញ​ជូន​អនុព័ន្ធ​យោធា​បរទេស​ប្រចាំ​ព្រះរាជាណាចក្រកម្ពុជា (MACPP) ស្តីពីស្ថានភាពតាមបណ្តោយព្រំដែនកម្ពុជា-ថៃ នៅ​ទីស្តីការក្រសួងការពារជាតិ។

ឧត្តមសេនីយ៍ឯក រ៉ាត់ ដារ៉ារ័ត្ន រដ្ឋលេខាធិការក្រសួងការពារជាតិ បានថ្លែងថា អនុ​ព័ន្ធ​យោធា​បរទេស​ទាំង​អស់ជ្រាបស្រាប់ហើយថា មានការប្រែប្រួល​យ៉ាង​ខ្លាំង​កើត​ឡើង​ជា​ពិសេស​ការ​ផ្ទុះ​ឡើង​វិញនូវជម្លោះប្រដាប់អាវុធនៅតាមព្រំដែនក្នុងខែធ្នូ ឆ្នាំ២០២៥ ដែលបាន​ឈាន​ទៅ​ដល់​កិច្ច​ព្រម​ព្រៀង​ឈប់បាញ់កាលពីថ្ងៃទី២៧ ខែធ្នូ ឆ្នាំ២០២៥។ នៅថ្ងៃនេះ ក្រសួងការពារ​ជាតិ​កម្ពុជា​សូម​ផ្តល់​ជូននូវព័ត៌មានបច្ចុប្បន្នភាពសង្ខេបអំពីស្ថានភាពជាក់ស្តែងនាពេលបច្ចុប្បន្ននេះ ដោយ​ផ្តោត​លើ​ចំណុចសំខាន់ៗមួយចំនួនរួមមាន៖ ធ្វើបច្ចុប្បន្នភាពអំពីការវិវឌ្ឍន៍សំខាន់ៗនៃស្ថានភាពសន្តិសុខ ពិភាក្សាអំពីដំណើរការ នៃការអនុវត្តកិច្ចព្រមព្រៀងឈប់បាញ់ ថ្ងៃទី២៧ ខែធ្នូ ឆ្នាំ២០២៥ នាពេលបច្ចុប្បន្ននេះ ដោយរាប់បញ្ចូលទាំងវឌ្ឍនភាព និងបញ្ហាប្រឈមដែលនៅសេសសល់ និងផ្តល់ព័ត៌មានបច្ចុប្បន្នភាពអំពីយន្តការនានាដែលកំពុងត្រូវបានប្រើប្រាស់ ដើម្បីដោះស្រាយបញ្ហាដែលនៅសេសសល់ ផ្ទៀងផ្ទាត់ការវិវឌ្ឍន៍នានា និងកាត់បន្ថយហានិភ័យនៃការផ្ទុះការប៉ះទង្គិចប្រដាប់អាវុធជាថ្មី។

ឧត្តមសេនីយ៍ឯក បានបន្តថា នាពេលបច្ចុប្បន្ននេះ ការពិតដ៏សំខាន់បំផុតដូចដែលទាំងអស់គ្នាបានដឹងហើយនោះ គឺការប្រយុទ្ធគ្នាក្នុងទ្រង់ទ្រាយធំត្រូវបានបញ្ឈប់។ ទោះជាយ៉ាងណាក៏ដោយ អវត្តមាននៃអរិភាពក្នុងទ្រង់ទ្រាយធំ មិនត្រូវភាន់ច្រឡំថាស្ថានភាពបានវិលត្រឡប់ទៅរកស្ថិរភាពពេញលេញនោះឡើយ។ ស្ថានភាពនៅតាមព្រំដែននៅតែបន្តស្ថិតក្នុងភាពផុយស្រួយបំផុត។ ព្រំដែននៅតែបន្តមានភាពតានតឹង។ ជម្លោះជាមូលដ្ឋាននៅតែមិនទាន់ត្រូវបានដោះស្រាយនៅឡើយ។ ឧបទ្ទវហេតុដែលនៅតែបន្តកើតមាន ទាមទារឱ្យមានការគ្រប់គ្រងដោយការប្រុងប្រយ័ត្នខ្ពស់។ ហេតុដូច្នេះហើយ កម្ពុជានៅតែបន្តសង្កត់ធ្ងន់លើការអត់ធ្មត់ និងកិច្ចសន្ទនាដោយសន្តិវិធី។

គួរបញ្ជាក់ថា កម្ពុជាគោរព និងអនុវត្តយ៉ាងខ្ជាប់ខ្ជួននូវគ្រប់ចំណុចទាំងអស់ដែលមានចែង ទាំងក្នុងវិធានការកាត់បន្ថយភាពតានតឹង និងយន្តការសម្រាប់ការអនុវត្ត និងផ្ទៀងផ្ទាត់ ក៏ដូចជាស្មារតីរួមនៃសេចក្តីប្រកាសរួមនេះ។ ចាប់តាំងពីសេចក្តីប្រកាសរួមនេះចូលជាធរមានមកដល់បច្ចុប្បន្ន គណៈកម្មការ JBC ភាគីកម្ពុជា បានផ្ញើកំណត់ទូតជាច្រើនលើកហើយទៅសមភាគីថៃ ដើម្បីស្នើបើកកិច្ចប្រជុំពិសេស JBC និងស្នើចាត់បញ្ជូនក្រុមអ្នកជំនាញចម្រុះបន្តចុះវាស់វែងលើដីជាក់ស្តែង។ ប៉ុន្តែ ភាគីថៃ តែងរកលេសដើម្បីពន្យារពេលកិច្ចប្រជុំ និងការចុះវាស់វែងលើដីជាក់ស្តែងជាបន្តបន្ទាប់៕