ក្រសួងចំនួន៣ រួមគ្នារៀបចំអភិវឌ្ឍន៍តំបន់ការពារធម្មជាតិជីផាត ឱ្យទៅជា «គោលដៅលំហែបៃតង» ស្របតាមអនុសាសន៍ណែនាំដ៏ខ្ពង់ខ្ពស់របស់សម្តេចធិបតី

កិច្ចប្រជុំពិភាក្សាការងាររួមគ្នានេះ បានប្រព្រឹត្តទៅនាថ្ងៃទី៨ ខែកញ្ញា ឆ្នាំ២០២៦ ទីស្តីការក្រសួងបរិស្ថាន ក្រោមការដឹកនាំរួមគ្នាដោយ ឯកឧត្តម អ៊ាង សុផល្លែត រដ្ឋមន្ត្រីក្រសួងបរិស្ថាន ឯកឧត្តម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ និង ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍។

អនុវត្តតាមអនុសាសន៍ណែនាំដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ការរៀបចំឱ្យមានគោលដៅលំហែបៃតងនៅតំបន់ការពារធម្មជាតិជីផាតនេះ ត្រូវបានធ្វើឡើងក្នុងទិសដៅចម្បងៗដូចជា៖

ការផ្តល់អត្ថប្រយោជន៍ដោយផ្ទាល់ជូនប្រជាសហគមន៍៖ តាមរយៈការរៀបចំហេដ្ឋារចនាសម្ព័ន្ធរឹង និងទន់ ប្រកបដោយចីរភាព ដើម្បីបង្កើនប្រាក់ចំណូលជូនប្រជាសហគមន៍ រក្សាបាននូវគុណតម្លៃ និងសម្រស់ធម្មជាតិ ព្រមទាំងទប់ស្កាត់ការទន្ទ្រានយកដីពីភាគីខាងក្រៅដោយខុសច្បាប់។

ការអភិរក្សធនធានធម្មជាតិ និងរក្សាអត្តសញ្ញាណដើម៖ ទប់ស្កាត់ការកាប់បំផ្លាញព្រៃឈើ រក្សាអត្តសញ្ញាណធម្មជាតិដើមនៃតំបន់ជីផាត និងទាក់ទាញភ្ញៀវទេសចរឱ្យចូលរួមថែរក្សា ព្រមទាំងដាំដើមឈើបន្ថែម។

ការសម្រួលការធ្វើដំណើរ និងហេដ្ឋារចនាសម្ព័ន្ធ៖ សម្រួលដល់ការធ្វើដំណើររបស់ភ្ញៀវទេសចរឱ្យកាន់តែងាយស្រួល ដោយមិនប៉ះពាល់ដល់ការប្រកបរបរ ឬចំណូលប្រចាំថ្ងៃរបស់ប្រជាសហគមន៍ឡើយ។

ការបង្កើតរបៀងទេសចរណ៍ធម្មជាតិ៖ ភ្ជាប់សក្តានុពលទេសចរណ៍ក្នុងតំបន់ ដូចជា ខ្នងផ្សារ, តេទឹកពុះ, ស្ទឹងពពក, អូរម្លូ និងអូរសរឡៅ ជាដើម ដើម្បីទាក់ទាញភ្ញៀវទេសចរឱ្យមកទស្សនាបានច្រើនកន្លែង និងមកកម្សាន្តជាបន្តបន្ទាប់។

កិច្ចសហការយ៉ាងជិតស្និទ្ធរវាងក្រសួងទាំងបីនេះ នឹងអភិវឌ្ឍន៍តំបន់ជីផាតឱ្យក្លាយជាគោលដៅលំហែបៃតងប្រកបដោយចីរភាព ជួយលើកកម្ពស់ជីវភាពប្រជាសហគមន៍មូលដ្ឋាន និងរួមចំណែកយ៉ាងសំខាន់ក្នុងការការពារធនធានធម្មជាតិកម្ពុជា៕