រយៈពេលបីឆ្នាំ អាជ្ញាធរបង្ក្រាបបទល្មើសគ្រឿងញៀនជាង ៣ម៉ឺនករណី និង​រឹប​អូស​គ្រឿង​ញៀនជាង ២៦តោន

រយៈពេលបីឆ្នាំ នៃរាជរដ្ឋាភិបាលអាណត្តិទី៧នេះ អាជ្ញាធរមានសមត្ថកិច្ច បានបង្ក្រាប​បទ​ល្មើស​គ្រឿង​ញៀន​ជាង បីម៉ឺនករណី និងបានឃាត់ខ្លួនជនសង្ស័យជាង៨ម៉ឺននាក់។

របាយការណ៍រ​បស់ក្រសួងមហាផ្ទៃ បានបង្ហាញថា គិតចាប់ពីដើមអាណត្តិទី៧ នៃ​រាជ​រដ្ឋាភិបាល​កម្ពុជា ពោលនៅខែសីហា ឆ្នាំ២០២៣ រហូតដល់ឆមាសទី១ នៃឆ្នាំ២០២៦នេះ សមត្ថកិច្ចចម្រុះ គិត​ចាប់​ពីថ្នាក់ជាតិ ដល់រដ្ឋបាលក្រោមជាតិ ចំណុះក្រសួងមហាផ្ទៃ បានបើក​ប្រតិបត្តិការ​បង្ក្រាប​គ្រឿង​ញៀន សរុប៣៤,១៤៩ករណី និងបានឃាត់ជនសង្ស័យ ៨៧,៣៨២នាក់ និងដកហូត និង​រឹបអូសសារធាតុញៀនគ្រប់ប្រភេទជាង២៦តោន ។

ក្រសួង​មហាផ្ទៃ បានចាត់ទុកលទ្ធផល នៃប្រតិបត្តិការបង្ក្រាបទាំងនេះ គឺជា​ស្នាដៃ​កម្លាំ​ង​នគរបាល​ជាតិ គិតចាប់តាំងពីថ្នាក់ក្រសួង មន្ទីរ រហូតដល់មូលដ្ឋានឃុំសង្កាត់ ដែល​បាន​ខិតខំ​ស៊ើប​អង្កេត​ស្រាវ​ជ្រាវ និងឈានទៅដល់ការបង្ក្រាបប្រកបដោយស្មារតីវិជ្ជាជីវៈ និងការតាំងចិត្តខ្ពស់ ព្រោះ​ប្រតិបត្តិ​ការ​នេះ ទាមទារនូវការប្រយុទ្ធប្រឆាំងជាមួយក្រុមឧក្រិដ្ឋជនកាចសាហាវ ប្រដាប់​ដោយ​អាវុធ អាចប្រឈមនឹងគ្រោះថ្នាក់គ្រប់ពេលវេលា។

ដើម្បីពង្រឹងប្រសិទ្ធភាព នៃការបង្ក្រាបបទល្មើសគ្រឿងញៀន អាជ្ញាធរជាតិ​ប្រយុទ្ធ​ប្រឆាំង​គ្រឿង​ញៀន ​បានដាក់ឲ្យដំណើរការ App NoDrug អស់ជាងពីរឆ្នាំកន្លងមកហើយ ហើយជាលទ្ធផល គិត​ត្រឹម​បច្ចុប្បន្ននេះ មានពលរដ្ឋអ្នកប្រើប្រាស់សរុប ៩៨,៥៤០នាក់ និងបានចូលរួមផ្តល់ព័ត៌មាន បាន​ចំនួន៨៦៩៨ករណី។

គួរបញ្ជាក់ថា ក្នុងអាណត្តិទី៧នេះ ក្រសួងមហាផ្ទៃ បានអនុវត្តគោលការណ៍សម្អាតផ្ទះយើង ដោយ​បាន​បំពេញកាតព្វកិច្ចពិនិត្យសារធាតុញៀនលើមន្ត្រីទាំងបីប្រភេទ ចំណុះ​ក្រប​ខ័ណ្ឌក្រ​សួង​មហា​ផ្ទៃ ក្នុងនោះមន្ត្រីមានផ្ទុកសារធាតុញៀនមួយចំនួន ត្រូវបានបណ្តេញចេញពីក្របខ័ណ្ឌ។ ទន្ទឹមគ្នានោះដែរ ចំពោះ​មន្ត្រី​អនុវត្ត​ការងារ​ពាក់ព័ន្ធ​នឹង​ការ​ប្រយុទ្ធ​ប្រឆាំង​គ្រឿង​ញៀន​ដែល​ខ្វះ​ការ​ទទួល​ខុស​ត្រូវ ក៏ត្រូវបានបន្ថយឋានន្តរសក្តិ ឬផ្លាស់ប្តូរមុខដំណែង ខណៈមន្ត្រីដែលចូលដៃជើង ឬ​ពាក់​ព័ន្ធបទល្មើសគ្រឿងញៀន ត្រូវបានអនុវត្តវិធានការច្បាប់ជាធរមានផងដែរ៕