TOP STORY | សម្ដេចតេជោ ហ៊ុន សែន៖ «អំណាច ហ៊ុន សែន មិនទាន់ចប់ទេទាំងជាប្រធានបក្សកាន់អំណាច និងទាំងជាប្រធានព្រឹទ្ធសភា, ខ្ញុំនឹងបន្តកំដរលេងជាមួយពួក កម្ចាត់ត្រកូលហ៊ុន រហូតពួកនេះអស់ពីផែនដី»

ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទីនៃព្រះរាជាណាចក្រកម្ពុជា នៅ​ព្រឹក​ថ្ងៃទី២៤ ខែកញ្ញា ឆ្នាំ២០២៦នេះ បានបង្ហោះសារមួយបញ្ជាក់ជាថ្មីថា អំណាច ហ៊ុន សែន មិន​ទាន់ចប់ទេទាំងជាប្រធានបក្សកាន់អំណាច និងទាំងជាប្រធានព្រឹទ្ធសភា, សម្ដេច​នឹង​បន្ត​កំដរ​លេង​ជាមួយពួ​ក «កម្ចាត់ត្រកូលហ៊ុន» រហូតពួកនេះអស់ពីផែនដី ខណៈ​សម្ដេច​បាន​រំឭ​ក​ថា​ ថ្ងៃនេះ គឺជាខួបលើកទី២៨ ឆ្នាំនៃការប៉ុនប៉ងធ្វើឃាតសម្ដេចពីសំណាក់ពួកចោរនយោបាយ (24.9.1998-24.9.2026)។

សម្ដេចតេជោ ហ៊ុន សែន បានសរសេរថា ថ្ងៃនេះជាខួបលើកទី២៨ ឆ្នាំនៃការ​ប៉ុន​ប៉ង​ធ្វើ​ឃាត​ខ្ញុំ​ពី​សំណាក់​ពួក​ចោរនយោបាយ (24.9.1998-24.9.2026)។

សម្ដេចតេជោ បាន​រំឭកថា ក្រោយពេលខ្មាំងលួចសម្លាប់តែមិនស្លាប់ ពេលនោះហើយ​ដែល​សម្ដេច​យក​ដៃ​ដាក់​លើក្បាល ដោយនិយាយក្នុងចិត្តថា «ខ្ញុំត្រូវពង្រឹងអំណាច និងត្រូវបញ្ចប់​សង្គ្រាម​ឲ្យ​ខាង​តែ​បាន​»។

សម្ដេចតេជោ ហ៊ុន សែន បានឱ្យដឹងថា តាមពិតក្រោយឈ្នះឆ្នោតឆ្នាំ១៩៩៨ សម្ដេចបាន​ស្នើ​សុំ​ឈប់​ធ្វើ​នាយករដ្ឋមន្ត្រី ដោយមានការប្រជុំគណអចិន្ត្រៃយ៍គណបក្សនៅផ្ទះ សម្ដេចនៅតាខ្មៅ នា​ល្ងាច​ថ្ងៃ២៧ ខែកក្កដា ឆ្នាំ១៩៩៨ ក្រោមអធិបតីភាពសម្ដេច ជា ស៊ីម ប៉ុន្តែមិនមាន​ថ្នាក់​ដឹក​នាំ​ណា​យល់​ព្រម​ឲ្យសម្ដេចឈប់ធ្វើនាយករដ្ឋមន្ត្រីនោះទេ។

សម្ដេចតេជោបានថ្លែងថា៖«ខ្ញុំគិតថា ខ្ញុំបន្តធ្វើនាយករដ្ឋមន្ត្រីត្រឹមឆ្នាំ២០០៣ ប៉ុន្តែនៅពេល​ដែល​គេ​ហ៊ាន​សម្លាប់​ខ្ញុំយ៉ាងឃោឃៅបែបនេះខ្ញុំលើកដៃដាក់លើក្បាលនិយាយក្នុងចិត្តថា ត្រូវពង្រឹង​អំណាច​ត្រូវ​បញ្ចប់សង្រ្គាម និងត្រូវធ្វើនាយករដ្ឋមន្ត្រីរហូតដល់ពេលឈប់ចង់ធ្វើ»។

សម្ដេចតេជោបានបញ្ជាក់ថា ក្រោយមកសម្ដេចបាននិយាយថា «ថ្ងៃនេះខ្ញុំ​ជា​នាយករ​ដ្ឋ​មន្ត្រី​ថ្ងៃ​ក្រោយ​ខ្ញុំនឹងក្លាយទៅជាឪនាយករដ្ឋមន្ត្រី ខ្ញុំពិតជាធ្វើបានមែន គឺ ហ៊ុន ម៉ាណែត បានក្លាយជា​នាយក​រដ្ឋ​មន្ត្រីជាង ៣ឆ្នាំមកហើយតាមរយៈការបោះឆ្នោត និងស្របតាមរដ្ឋធម្មនុញ្ញ»។

សម្ដេចបន្ថែមថា ចង់ឈប់ធ្វើនាយករដ្ឋមន្ត្រីក្នុងវ័យ ៤៦ឆ្នាំ តែដល់គេចង់សម្លាប់ត្រូវធ្វើ នាយក​រដ្ឋ​មន្ត្រី ​២៥ឆ្នាំទៀតរហូតអាយុ ៧១ឆ្នាំទើបឈប់។ អំណាច ហ៊ុន សែន មិនទាន់ចប់ទេ ទាំងជា​ប្រធាន​បក្ស​កាន់អំណាច និងទាំងជាប្រធានព្រឹទ្ធសភា។ ខ្ញុំនឹងបន្តកំដរលេងជាមួយពួក (កំចាត់​ត្រ​កូល​ហ៊ុន) រហូតពួកនេះអស់ពីផែនដី៕