ព័ត៌មាន
កម្ពុជាដាក់ឱ្យប្រើប្រាស់ជាផ្លូវការ «គេហទំព័រមន្ទីរព័ត៌មានរាជធានី-ខេត្ត» ដើម្បីពង្រឹងការផ្សព្វផ្សាយ និងសាធារណៈមតិ
នៅព្រឹកថ្ងៃទី២១ ខែកញ្ញា ឆ្នាំ២០២៦នេះ ក្រសួងប្រៃសណីយ៍ និងទូរគមនាគមន៍ សហការជាមួយក្រសួងព័ត៌មាន បានរៀបចំពិធីប្រកាសដាក់ឱ្យប្រើប្រាស់ជាផ្លូវការនូវ «គេហទំព័រមន្ទីរព័ត៌មានរាជធានី–ខេត្ត» ក្នុងគោលបំណងលើកកម្ពស់ប្រសិទ្ធភាពនៃការផ្សព្វផ្សាយព័ត៌មាន ការជួយសម្រួលដល់ការទទួលបានព័ត៌មានពិត និងការផ្តល់សេវាសាធារណៈជូនប្រជាពលរដ្ឋនៅមូលដ្ឋានឱ្យកាន់តែទូលំទូលាយ ឆាប់រហ័ស និងមានតម្លាភាព។
ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន នៅក្នុងពិធីនេះ បានមានប្រសាសន៍ឱ្យដឹងថា ការដាក់ឱ្យដំណើរការគេហទំព័ររួមរបស់មន្ទីរព័ត៌មានរាជធានី-ខេត្តទាំង២៥ នៅថ្ងៃនេះ គឺជាជំហានដ៏សំខាន់មួយក្នុងការឆ្លើយតបនឹងតម្រូវការថ្មីនេះ។ តាមរយៈការបង្កើត «អត្តសញ្ញាណឌីជីថលរួម» ក្រោមដែនជាតិ «.info.gov.kh» កំពុងបង្កើតភាពងាយស្រួលក្នុងការស្គាល់ និងស្វែងរកប្រភពព័ត៌មានផ្លូវការរបស់មន្ទីរព័ត៌មានរាជធានី-ខេត្ត។ អត្តសញ្ញាណរួមនេះ គឺជាចំណុចសំខាន់មួយសម្រាប់ការកសាងទំនុកចិត្ត។
ឯកឧត្តមរដ្ឋមន្រ្តីព័ត៌មាន បានគូសបញ្ជាក់ថា ការសម្ពោធគេហទំព័រទាំង២៥ នេះដែរ ក៏មិនមែនជាចំណុចបញ្ចប់ទេ គឺជាចំណុចចាប់ផ្តើមនៃដំណើរថ្មីមួយ។ ក្រសួងព័ត៌មាន នឹងបន្តពង្រឹងសមត្ថភាពមន្ត្រីព័ត៌មាននៅថ្នាក់ជាតិ និងថ្នាក់ក្រោមជាតិ លើជំនាញសារព័ត៌មានឌីជីថល ការផលិតមាតិកាពហុប្រព័ន្ធ ការគ្រប់គ្រងថ្នាលឌីជីថល និងជំនាញថ្មីៗដែលចាំបាច់សម្រាប់សម័យបច្ចេកវិទ្យា។ ហើយក៏នឹងបន្តសិក្សា និងជំរុញការប្រើប្រាស់បច្ចេកវិទ្យាបញ្ញាសិប្បនិម្មិត (AI) ឱ្យស្របតាមតម្រូវការការងារ និងមានការទទួលខុសត្រូវ ដើម្បីជួយបង្កើនប្រសិទ្ធភាពក្នុងការផលិត និងគ្រប់គ្រងមាតិកាផងដែរ។
នៅក្នុងឱកាសនេះ ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានវាយតម្លៃខ្ពស់ និងចាត់ទុកការងារនេះថា គឺជាការលើកកម្ពស់ និងការយល់ដឹងក្នុងការទទួលបានព័ត៌មានគ្រប់វិស័យទាំងអស់នៅទូទាំងប្រទេសកម្ពុជា។
ឯកឧត្តម ជា វ៉ាន់ដេត បានមានប្រសាសន៍បន្តថា នៅក្នុងក្រសួងប្រៃសណីយ៍ និងទូរគមនាគមន៍ បានរៀបចំការងារមួយចំនួន ដើម្បីសម្រាប់ក្រសួងផង ហើយនិងសម្រាប់ចូលរួមនៅក្នុងកិច្ចសហការជាមួយក្រសួង ស្ថាប័នដទៃទៀតផង។ ជាពិសេសកិច្ចការមួយចំនួដែលពាក់ព័ន្ធបច្ចេកវិទ្យាឌីជីថល ក្រសួងបានរៀបចំគោលនយោបាយ និងច្បាប់ជាច្រើន ដើម្បីជំរុញការងារផ្សព្វផ្សាយខាងផ្នែកព័ត៌មានកាន់តែមានប្រសិទ្ធិភាព និងឆ្លើយតបតម្រូវការរបស់ប្រជាពលរដ្ឋដែលកំពុងស្វែងរកព័ត៌មានដែលត្រឹមត្រូវ និងមានប្រភពច្បាស់លាស់ជាដើម ដែលគិតមកដល់បច្ចុប្បន្ន ក្រសួងប្រៃសណីយ បានដំឡើង និងពង្រីកបង្គោលអង់តែនសរុបចំនួនជិត ២ម៉ឺនបង្គោល ក្នុងនោះចំនួនជាង ៣ពាន់ ជាបង្គោលអង់តែនប្រភេទ 4G និង5G។
នៅក្នុងកម្មវិធីប្រកាសដាក់ឱ្យប្រើប្រាស់ជាផ្លូវការនូវ «គេហទំព័រមន្ទីរព័ត៌មានរាជធានី–ខេត្ត» នេះដែរ ក្រសួងប្រៃសណីយ៍ និងទូរគមនាគមន៍ ក៏បានរៀបចំផ្តល់កុំព្យូទ័រចំនួន ៥០គ្រឿង ជូនដល់មន្ទីរព័ត៌មានរាជធានី-ខេត្តទាំង២៥ ដើម្បីជំរុញការធ្វើទំនើបកម្ម និងការលើកកម្ពស់វិស័យព័ត៌មានរបស់កម្ពុជាកាន់តែមានប្រសិទ្ធិភាពខ្ពស់ថែមទៀត៕អត្ថបទ៖ ឈិត បូរ៉ាវី
-
ព័ត៌មាន1 week ago«ធនធានហិរញ្ញវត្ថុ» ជាសរសៃឈាមរត់យ៉ាងសំខាន់មិនអាចខ្វះបានក្នុងការទ្រទ្រង់កម្លាំងប្រយុទ្ធ ខណៈប្រាក់បៀវត្សត្រូវតែផ្តល់ជូនឲ្យដល់ដៃយោធិនគ្រប់រូប
-
ព័ត៌មាន1 week agoកម្ពុជាត្រូវការថវិកាប្រមាណ១ពាន់លានដុល្លារអាមេរិកដើម្បីធ្វើការបោសសម្អាតគ្រាប់បែកចង្កោមពីការឈ្លានពានរបស់ថៃ
-
ព័ត៌មាន1 week agoអ្នកវិភាគ៖ ដំណោះស្រាយជម្លោះដែនសមុទ្រកម្ពុជា-ថៃ តាមយន្តការ UNCLOS កម្ពុជា អាចមានប្រៀបខាងផ្លូវច្បាប់
-
ព័ត៌មាន1 week agoកម្ពុជាបានដាក់ពាក្យបណ្តឹងទៅកាន់អង្គការ OPCW នៅប្រទេសហូឡង់ពាក់ព័ន្ធទាហានថៃ ប្រើប្រាស់អាវុធគីមីលើគោលដៅជនស៊ីវិល
-
កីឡា1 week agoក្រុមកីឡាអុកកម្ពុជា រំពឹងធ្វើបានកាន់តែល្អ ក្នុងព្រឹត្តិការណ៍ Fide Chess Olympiad 2026 នៅអូសបេគីស្ថាន
-
ព័ត៌មាន5 days agoនាយខណ្ឌរដ្ឋបាលជលផលខេត្តកណ្តាល បានព្រមានចាត់វិធានការក្តៅ ដោយគ្មានការលើកលែងចំពោះជនប្រព្រឹត្តបទល្មើសនេសាទដោយខុសច្បាប់
-
ព័ត៌មាន1 week ago«ខ្មែរជួយខ្មែរ»៖ ស្មារតីសាមគ្គីរវាងស្ថាប័នស៊ីវិល និងកងទ័ពជួរមុខ ក្នុងខឿនការពារជាតិនិងជីវភាពគ្រួសារកងទ័ព
-
ព័ត៌មាន1 week agoព្រះមហាក្សត្រព្រះរាជទានម៉ាស៊ីនបូមទឹកខ្នាតធំ ១៩គ្រឿង ដើម្បីសង្គ្រោះស្រូវប្រជានុរាស្ត្រក្រោយរងគ្រោះរាំងស្ងួតនៅខេត្តកំពង់ស្ពឺ