NPIC ជំរុញទូរគមនាគមន៍ដោយផ្តល់ឱកាសឱ្យសិស្សអនុវត្តផ្ទាល់លើប្រព័ន្ធផ្កាយរណប និងរ៉ាដា

ភ្នំពេញ៖ មហាវិទ្យាល័យអេឡិចត្រូនិក និងទូរគមនាគមន៍ នៃវិទ្យាស្ថានជាតិពហុបច្ចេកទេសកម្ពុជា (NPIC) កំពុងពង្រឹងការបណ្តុះបណ្តាលជំនាញទូរគមនាគមន៍ទំនើប ដោយរួមបញ្ចូលទាំងប្រព័ន្ធទំនាក់ទំនងផ្កាយរណប វិទ្យុ រ៉ាដា បណ្តាញទូរសព្ទចល័ត និងប្រព័ន្ធទំនាក់ទំនងអុបទិក ដើម្បីឆ្លើយតបទៅនឹងតម្រូវការទីផ្សារការងារក្នុងយុគសម័យឌីជីថល តាមរយៈការអនុវត្តផ្ទាល់ជាមួយឧបករណ៍បច្ចេកទេសកម្រិតខ្ពស់។

លោក រស់ វណ្ណៈ ប្រធានស្តីទីមហាវិទ្យាល័យអេឡិចត្រូនិក និងទូរគមនាគមន៍ នៃវិទ្យាស្ថាន NPIC បានមានប្រសាសន៍ឱ្យដឹងថា មហាវិទ្យាល័យមិនត្រឹមតែផ្តោតលើការបណ្តុះបណ្តាលបច្ចេកវិទ្យាទំនើបៗចុងក្រោយដូចជា៖ ដ្រូន (Drone) , បញ្ញាសិប្បនិម្មិត (AI), រ៉ូបូតធីក (Robotics) , យានយន្តអគ្គិសនី (EV), វិទ្យាសាស្ត្រ IoT និងប្រព័ន្ធស្វ័យប្រវត្តកម្ម (Automation) ប៉ុណ្ណោះទេ ប៉ុន្តែក៏កំពុងសង្កត់ធ្ងន់ខ្លាំងលើជំនាញទូរគមនាគមន៍ផងដែរ។

លោកបានបញ្ជាក់ថា មហាវិទ្យាល័យមានបន្ទប់ពិសោធន៍សម្រាប់ជំនាញ អាចធ្វើការទំនាក់ទំនងដោយប្រើប្រាស់ Radio Communication តាមរយៈអង់តែនដែលមាននៅលើដំបូល ហើយអាចទាក់ទងទៅកាន់ប្រទេសប្រេស៊ីល ដែលជាប្រទេសឆ្ងាយមួយ។ មួយទៀត ក៏អាចធ្វើការទំនាក់ទំនងទៅកាន់ Satellite តាមរយៈ Ground Station ដែលវិទ្យាស្ថានបានដំឡើងនៅលើដំបូល។ លោកបន្ថែមថា ការអនុវត្តនេះត្រូវបានធ្វើឡើងជាប្រចាំ ដោយនិស្សិតអាចទំនាក់ទំនងទៅកាន់ប្រទេសផ្សេងៗតាមរយៈផ្កាយរណប ហើយមានការអនុវត្តជារៀងរាល់ល្ងាចថ្ងៃសុក្រ។ សមត្ថភាពនេះត្រូវបានចាត់ទុកថាជាផ្នែកមួយនៃការរៀនសូត្រដែលផ្តល់បទពិសោធន៍ជាក់ស្តែងដល់និស្សិត មុនពេលចូលទៅក្នុងទីផ្សារការងារ។

បើតាម លោក រស់ វណ្ណៈ គិតមកដល់បច្ចុប្បន្ន មហាវិទ្យាល័យបានបណ្តុះបណ្តាលនិស្សិតបានចំនួន ២០ជំនាន់ ហើយកំពុងត្រៀមចូលជំនាន់ទី២១ ដោយផ្តល់ការបណ្តុះបណ្តាលចាប់ពីកម្រិត Certificate រហូតដល់បរិញ្ញាបត្របច្ចេកវិទ្យា។ លោកបានចាត់ទុកជំនាញអេឡិចត្រូនិក និងទូរគមនាគមន៍ថា ជាជំនាញដែលមានសក្តានុពលខ្ពស់ ដោយសារតម្រូវការកម្លាំងពលកម្មនៅក្នុងវិស័យបច្ចេកវិទ្យាមានការកើនឡើង ខណៈចំនួនយុវជនដែលជ្រើសរើសសិក្សាជំនាញនេះនៅមានកម្រិត។

 ដោយសង្កេតឃើញថា ចំនួនសិស្សានុសិស្សដែលបានស្គាល់ និងយល់ដឹងពីជំនាញអេឡិចត្រូនិក និងទូរគមនាគមន៍នេះនៅមានកម្រិតតិចតួចនៅឡើយ វិទ្យាស្ថានជាតិពហុបច្ចេកទេសកម្ពុជា (NPIC) បានធ្វើការអំពាវនាវ និងលើកទឹកចិត្តយុវជន ក៏ដូចជាសិស្សានុសិស្សដែលទើបបញ្ចប់ការសិក្សាមធ្យមសិក្សាទុតិយភូមិ (បាក់ឌុប) ទាំងអស់ ឱ្យមកចាប់អារម្មណ៍ និងងាកមកជ្រើសរើសសិក្សាជំនាញមួយនេះឱ្យបានកាន់តែច្រើន។ នេះជាឱកាសមាសសម្រាប់យុវជនក្នុងការចាប់យកជំនាញពិតប្រាកដមួយ ដែលមិនត្រឹមតែធានាឱកាសការងារខ្ពស់ និងប្រាក់បៀវត្សរ៍សមរម្យប៉ុណ្ណោះទេ ប៉ុន្តែថែមទាំងបានចូលរួមចំណែកយ៉ាងសំខាន់ក្នុងការកសាងធនធានមនុស្សឆ្នើម ដើម្បីអភិវឌ្ឍវិស័យបច្ចេកវិទ្យាឌីជីថលរបស់ប្រទេសជាតិផងដែរ៕អត្ថបទ៖ ឈិត បូរ៉ាវី