រយៈពេល១០ថ្ងៃ កម្ពុជាបន្តបណ្ដេញជនបរទេសខុសច្បាប់ ៦៨១នាក់ មាន ៣១សញ្ជាតិ ចេញពីប្រទេស ពាក់ព័ន្ធ Online Scams និងបទសល្មើសផ្សេងទៀត

ភ្នំពេញ៖ អាជ្ញាធរកម្ពុជា តាមរយៈអគ្គនាយកដ្ឋានអន្តោប្រវេសន៍ បានសម្រេចបណ្ដេញជនបរទេសខុសច្បាប់សរុបចំនួន ៦៨១នាក់ (ស្រី ១០៣នាក់) មាន ៣១សញ្ជាតិ ចេញពីកម្ពុជាក្នុងរយៈពេល ១០ថ្ងៃ ចាប់ពីថ្ងៃទី១១ ដល់ថ្ងៃទី២០ ខែកញ្ញា ឆ្នាំ២០២៦ អនុវត្តតាមអនុសាសន៍របស់រដ្ឋមន្ត្រីក្រសួងមហាផ្ទៃ, ឯកឧត្តម ឧត្តមសេនីយ៍ឯក សុខ វាសនា អគ្គនាយក នៃអគ្គនាយកដ្ឋានអន្តោប្រវេសន៍ បានចាត់តាំងឱ្យនាយកដ្ឋានស៊ើបអង្កេត និងអនុវត្តនីតិវិធី បន្តអនុវត្តនីតិវិធីបណ្ដេញចេញនូវក្រុមជនបរទេសទាំងនោះជាបន្តបន្ទាប់។

អគ្គនាយកដ្ឋានអន្តោប្រវេសន៍ បានឱ្យដឹងថា ជនបរទេសទាំង ៣១សញ្ជាតិ រួមមាន៖ ចិន,ឥណ្ឌូនេស៊ី,បង់ក្លាដេស,ថៃ,វៀតណាម,កូឡំប៊ី,ឡាវ,ចិនតៃវ៉ាន់,កាមេរូន ,លីប៊េរីយ៉ា,នីហ្សេរីយ៉ា ,ម៉ាឡេស៊ី,កេនយ៉ា,សេរ៉ឡេអូន,អង់គ្លេស,កាហ្សាក់ស្ថាន,កូរ៉េ,ប៉ាគីស្ថាន,ប្រេស៊ីល,ម៉ាល់ឌីវ,ម៊ូសំប៊ីន,មីយ៉ាន់ម៉ា,យ៉ូហ្គង់ដា រវ៉ាន់ដា,ហ្គឺណេ,ហ្គំប៊ី,ឥណ្ឌា,អ៊ីស្រាអែល,អេក្វាទ័រ,អេត្យូពី និងអេហ្ស៊ីប។

ក្នុងនោះមានជនជាតិចិន ចំនួន ១៦៤នាក់ ស្រី០១នាក់ ពាក់ព័ន្ធនឹងការឆបោកតាមប្រព័ន្ធបច្ចេកវិទ្យា Online Scams ត្រូវបានបណ្ដេញចេញតាមជើងហោះហើរពិសេស នៅប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ និងជនបរទេសមួយចំនួនទៀតត្រូវបណ្តេញចេញពីកម្ពុជា បន្ទាប់ពីសមត្ថកិច្ចរកឃើញថា ពួកគេពាក់ព័ន្ធនឹងបទល្មើសផ្សេងៗដូចជា៖ ការលួចឆ្លងដែន, បន្លំឯកសារ, ស្នាក់នៅគ្មានលិខិតឆ្លងដែន, ចាប់ជំរិតទារប្រាក់, ប្រើប្រាស់ទិដ្ឋាការក្លែងក្លាយ (QR Code ក្លែងក្លាយ), ជួញដូរ និងប្រើប្រាស់គ្រឿងញៀន, ធ្វើការងារខុសច្បាប់ និងបទល្មើសព្រហ្មទណ្ឌផ្សេងៗទៀត។

បើតាម អគ្គនាយកដ្ឋានអន្តោប្រវេសន៍, ប្រតិបត្តិការបណ្ដេញចេញជនបរទេសខុសច្បាប់នេះ គឺជាការអនុវត្តតាមបទបញ្ជា និងវិធានការច្បាប់យ៉ាងម៉ឺងម៉ាត់បំផុតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា ដែលកន្លងមកសម្តេចធិបតី ធ្លាប់បានបញ្ជាក់ជំហរយ៉ាងច្បាស់ៗថា៖«កម្ពុជាមិនអនុញ្ញាតឱ្យឧក្រិដ្ឋជន ឬជនខុសច្បាប់ប្រើប្រាស់ទឹកដីកម្ពុជា ជាទីតាំងធ្វើសកម្មភាពឆបោក ឬប្រព្រឹត្តបទល្មើសបង្កអសន្តិសុខដល់តំបន់ និងពិភពលោកឡើយ។ អាជ្ញាធរត្រូវតែបន្តបោសសម្អាត បង្ក្រាប និងបណ្ដេញចេញដោយគ្មានការលើកលែង ដើម្បីការពារកិត្តិយស និងសន្តិសុខជាតិ»។

អគ្គនាយកដ្ឋានអន្តោប្រវេសន៍ បញ្ជាក់ថា ផ្អែកលើស្មារតីនេះ និងក្រោមការដឹកនាំតម្រង់ទិសដោយផ្ទាល់ពី ឯកឧត្តម រដ្ឋមន្ត្រីក្រសួងមហាផ្ទៃ កម្លាំងសមត្ថកិច្ចបានខិតខំប្រឹងប្រែងលុបបំបាត់ឧក្រិដ្ឋកម្មតាមប្រព័ន្ធបច្ចេកវិទ្យា ស្រាវជ្រាវបង្ក្រាបដល់មេខ្លោង និងបានជួយសង្គ្រោះជនរងគ្រោះដែលត្រូវគេបោកបញ្ឆោត ឱ្យទទួលបានសេរីភាព ត្រឡប់ទៅស្រុកកំណើតវិញដោយសុវត្ថិភាព៕