អ្នកវិភាគ៖ ដំណោះស្រាយជម្លោះដែនសមុទ្រកម្ពុជា-ថៃ តាមយន្តការ UNCLOS កម្ពុជា អាចមានប្រៀបខាងផ្លូវច្បាប់

ការដោះស្រាយជម្លោះដែនសមុទ្រកម្ពុជា-ថៃ តាមរយៈ UNCLOS ប្រទេសកម្ពុជាអាចមានប្រៀ​​​​បខាងផ្លូវច្បាប់ ឯកសារ និងបទដ្ឋានគតិយុត្តនានា។ នេះបើ​តាម​ការ​យល់​ឃើញ​របស់​អ្នក​វិភាគ​គោល​នយោបាយ​អន្តរជាតិ នៃរាជបណ្ឌិត្យសភាកម្ពុជា។

បណ្ឌិត ស៊ឺន សំ អ្នកវិភាគគោលនយោបាយអន្តរជាតិ នៃរាជបណ្ឌិត្យសភាកម្ពុជា នៅ​ថ្ងៃ​ទី​១៤ ខែ​កញ្ញា ឆ្នាំ២០២៦នេះ បានមានប្រសាសន៍ថា  ការណ៍ដែរ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ បាន​ដឹក​នាំ​គណៈ​ប្រតិភូ​កម្ពុជា​ចូល​រួម​កិច្ច​ប្រជុំ​លើក​ដំបូង UNCLOS នៅប្រទេសសិង្ហបុរី ពាក់ព័ន្ធនឹងការ​ដោះ​ស្រាយ​ជម្លោះ​ដែន​សមុទ្រ​កម្ពុជា​-ថៃ គឺជាចំណុចល្អមួយ នៃចាប់ផ្តើម ក៏ប៉ុន្តែកម្ពុជាពោពេញដោយការប្រុងប្រយ័ត្ន ពី​ព្រោះ​រឿង​នេះ ពាក់ព័ន្ធនឹងដែនអ​​ធិបតេយ្យ​​ភាពរបស់កម្ពុជា ពាក់ព័ន្ធទៅនឹងឯកសារអន្តរជាតិ ច្បាប់​អន្តរជាតិ ជាពិសេសកេរ្តិ៍ឈ្មោះប្រ​ទេ​​​ស​កម្ពុជា ដែលនឹងត្រូវបានចាក់ទុកជាប្រវត្តិសាស្រ្តផងដែរ។ បណ្ឌិត ស៊ឺន សំ បានគូសបញ្ជាក់ថា ការលើកឡើងយ៉ាងដូច្នេះ មិនមែនមានន័យថា ជាទំនួល​ខុស​ត្រូវ​របស់ភាគីកម្ពុជាតែម្ខាងនោះទេ ពោលគឺជាទំនួលខុសត្រូវរបស់សហគមន៍អន្តរជាតិ ជា​ពិសេស​គណៈកម្មការផ្សះផ្សាទាំង៥រូបរបស់ UNCLOS ដែលត្រូវធ្វើការដោយមានតម្លាភាព យុត្តិធម៌ សម្រាប់ប្រទេសកម្ពុជា និងប្រទេសថៃ។

បណ្ឌិត ស៊ឺន សំ បានបន្តទៀតថា បើមើលតាមលទ្ធភាពកម្ពុជា អាចមានប្រៀបលើភាគីថៃ ខាងផ្លូវច្បាប់ ឯកសារ និងបទដ្ឋានគតិយុត្តទាំងឡាយ។ ការមានប្រៀបនេះ មិនមែនមានន័យថា កម្ពុជាខុសទៅបំពាន កេងចំណេញទៅលើប្រទេសថៃនោះទេ ពោលគឺកម្ពុជាឈរលើភាពត្រឹមត្រូវ ឯកសារប្រវត្តិសាស្រ្ត និងច្បាប់អន្តរជាតិ។ យ៉ាងណាក្តី កម្ពុជាក៏ត្រូវមានការប្រុងប្រយ័ត្នដែរ ពីព្រោះប្រទេសថៃពូកែណាស់បញ្ចុះបញ្ជូលអ្នកពាក់ព័ន្ធ​ ជាពិសេសបង្កើតសាច់រឿងតូចៗ ដោយឲ្យកម្ពុជារវល់តាមដោះស្រាយសាច់រឿងទាំងនោះ គ្មានពេលវេលាគ្រប់សម្រាប់ដោះស្រាយសាច់រឿងណាមួយជាក់លាក់។

ឯកឧត្តម ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ ក្នុងនាមជាភ្នាក់ងារកម្ពុជា នៅថ្ងៃទី១៣ខែកញ្ញាម្សិលមិញ បានអញ្ជើញដឹកនាំគណៈប្រតិភូប្រតិភូកម្ពុជា និងក្រុមច្បាប់ ចូលរួមកិច្ចប្រជុំលើកដំបូង នៃគណៈកម្មការផ្សះផ្សា នៃអនុសញ្ញាអង្គការសហប្រជាជាតិស្តីពីនីតិសមុទ្រ(UNCLOS) ដែលប្រព្រឹត្តទៅពីថ្ងៃទី១៤ ដល់ថ្ងៃទី១៦ ខែកញ្ញា ឆ្នាំ២០២៦ ស្ថិតនៅប្រទេសសិង្ហបុរី។ សុន្ទរកថាបើកកិច្ចប្រជុំ នឹងធ្វើនៅថ្ងៃអង្គារ ទី១៥ ខែកញ្ញា ឆ្នាំ២០២៦ វេលាម៉ោង ៨:០០ ព្រឹក ម៉ោងនៅកម្ពុជា ត្រូវនឹងម៉ោង ៩:០០ ព្រឹក ម៉ោងនៅប្រទេសសិង្ហបុរី ។ កិច្ចប្រជុំនេះ នឹងបើកជាសាធារណៈ និងផ្សាយបន្តផ្ទាល់តាមប្រព័ន្ធអ៊ិនធឺណិត (webcast) ជាភាសាខ្មែរ អង់គ្លេស និងថៃ ក៏ដូចជាតាមទូរទស្សន៍ជាតិកម្ពុជា។ រីឯសុន្ទរកថា បើករបស់កម្ពុជា នឹងថ្លែងដោយ ឯកឧត្តម ឧបនាយករដ្ឋមន្ត្រី ប្រាក់ សុខុន៕ អត្ថបទ៖ទូច សោភ័ណ