ការនាំចេញកៅស៊ូរបស់កម្ពុជាកើន ៤៥% រកចំណូលបានជាង ៥៦០លានដុល្លារ ក្នុង៧ខែឆ្នាំ២០២៦

ភ្នំពេញ៖ កម្ពុជារកចំណូលបានជាង ៥៦០លានដុល្លារអាមេរិក ពីការនាំចេញជ័រកៅស៊ូ និងផលិតផលកៅស៊ូ ក្នុងរយៈពេល ៧ខែនៃឆ្នាំ២០២៦ កើនឡើង ៤៥ ភាគរយ បើធៀបនឹងរយៈពេលដូចគ្នាកាលពីឆ្នាំ២០២៥។

ឯកឧត្តម ឃីម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ប្រាក់ចំណូលពីការនាំចេញជ័រកៅស៊ូ និងផលិតផលកៅស៊ូ ក្នុងរយៈពេល៧ខែនេះ សម្រេចបានជាទឹកប្រាក់សរុបជាង ៥៦៣,៤៦លានដុល្លារអាមេរិក កើនឡើង ៤៥,៤៣ ភាគរយ បើធៀបនឹងរយៈពេលដូចគ្នាកាលពីឆ្នាំមុន​។ ក្នុងនោះ ចំណូលពីការនាំចេញជ័រកៅស៊ូ មានចំនួនជាង ៣៤៦,០៣លានដុល្លារអាមេរិក និងចំណូលពីការលក់ជ័រកៅស៊ូក្នុងស្រុកចំនួន ២០៣,៣៦លានដុល្លារអាមេរិក ខណៈចំណូលពីការនាំចេញឈើមានចំនួន ១៤,០៦លានដុល្លារអាមេរិក។ ដោយឡែក គ្រាន់តែក្នុងមួយខែកក្កដា ប្រាក់ចំណូលពីការនាំចេញជ័រកៅស៊ូ និងផលិតផលកៅស៊ូ សម្រេចបានជាង ១១១លានដុល្លារអាមេរិក។

ឯកឧត្តម បន្ថែមទៀតថា តម្លៃលក់ជ័រកៅស៊ូគិតជាមធ្យម គិតត្រឹមខែកក្កដា ឆ្នាំ២០២៦ (រយៈពេល៧ខែ) ថ្លៃ ១ ៨៧៥ដុល្លារអាមេរិកក្នុងមួយ​តោន កើនឡើង ៦៤ ដុល្លារអាមេរិកក្នុងមួយ​តោន ស្មើនឹង ៣,៥% ធៀបនឹងរយៈពេលដូចគ្នាក្នុងឆ្នាំ២០២៥។ ចំណែក តម្លៃលក់ជ័រកៅស៊ូក្នុងស្រុកគិតជាមធ្យមគិតត្រឹមខែកក្កដា ឆ្នាំ២០២៦ (រយៈពេល៧ខែ) ថ្លៃ ១ ៩១៩ ដុល្លារអាមេរិកក្នុងមួយ​តោន កើនឡើង ៦៦ ដុល្លារអាមេរិកក្នុងមួយតោន ស្មើនឹង ៣,៥% ធៀបនឹងរយៈពេលដូចគ្នាក្នុងឆ្នាំ២០២៥។

ឯកឧត្តម កត់សម្គាល់ថា ក្នុងខែកក្កដា ឆ្នាំ២០២៦នេះ សកម្មភាពការងារនៅក្នុងខែ្សច្រវាក់តម្លៃកៅស៊ូ នៅតាមបណ្តាក្រុមហ៊ុនចម្ការកៅស៊ូ និងកៅស៊ូគ្រួសារបានដំណើរការជាធម្មតា​ និងពុំមានផលប៉ះពាល់ជាអវិជ្ជមានបណ្តាលមកពីការឈ្លានពានរបស់ថៃនោះទេ។​

របាយការណ៍របស់ក្រសួងកសិកម្ម រុក្ខាប្រមាញ់ និងនេសាទ​ បានបញ្ជាក់ថា ក្នុង​រយៈពេល៧ខែឆ្នាំ២០២៦ កម្ពុជា​បាននាំចេញជ័រកៅស៊ូក្នុងបរិមាណចំនួន ១៨៤,៥៦០តោន កើនឡើង ២៥,៧% ខណៈការនាំចេញឈើកៅស៊ូចំនួន ៦១,៨៧៨ ម៉ែត្រគូប កើន ៤៤១ ភាគរយ ធៀបនឹងរយៈពេលដូចគ្នាក្នុងឆ្នាំ២០២៥។ គិតមកដល់ពេលនេះ កម្ពុជាមានផ្ទៃដីដាំដុះកៅស៊ូសរុប ៤៤៨, ០៥១ហិកតា ក្នុងនោះ ផ្ទៃដីចៀរជ័រមានចំនួន ៣៥៧,៤៨៣ហិកតា ស្មើនឹង៨០% និងផ្ទៃដីថែទាំ មានចំនួន ៩០ ៥៦៨ ហិកតា ស្មើនឹង២០%៕អត្ថបទ៖ ធូ វិរៈ